ރާނީ އެލިޒަބަތު ދެ ވަނައަކީ އިނގިރޭސިވިލާތުގެ ތަހުތުގައި އެންމެ ގިނަ ދުވަސް ހޭދަކުރެއްވި ވެރިޔާ އެވެ. އެކަމަނާއަށް ހަތަރު ދަރިކަލުންނާއި، އަށް މާމަ ދަރިކަަލުންނާއި، 12 މުނިމާމަ ދަރިކަލުން ލިބިވަޑައިގެންނެވި އެވެ.
ތަހުތުގައި 70 އަހަރު ހޭދަކުރެއްވުމަށް ފަހު އެކަމަނާ އަވަހާރަވީ އުމުރުފުޅުން 96 އަހަރުގައި ސެޕްޓެމްބަރު އަށް ވަނަ ދުވަހު އެވެ. އެކަމަނާ އަވަހާރަވުމާ އެކު އިނގިރޭސި އާ ރަސްގެފާނަކަށް ވެވަޑައިގެންނެވީ ދޮށީ ދަރިކަލުން ޗާލްސް އެވެ.
ތިރީގައި މި ވަނީ އިނގިރޭސި ޝާހީ އާއިލާ އާއި ތަހުތު ވާރުތަވާ ގޮތުގެ ބައެއް މައުލޫމާތެވެ.
ރާނީ އަދި ފިރިކަލުން، ޑިއުކް އޮފް އެޑިންބަރާ ފިލިޕް
އެލިޒަބަތު އެލެގްޒެންޑްރާ މޭރީ ވިންޑްސާ އުފަންވެވަޑައިގެންނެވީ ލަންޑަނަށް އެޕްރީލް، 21، 1926 ގަ އެވެ. އެކަމަނާ ރާނީ ކަމަށް ވަޑައިގެންނެވީ ތާރީހީ އޮޅުމަކުންނެވެ.
އެކަމަނާގެ ބައްޕާފުޅު ޖޯޖް ހަަ ވަނަ ރަަސްގެފާނު ކަމަށް ވަޑައިގެންނެވީ 1936 ވަނަ އަހަރު އެވެ. އެއީ އެމަނިކުފާނުގެ ބޭބޭފުޅު އަދި އޭރު ރަސްކަމުގައި ހުންނެވި އެޑްވާޑް އަށް ވަނަ ތަހުތު ދޫކޮށްލުމުންނެވެ. އެއާ އެކު އަަމީރާ "ލިލިބެޓް" އަށް ތަހުތު ވާރުތަވެވަޑައިގެންނެވި އެވެ.
އުމުރުފުޅުން 19 އަހަރުގައި އެކަމަނާއަކީ އަސްކަރިއްޔާގެ މެކޭނިކެެއް އަދި ޑްރަައިވަރެކެވެ. އުމުރުފުޅުން 21 އަހަރުގައި އެކަމަނާ ކަައިވެނު ކުރެއްވީ ފިލިޕް މައުންޓްބެޓަންއާ އެވެ. އެއީ ގްރީސްގެ އަމީރެއްގެ ދަރިކަލެކެވެ.
ބައްޕާފުޅު، ރަސްގެފާނު އަވަހާރަަވިކަން އެނގިވޑައިގެންނެވީ ދެ ދެކނބަލުން ޗުއްޓީގައި ކެންޔާގައި އުޅުއްވަނިކޮށް ފެބްރުއަރީ 6، 1952 ގަ އެވެ. އެއާ އެކު ތަހުތަށް ވަަޑައިގެންނެވީ އެކަމަނާ އެވެ.
އެ ހަބަަރާއެކު އެކަމަނާ ވަަގުތުން އިނގިރޭސިވިލާތަށް އެނބުރި ވަޑައިގެންނެވި އެވެ. އަދި އިނގިރޭސިވިލާތާއި، އޮސްޓްރޭލިއާ، ކެނެޑާ، ނިއުޒީލޭންޑް، ދެކުނު އެފްރިކާ، ޕާކިސްތާން އަދި ސިލޯންގެ ރާނީކަމަށް ރަސްމީކޮށް ވަޑައިގެންނެވީ ޖޫން 2، 1953 ގަ އެވެ.
ރާނީ އަދި ފިލިޕް ހަތަރު ދަރިކަލުންނާ އެކު.
ރާނީ އާއި ފިލިޕްއަށް ލިބިވަޑައިގެންނެވި ހަތަރު ބޭފުޅުންނަކީ ޗާލްސް، އޭން، އެންޑްރޫ އަދި އެޑްވާޑް އެވެ. ފިލިޕް އަވަހާރަވެވަޑައިގެންނެވީ އެޕްރީލް 9، 2021 ގަ އެވެ.
އާ ރަސްގެފާނު ޗާލްސް
ރާނީ އެންމެ ދޮށީ ދަރިކަލުން ޗާލްސް އުފަންވެވަޑައިގެންނެވީ 1948 ގަ އެވެ. އެމަނިކުފާނަކީ މިހާރު އިނގިރޭސި ރަސްގެފާނެވެ.
ކުރިން ވޭލްސްގެ އަމީރުކަން ކުރެއްވި ޗާލްސް އާއި ލޭޑީ ޑަޔާނާ ސްޕެންސާ ކައިވެނި ކުރެއްވީ ޖުލަައި 29، 1981 ގަ އެވެ. އެ ކައިވެންޏަށް ދެ ދަރިކަލުން ލިބިވަޑައިގެންނެވި އެވެ. އެއީ ވިލިއަމް އަދި ހެރީ އެވެ. ނަމަވެސް 1996 ގައި އެ ކައިވެނި ރޫޅުނެވެ. އަަމީރާ ޑަޔާނާ އަވަހާރަވީ އޯގަސްޓް 31، 1997 ގައި ޕެރިހުގައި ހިނގި ކާރު އެކްސިޑެންޓެއްގަ އެވެ.
ރަސްގެފާނު ޗާލްސް އަދި ކެމިލާ.
ރަސްގެފާނު ޗާލްސްގެ މިހާރުގެ އަނބިކަނބަލުންނަކީ ކުރިން ވެސް ލޯބީގެ ގޮތުން ގުޅިގެން އުޅުއްވި ކެމިލާ ޕާކާ ބައުލްސް އެވެ. އެ ކައިވެނި ކުރެއްވީ އެޕްރީލް 9، 2005 ގަ އެވެ.
ވަލީ އަހުދު، ޑިއުކް އޮފް ކެމްބްރިޖް، އަަމީރު ވިލިއަމް
އަމީރު ވިލިއަމްއަކީ ރަސްގެފާނު ޗާލްސްގެ އެންމެ ދޮށީ ދަރިކަލުންނެވެ. މިހާރު އެމަނިކުފާނަކީ ވަލީ އަހުދެވެ.
ވިލިއަމްގެ މަންމާފުޅު ޑަޔާނާ އަވަހާރަވީ، އެމަނިކުފާނުގެ އުމުރުފުޅުން އެންމެ 15 އަހަރުގަ އެވެ. ސެއިންޓް އެންޑްރޫޒް ޔުނިވާސިޓީގައި ތައުލީމް ހާސިލްކުރެއްވި ވިލިއަމްގެ އަނބިކަނބަލުން ކޭޓް މިޑްލްޓަންއާ ބައްދަލުވީ އެ ތަނުންނެވެ. ވިލިއަމް އާއި ކޭޓް ކައިވެނި ކުރެއްވީ 2011 ގަ އެވެ.
ވިލިއަމް އަދި ކޭޓް ދަރިކަލުންނާ އެކު.
ވިލިއަމް އާއި ކޭޓްގެ ތިން ދަރިކަލުން ތިއްބަވަ އެވެ. އެއީ ޖޯޖް، ޗާލޮޓް އަދި ލުއީ އެވެ. ވަލީ އަހުދުގެ ހައިސިއްޔަތުން ވިލިއަމްގެ މައިގަނޑު ޒިންމާއަަކީ ރަސްގެފާނުގެ ޝާހީ ޒިންމާތަކުގެ އެހީތެރިކަން ފޯރުކޮށްދެއްވުމެވެ.
އަމީރު ޖޯޖް
އަމީރު ޖޯޖް އުފަންވެވަޑައިގެންނެވީ ޖުލައި 22، 2013 ގައި ލަންޑަންގެ ސެއިންޓް މޭރީޒް ހޮސްޕިޓަލުގަ އެވެ. ބައްޕާފުޅު ވިލިއަމްއަށް ފަހު އިނގިރޭސި ރަސްކަން ވާރުތަވާނީ ޖޯޖް އަށެވެ.
އަމީރާ ޗާލޮޓް
އަމީރާާ ޗާލޮޓް އުފަންވެވަޑައިގެންނެވީ މޭ 2، 2015 ގައި ލަންޑަންގެ ސެއިންޓް މޭރީޒް ހޮސްޕިޓަލުގަ އެވެ. އެކަމަނާގެ ފުރިހަމަ ނަމަކީ ޗާލޮޓް އެލިޒަބަތް ޑަޔާނާ އެވެ.
ބައްޕާފުޅު ވިލިއަމް އަދި ބޭބޭފުޅު ޖޯޖްއަށް ފަހު ރަސްކަން ވާރުތަވާނީ ޗާލޮޓް އަށެވެ.
އަމީރު ލުއީ
އަމީރު ލުއީ އުފަންވެވަަޑައިގެންނެވީ އެޕްރީލް 23، 2018 ގައި ލަންޑަންގެ ސެއިންޓް މޭރީޒް ހޮސްޕިޓަލުގަ އެވެ.
ބައްޕާފުޅު ވިލިއަމް އަދި ޖޯޖް އާއި ޗާލޮޓްއަށް ފަހު ރަސްކަން ވާރުތަވާނީ ލުއީ އަށެވެ.
ހެރީ އަދި މޭގަން ދަަރިކަލުންނާ އެކު.
އިނގިރޭސި ރަސްކަމުގެ ތަހުރު ވާރުތަވާ ލިސްޓުގައި ވަލީ އަހުދުގެ ކޮއްކޯފުޅު އަމީރު ހަ ވަނަ ހިމެނިވަޑައިގަންނަވަނީ ފަސް ވަނަ އަށެވެ. އެމަނިކުފާނު ދަރިކަލުން އާޗީ އާއި ދަރިކަނބަލުން ލިލިބެޓް ލިސްޓުގައި ހިމެނިވަޑައިގަންނަވަނީ އޭގެ ފަހުންނެވެ.
