ޕާކިސްތާނުގެ އެންމެ ބޮޑު ފެންގަނޑު ފުރިގެން ބަންޑުންވެދާނެތީ އޮފިޝަލުން ފިޔަވަޅު އަޅަން ފަށައިފި އެވެ.
މަަންޗަރް ލޭކް އޮންނަނީ ސިންދް ޕްރޮވިންސްގަ އެވެ. ޕާކިސްތާނަށް ކުރަމުންދާ ވިއްސާރައިގައި އެ ފެންގަނޑު ވަނީ ނުރައްކާތެރި މިންވަރަށް ފުރިފަ އެވެ.
މިހާތަނަށް އެ ފެންގަނޑު ތިން ފަހަރު ބަންޑުންވެފައިވާ އިރު، އޭގެ ސަބަބުން 100،000 އަށް ވުރެ ގިނަ މީހުން ހާލުގައި ޖެހިފައިވެ އެވެ.
އެހެން ނަމަވެސް، އަދިވެސް ފެންގަނޑު އިތުރަށް ބަންޑުންވުމުގެ ފުރުސަތު އޮތުމުން ރެސްކިއު ޓީމްތަކުން ދަނީ އެ ސަރަހައްދުން މީހުން އިވެކުއޭޓް ކުރަމުންނެވެ.
ޕާކިސްތާނަށް ކުރަމުންދާ ވިއްސާރައިގައި ފެންބޮޑުވުމުގެ އަސަރު 33 މިލިއަން މީހުންނަށް ވަނީ ކޮށްފަ އެވެ. މިހާތަނށް 1،314 މީހުން މަރުވެފައިވާ އިރު، އޭގެ ތެރޭގައި 458 ކުޑަކުދިން ހިމެނެ އެވެ.
ސަރުކާރުން ލަފާކުރަނީ ލިބިފައިވާ ގެއްލުން 10 ބިލިއަން ޑޮލަރަށް އަރާނެ ކަމަށެވެ.
ޕާކިސްތާނުގެ ކާބޯތަކެތީގެ ސަޕްލައިގެ 50 ޕަސެންޓް އުފައްދަނީ ސިންދް ޕްރޮވިންސުންނެވެ. އެންމެ ބޮޑަށް އަސަރުކޮށްފައި ވަނީ އެ ޕްރޮވިންސަށް ކަމަށް ވާތީ ކާބޯތަކެތީގެ ކާރިސާއެއް އުފެދުމުގެ ބިރު އެބަ އޮތެވެ.
