ފެނަކަ އިންޖީނުގެ ހިންގާ ބިންތަކުން ކުލި ނަގަން ފަށައިފި ނަމަ އެ ކަމުގެ ގެއްލުން ރައްޔިތުންނަށް ކުރާނެ ކަމަށް އެ ކޯޕަރޭޝަނުން ބުނެފި އެވެ.
އެ ކުންފުނީގެ މެނޭޖިން ޑިރެކްޓަރު އަހުމަދު ސައީދު އެހެން ވިދާޅުވީ ލ. ގަމުގައި މިހާރު ކުރިއަށްދާ "ވިއަވަތި" ކޮންފަރެންސްގައި ބައިވެރިވެވަޑައިގަންނަވާ ކުންފުނިތަކުގެ މެނޭޖިން ޑިރެކްޓަރުންނާއި ކައުންސިލްތަކުގެ ރައީސުންނާއެކު ރޭ ބޭއްވި ބައްދަލުވުމުގަ އެވެ.
"ފެނަކައިން ހިންގާ އިންޖީނު ގެއިންނާއި އޮފީހުން ބިމު ކުލި ނަގަން ތިބޭފުޅުން ހިޔާލުފާޅު ކުރަމުންދާއިރު ކޮބައިތޯ ބޭނުމަކީ، ސިއްހީ މަރުކަޒާއި ހޮސްޕިޓަލާއި ހަމަ އެބޭފުޅުން ވެސް އާސަންދަ މެދުވެރިކޮށް ބޮޑު ޗާޖެއް ކޮށްލާނެ ޑޮކްޓަރަށް ދެއްކެވިޔަސް،" ބިމުން ކުލި ނުނަގާ ކަމުގެ ކަންބޮޑުވުން ކައުންސިލަރަކު ފާޅުކުރެއްވުމުން ސައީދު ވިދާޅުވި އެވެ.
ސައީދު ވިދާޅުވި ގޮތުގައި ކުލި ނަގަން ފަށައިފި ނަމަ ކަރަންޓު ބިލަށް އޭގެ އަސަރު ކުރާނެ އެވެ. އަދި، އެކަމުގެ ނޭދެވޭ އަސަރު ކުރާނީ ރައްޔިތުންނަށް ކަމަށް އޭނާ ފާހަގަ ކުރެއްވި އެވެ.
ސަރުކާރުގެ އަމާޒަކީ ވިހާ ވެސް ކުޑަ އަގެއްގައި ކަރަންޓު ހިދުމަތް ދިނުން ކަން ފާހަގަކުރައްވައި ސައީދު ވިދާޅުވި ފެނަކަ އަކީ ފެނަކައަކީ "ސާވިސްއެއް ޕްރޮވައިޑްކޮށްދޭ ކުންފުންޏެއް" ކަމަށާއި ވިޔަފާރި ކުރާ ކުންފުންޏެއް ނޫން ކަމަށެވެ.
އޭގެ އިތުރުން، ކުލި ނެގުމުން ލިބޭ ފައިދާއަށް ވުރެ ބޮޑު ފައިދާއެއް ރަށްރަށުގައި ފެނަކައިން އުފައްދާ ވަޒީފާތަކުގެ ސަބަބުން ލިބޭނެ ކަމަށް ވެސް ސައީދު ވިދާޅުވި އެވެ.
"..ސަރުކާރުގެ ސިޔާސަތަކީ ޒުވާނުންނަށް ވަޒީފާގެ ފުރުސަތުތައް، ލިބެން އޮތް މަދު ވަސީލަތްތައް ބޭނުންކޮށްގެން ވަޒީފާގެ ފުުރުސަތުތައް އިތުރުކުރުން،" ސައީދު ވިދާޅުވި އެވެ.
އެގޮތުން މަދު ބަޔަކު ލައިގެން ކުރެވިދާނެ މަސައްކަތްތައް ގިނަ މުވައްޒަފުން ނަގައިގެން ކުރަނީ ވެސް ޒުވާނުންނަށް ވަޒީފާ ހޯދައިދިނުމަށް ކަމަށް އޭނާ ވިދާޅުވި އެވެ.
