އިންޑިއާގެ އިދިކޮޅު ލީޑަރު ރާހުލް ގާންދީ ގައުމުގެ އެއްކޮޅުން އަނެއްކޮޅަށް 3،570 ކިލޯމީޓަރަށް ހިނގަން ނިންމަވައިފި އެވެ.
"އިންޑިއާ އެއްބައިވަންތަ ކުރަން" ފައިމަގުގައި ފަށާ މި ދަތުރުގައި އިދިކޮޅު ކޮންގްރެސް ޕާޓީގެ 100 އަށް ވުރެ ގިނަ މެމްބަރުން ބައިވެރިވެ އެވެ.
މި ދަތުރުގައި އިންޑިއާގެ 12 ސްޓޭޓް ހުރަސްކޮށް، 3،570 ކިލޯމީޓަރުގެ ސަރަހައްދަކަށް ހިނގާފައި ދާން ޖެހޭ އިރު، ދަތުރު ފުރިހަމަ ކުރަން ފަސް މަސް ނަގާނެ އެވެ.
ރާހުލްގެ މި ދަތުރުގައި ދުވާލުގެ ވަގުތު ހޭދަކުރައްވާނީ އާއްމުންނާ ބައްދަލުކުރުމަށެވެ. އަދި ރޭގަނޑުގެ ނިދުން އިންތިޒާމުކޮށްފައިވަނީ ޓެންޓު ފަދަ ވަގުތީ ހިޔާތައް ޖަހައިގެނެވެ.
މި ދަތުރު ވެބްސައިޓެއް މެދުވެރިކޮށް ލައިވްސްޓްރީމް ކުރަން ހަމަޖެހިފައިވާ އިރު، ދަަތުރުގެ މަގްސަދު ހާމަކުރާ ލަވަތަައް ވެސް ޖަހާނެ އެވެ.
"ބާރަތު ޖޯޑޯ ޔަތްރާ" ނުވަތަ އިންޑިއާ އެއްބައިވަަންތަ ކުރާ ހިނގާލުމަކީ ހަގީގަތުގައި ބޮޑު ވަޒީރު ނަރެންދްރަ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) އަށް ޓާގެޓް ކުރާ ސިޔާސީ ކެމްޕެއިނެކެވެ.
މީގެ ކުރިން ވެސް އިންޑިއާގެ ސިޔާސީ ބޭފުޅުން މިފަދަ ކެމްޕެއިންތައް ހިންގެވި އެވެ. އެގޮތުން 1983 ވަނަ އަހަރު އޭރުގެ އިދިކޮޅު ލީޑަރު ޗަންދްރަ ޝޭކަރް ހަ މަހުގެ ދަތުރެއްގައު 4،000 ކިލޯމީޓަރު ހިންގެވި އެވެ.
އޭގެ ފަހުން 1990 ވަނަ އަހަަރު ބީޖޭޕީގެ ލީޑަރު އެލްކޭ އަޑްވާނީ ވެސް އެފަަދަ ކެމްޕެއިނެއް ފެއްޓެވި އެވެ. އެއީ ކުޑަ ޓްރަކެއްގައި 10،000 ކިލޯމީޓަރު ދަތުރު ކުރެއްވުމަށެވެ. އެ ދަތުރު ފެއްޓިތާ މަހެއް ނުވަނީވެސް އަޑްވާނީ ހުއްޓުވައި ހައްޔަރު ކުރި އެވެ.
ތާރީހީ ގޮތުން އެންމެ ފާހަގަކުރެވެނީ އިނގިރޭސި އަޅުވެތިކަމާ ދެކޮޅަށް 1930 ވަނަަ އަހަަރު މަހާތުމާ ގާންދީ ކުރެއްވި 380 ކިލޯމީޓަރުގެ ހިނގާލުމެވެ.
