ވ. ތިނަދޫ ކުނިކޮށްޓަށް ޖަމާކޮށް އެތައް ދުވަހެއްވަންދެން ހުރި ކުނިފުނިތައް ފުރަތަމަ ފަރަށް އެތަނުން ނަގައި ތަން ހުސްކޮށްފި އެވެ.
އެ ރަށުގެ ކުނި ކޮށިން ނެގި ކުނިތައް ނައްތާލުމަށް ގެންދާނީ ތިލަފުށި ވޭސްޓް ފެސިލިޓީއަށެވެ. ގާތްގަނޑަކަށް 1،350 އަށްވުރެ ގިނަ ޓަނުގެ ކުނި ހިމެނޭ މިކުނިފުނި ހުސްކޮށްފައިވަނީ އެންވަޔަރަމަންޓް މިނިސްޓްރީން ވޭސްޓް މެނޭޖްމަންޓް ކޯޕަރޭޝަން ވެމްކޯއާ ހަވާލުކޮށްގެންނެވެ.
ޖުމުލަ ތިން ދަތުރެއްގެ މަތިން އެ ކުނިތައް ނަގައި ނިންމީ އަށް ދުވަހުންނެވެ.
މިކަމާ ގުޅޭގޮތުން އެންވަޔަރަމަންޓު މިނިސްޓްރީން ބުނީ ތިނަދޫ އަކީ ވ. އަތޮޅުގެ ސިނާއީ މުހިންމު ރަށަކަށް ވެފައި އެރަށަކީ ގެސްޓުހައުސްތަައް ގިނަ ރަށެކަށް ވުމުން ކުނިތައް ނަގާ އެތަން ހުސްކުރުމަކީ މުހިއްމުކަމެއްކަމަށެވެ، އަދި މިއީ މީގެ ކުރިން އެއްވެސް ސަރުކާރަކަށް ހައްލުނުކުރެވި އޮތް ބޮޑުމައްސަލައެއް ކަންވެސް މިނިސްޓްރީން ފާހަގަކުރެ އެވެ.
މި ޕްރޮޖެކްޓުގެ ދަށުން އަށް ރަށެއްގައި މިގޮތަށް ޖަމާވެފައި ހުރި ކުނިފުނިތައް ނަގައި ހުސްކުރާނެ އެވެ. މިއީ 3.5 މިލިއަން ރުފިޔާގެ ޕްރޮޖެކްޓެއް ކަމަށް އެންވަޔަރަމަންޓު މިނިސްޓްރީން މައުލޫމާތު ދެ އެވެ.
