ހޮލީވުޑްގެ ދެ އެކްޓަރުން ކަމުގައިވާ ބެން ސްޓިލާ އާއި ޝޯން ޕެން ރަޝިއާއަށް އެތެރެވުން މަނާކޮށް "ސްޓޮޕް ލިސްޓުގައި" ހިމަނައިފި އެވެ.
ސްޓޮޕް ލިސްޓުގައި ހިމެނޭ ބައެއް އެހެން ފަރާތްތަކަކީ އެމެރިކާގެ ރައީސް ޖޯ ބައިޑެން، އިނގިރޭސި ކުރީގެ ބޮޑު ވަޒީރު ބޮރިސް ޖޯންސަން އަދި އެކްޓަރު މޯގަން ފްރީމަން އެވެ.
ޔޫކްރެއިންގައި ކުރަމުންދާ ހަނގުރާމައާ ގުޅިގެން ރަޝިއާ އާއި ހުޅަނގުގެ ގައުމުތަކުން އެޅި ދަތިކުރުމުގެ ފިޔަވަޅުތަކުގެ ތެރޭގައި ސްޓޮޕް ލިސްޓެއް އިއުލާން ކުރުން ހިމެނެ އެވެ.
ރަޝިއާގެ ރައީސް ލެޑިމިއަ ޕުޓިންއާ ގުޅުން އޮތް ބޮޑެތި މަހުޖަނުން ހުޅަނގުގެ ސްޓޮޕް ލިސްޓުގައި ހިމެނެ އެވެ.
ހޯމަ ދުވަަހު ރަޝިއާގެ ފޮރިން މިނިސްޓްރީން ބުނީ އެ ގައުމުގެ ސްޓޮޕް ލިސްޓުގައި އިތުރު 25 މީހުން ހިމަނާފައިވާ ކަމަށެވެ. އެއީ އެކްޓަރުންނާއި ވިޔަފާރިވެރިންނާއި ސަރުކާރުގެ އޮފިޝަލުންނެވެ.
ބެން ސްޓިލާ އާއި ޝޯން ޕެން މީގެ ކުރިން ވަނީ ޔޫކްރެއިން ހަނގުރާމައާ ގުޅިގެން ރަޝިއާއަށް ފާޑުކިޔައިފަ އެވެ. ސްޓިލާ ވަނީ ޔޫކްރެއިންގެ ރައީސް ވޮލޮޑިމިރް ޒެލެންސްކީއާ ވެސް ބައްދަލުކޮށްފަ އެވެ.
މިދިޔަ ޖޫން މަހު ޔޫކްރެއިންގެ ވެރިރަށް ކިޔެވްއަަށް ކުރި ދަތުރުގައި ޒެލެންސްކީއާ ބައްދަލުކުރުމަށް ފަހު ސްޓިލާ ބުނީ އެއީ އޭނާގެ "ހީރޯ" ކަމަށެވެ.
ބެން ސްޓިލާ އާއި ޒެލެންސްކީ.
އެކްޓަރު ޝޯން ޕެންއަކީ ވެސް ސިޔާސީ އެކި ކަންކަމުގައި ހަރަކާތްތެރި މީހެކެވެ. އޭނާ ވަނީ ޔޫކްރެއިން ހަނގުރާމައާ ގުޅޭ ޑޮކިޔުމެންޓްރީއެއް ހަދަން މަސައްކަތްކޮށްފަ އެވެ.
ޔޫކްރެއިންގައި އެ ފިލްމުގެ މަސައްކަތް ކުރަން އުޅުމަށް ފަހު، ހަނގުރާމަ ގޯސްވާން ފެށުމުން އޭނާ ޔޫކްރެއިނުން ފޭބީ މިދިޔަ މާޗް މަހު އެވެ.
ޕެން ފަހުން ބުނީ ރަޝިއާއާ ދެކޮޅަށް ހަނގުރާމަ ކުރަން ޔޫކްރެއިންގެ ފައުޖާ ގުޅުމަށް ވަރަށް ސީރިއަސްކޮށް ވިސްނި ކަމަށެވެ.
ރަޝިއާގެ ސްޓޮޕް ލިސްޓުގައި މިހާރު 1،073 މީހުން ހިމެނޭ އިރު، އެމެރިކާގެ ފިލްމު ޑިރެކްޓަރު ރޮބް ރެއިނާ ވެސް އޭގެ ތެރޭގައި ހިމެނެ އެވެ.
