ކެނެޑާގައި އާދީއްތަަ ދުވަަހު ވަޅިން ހަމަލާދީ 10 މީހުން މަރާލިކަމުގެ ތުހުމަތު ކުރެވޭ ދެ ވަނަ މީހާ ހައްޔަރު ކުރި ފަހުން މަރުވެއްޖެ އެވެ.
ފުލުހުން ބުނީ އުމުރުން 32 އަހަރުގެ މައިލްސް ސެންޑާސަން ހައްޔަރު ކުރީ އޭނާގެ ކާރު ފަހައި ފުލުހުންގެ އުޅަނދުތައް ދުއްވައި، ހިންގި އޮޕަރޭޝަނެއްގައި ކަމަށެވެ.
ހައްޔަރު ކުރި ފަހުން "ސިއްހީ އެމެޖެންސީއެއް ދިމާވެ" އޭނާ މަަރުވެފައިވާ ކަމަށް ފުލުހުން ބުންޏެވެ. އެކަމަކު ތަަފްސީލް ހާމައެއް ނުކުރެ އެވެ.
އެހެން ނަމަވެސް ނަން ހާމަނުކުރާ ފުލުހުންގެ އޮފިޝަލަކު ފަހުން ބުނީ އޭނާ މަަރުވީ އަމިއްލަ ހަށިގަނޑަށް ދިން ޒަހަމްތަކަކާ ގުޅިގެން ކަމަށެވެ.
ކެނެޑާގެ ސަސްކަޗެވަން ޕްރޮވިންސްގައި ދިން ހަމަލާތަކުގައި 18 މީހުންނަށް އަނިޔާވި އެވެ. އޭގެ ތެރެއިން 10 މީހުން އަދިވެސް ތިބީ ހޮސްޕިޓަލުގަ އެވެ. ތިން މީހުންގެ ހާލު ގޯހެވެ.
އާދީއްތަ ދުވަހު ތަފާތު 13 ސަރަހައްދެއްގައި ވަޅިން ހަމަލާ ދިން ސަބަބު ސާފެއް ނޫނެވެ. ތުހުމަތު ކުރެވެނީ މައިލްސް އާއި އޭނާގެ ބޭބެ ޑޭމިއެން ސެންޑާސަން އަށެވެ.
އެ ދެބެއިންނާއި މަރުވި އަދި އަނިޔާވި ގިނަ މީހުން ވެސް ނިސްބަތް ވަނީ ޖޭމްސް ސްމިތް ކްރީ ނޭޝަން ސަރަހައްދަށެވެ. ޑޭމިއެން މަރުވެފައި އޮއްވާ ފުލުހުންނަށް ފެނުނީ ހޯމަ ދުވަހު އެވެ.
އޭނާ މަރުވީ މައިލްސްގެ ސަބަބުންތޯ ބެލުމަށް ފުލުހުން ދަނީ ތަހުގީގު ކުރަމުންނެވެ. ޑޭމިއެންގެ ހަށިގަނޑުގައި ހުރީ އޭނާ އަމިއްލައަށް ކުރި ޒަހަމްތަކެއް ކަަމަށް ނުބެލެވޭ ކަމަށް ފުލުހުން ކުރިން ބުންޏެވެ.
