މިނިކާވަގެއްގެ ހަމަލާއިން 15 މަހުގެ ތުއްތު ދަރިފުޅު ސަލާމަތް ކުރަަން އުޅެނިކޮށް، އިންޑިއާގެ މަދްޔަ ޕްރަދޭޝް ސްޓޭޓުގައި އަންހެނަަކަށް ސީރިއަސް އަނިޔާތަަކެއް ލިބިއްޖެ އެވެ.
ދަރިފުޅު ސަލާމަތް ކުރަން އަރްޗަނާ ޗައުދަރީ މިނިކާވަގާ ދެކޮޅަށް ނިކުތީ ހުސް އަތާ އެވެ. އަވަށުގެ މީހުން ނިކުމެ އެހީވެދިނީ އޭނާގެ ހަޅޭކުގެ އަޑު އިވުމުންނެވެ.
އަރްޗަނާ އާއި އޭނާގެ ތުއްތު ފިރިހެން ދަރިފުޅަށް ދަނީ ހޮސްޕިޓަލްގައި ފަރުވާ ކުރަމުންނެވެ.
ޑޮކްޓަރުން ބުނީ އަރްޗަނާގެ ފުއްޕާމެއަށް ގެއްލުންވެ، ފުން ޒަހަަމްތަކެއް ލިބިފައިވާ ކަމަށެވެ. އޭނާގެ ހާލު ގޯހެވެ. ތުއްތު ކުއްޖާގެ ބޮލަށް ލިބުނު ޒަހަމްތައް ސީރިއަސް ނޫން ކަމަށް ޑޮކްޓަރުން ބުންޏެވެ.
އެ ހާދިސާ ހިނގީ އާދީއްތަ ދުވަހު ބަންދަވްގަރް މިނިކާވަގު ރިޒާވް ކައިރީގަ އެވެ. މިނިކާވަގުތައް ދިރިއުޅެން ހާއްސަ އެފަދަ ރިޒާވްތައް ކައިރީގައި ދޭތެރެ ދޭތެރެއިން މިފަދަ ހާދިސާތައް ހިނގަ އެވެ.
މިނިކާވަގުގެ އިތުރުން ބޮޑެތި އެތް ވެސް އަވަށްތަކަށް ވަދެ، މުދަލާއި ދަނޑުތަކަށް ގެއްލުންދޭ ކަމަށް ވެ އެވެ. އިންޑިއާގެ ހުރިހާ ހިސާބެއްގައި ވެސް ވަލު ޖަނާވާރާއި އިންސާނުންގެ ކުރިމަތިލުންތައް ވަނީ އިތުރުވެފަ އެވެ.
ތަޖުރިބާކާރުން ބުނާ ގޮތުގަައި އެގޮތަށް ދިމާވަނީ އިންސާނުން ރަށްފުށުގެ ދިރިއުޅުން ދޫކޮށް، ޒަމާނީ ވަސީލަތްތައް ބިނާ ކުރަން ފެށުމުން، ޖަނަވާރުތަކުގެ ގުދުރަތީ މާހަައުލު ނެތިގެން ދާތީ ކަމަށެވެ.
ގުދުރަތީ މާހައުލު ނެތިގެން ދިޔުމުން، ކާބޯތަކެއްޗާއި ހިޔާވަހިކަން ހޯދަން ވަލު ޖަނަވާރުތައް އަވަށްތަކުގެ ތެރެއަށް ވަނުން އިތުރު ވަނީ ކަމަށް ތަޖުރިބާކާރުން ބުނެ އެވެ.
