އިގްތިސާދީ ކާރީސާއަކާ މިވަގުތު ކުރިމަތިލާން ޖެހުމުގެ ރިސްކެއް ރާއްޖެއަށް ނެތް ކަމަށާއި އެހެން ނަމަވެސް އެފަދަ ހާލަތަކަށް ކުރިއަށްއޮތް ދުވަސްތަކުގައި ނުދިޔުމަށް ފިޔަވަޅުތަކެއް އެޅުމަށް ވޯލްޑް ބޭންކުން ލަފާދީފި އެވެ.
މިދިޔަ ބުރާސްފަތި ދުވަހު ރާއްޖޭގެ ޕަބްލިކް އެކްސްޕެންޑިޗާ ރިވިއު ރިޕޯޓު އެ ބޭންކުން ވަނީ އާންމުކޮށްފަ އެވެ. ބޯހިޔާވަހިކަމާއި، ޕެންޝަނާއި، ސަރުކާރު ހިއްސާވާ ކުންފުނިތަކުގެ އިތުރުން ދައުލަތުގެ މުވައްޒަފުންނަށް މުސާރަ ދިނުމުގައި ސަރުކާރުން އަމަލުކުރަމުންދާ ގޮތް މި ރިޕޯޓުގައި ވަނީ އެސެސްކޮށްފަ އެވެ.
"ރާއްޖެ އޮތީ ކާރިސާއެއްގެ ރިސްކެއްގައި ނޫން މިވަގުތު. ނަމަވެސް، ކުރިއަށްއޮތް ތަނުގައި އެފަދަ ކާރިސާއަކާ ކުރިމަތިނުލުމަށް އާމްދަނީ އިތުރުކޮށް، ދަރަނި މެނޭޖުކުރަން ގިނަ ކަންކަން ކުރަން ޖެހޭ،" ވޯލްޑް ބޭންކުން ރާއްޖޭގެ ހާލަތާ ގުޅޭގޮތުން ބުންޏެވެ.
ކޮވިޑް-19 ގެ ސަބަބުން ރާއްޖޭގެ ޖީޑީޕީ 34 ޕަސެންޓު ދަށްވުމަށް ފަހު އަނެއްކާ ވެސް ވަނީ އިގްތިސާދީ ހާލަތު ރަނގަޅުވާން ފަށާފަ އެވެ. ޔޫކްރެއިން ހަނގުރާމައާ އެކު އެ ހިސާބުން އަންނަ ފަތުރުވެރިންގެ އަދަދު ދަށްވި ނަމަވެސް އިގްތިސާދީ ކުރިއެރުން ފެންނަނީ ރަނގަޅަށް ކަމަށް އެ ރިޕޯޓުގައި ބަޔާންކޮށްފައިވެ އެވެ.
"އާމްދަނީ އިތުރުކުރުމަށް ސަރުކާރުން ކުރަން ނިންމާފައިވާ ކަންކަމަކީ މިވަގުތަށް އެޅިދާނެ ރަނގަޅު ފިޔަވަޅުތަކެއް. އިތުރަށް ވަސީލަތްތައް ހޯދާ ސަބަބުތަކާއި އެ ވަސީލަތްތައް ބޭނުންކުރާ ގޮތްތަކާއި ގުޅޭގޮތުން ހާމަކަން ބޮޑުގޮތެއްގައި ޖަވާބުދާރީވާން ޖެހޭ،" ސަރުކާރުގެ ސިޔާސަތުތަކާ ގުޅޭގޮތުން ވޯލްޑް ބޭންކުން ބުންޏެވެ.
އެއްވެސް މަޝްރޫއެއް ހުއްޓާނުލައި ކުރިއަށްގެންދާނެކަން ސަރުކާރުން ހާމަކޮށްފައިވާއިރު ވޯލްޑް ބޭންކުން ވަނީ އާމްދަނީ އިތުރުކުރުމަށް ލޯނު ނެގުމުގެ ބަދަލުގައި ޖީއެސްޓީ އާއި ޓީޖީއެސްޓީގެ ރޭޓު ބޮޑުކުރުމަށް އިރުޝާދު ދީފަ އެވެ.
ޕަބްލިކް އެކްސްޕެންޑިޗާ ރިވިއުގައި ވަނީ ހަރަދުތައް ކުޑަކުރުމަށް ކުރެވިދާނެ ކަންތައްތަކެއް ހުށަހަޅާފަ އެވެ. އަދި، ހަރަދު ކުރާއިރު އެންމެ ބޭނުން ޖެހިފައިވާ މީހުންނަށް އެހީތެރިކަން ލިބޭނެ ގޮތަށް ކަންކަން ރޭވުމަށް ވޯލްޑް ބޭންކުން ވަނީ އިލްތިމާސްކޮށްފަ އެވެ.
ތަރައްގީގެ މަޝްރޫއުތަކަށާއި އެހެނިހެން ކަންކަމަށް ދިވެހި ދައުލަތުން ނަގާފައިވާ ލޯނުތަކަށް 2026 ގައި އެއް ބިލިއަން ޑޮލަރު އަނބުރާ ދައްކަން ޖެހޭނެ ކަމަށް ވޯލްޑް ބޭންކުން މީގެކުރިން ހާމަކޮށްފައިވެ އެވެ.
