އިންޑިއާގެ ކެރަލާ ސްޓޭޓުގައި ވަގު ކުއްތާއެއް ދަތް އަޅައިގެން ފަރުވާ ކުރަނިކޮށް 12 އަހަރުގެ އަންހެން ކުއްޖަކު މަރުވުމުން މައްސަލަ ބޮޑުވެއްޖެ އެވެ.
އަބިރާމީގެ ގައިގައި ކުއްތާއެއް ދަތް އެޅީ އޯގަސްޓް މަހު އެވެ. އޭނާ ހޮސްޕިޓަލުގައި މަރުވީ ހޯމަަ ދުވަހު އެވެ. އެއީ މި އަހަރު ކެރަލާގައި ކުއްތާ ދަތް އެޅުމުން، ރޭބީޒްއަަށް ފަރުވާ ކުރަނިކޮށް ރިޕޯޓު ކުރި 21 ވަނަ މަރެވެ.
ރިޕޯޓުތައް ބުނާ ގޮތުން ރޭބީޒްއާ ދެކޮޅަށް ވެކްސިންގެ ތިން ޑޯޒް ޖަހައި، ހަތަރު ވަނަ ޑޯޒް ޖެހުމަށް އެ ކުއްޖާ ދިޔައީ ތައްޔާރުވަމުންނެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ ރޭބީޒްއަކީ އިންޑިއާގައި އެންޑެމިކް ނުވަތަ ދޭތެރެ ދޭތެރެއިން ފެންނަ އިންފެކްޝަނެއް ކަމަށެވެ.
މުޅި ދުނިޔޭގައި ރޭބީޒް ޖެހިގެން މަރުވާ މީހުންގެ 36 ޕަސެންޓް ނިސްބަތް ވަނީ އިންޑިއާ އަށެވެ. އެއީ ރޭބީޒް ޖެހިފައި ހުރި ޖަނަވާރެއް ދަތް އެޅުމުން ކުރިމަތިވާ ވައިރަލް އިންފެކްޝަނެކެވެ.
ރޭބީޒްގައި ސިކުނޑި އާއި މައިބަދަ ދުޅަވެ ވަރަށް އަވަހަށް މީހާގެ ހާލު ގޯސްވެ، މަރުވާން މަގުފަހިވެ އެވެ.
ޑަބްލިއުއެޗްއޯއިން ބުނީ ކޮންމެ އަހަރަކު ވެސް އިންޑިއާާގައި ރޭބީޒް ޖެހިގެން 18،000 އާއި 20،000 އާ ދެމެދުގެ އަދަދަކަށް މީހުން މަރުވާ ކަމަށެވެ.
އެހެން ނަމަވެސް ޖަނަވާރުތަކުގެ ހައްގަށް މަސައްކަތް ކުރާ އެކްޓިވިސްޓުން ބުނީ ޑަބްލިއުއެޗްއޯ އާއި އިންޑިއާާ ސަރުކާރުގެ ތަފާސްހިސާބު ވަރަށް ބޮޑަށް ތަފާތު ކަމަށެވެ.
ވަގު ކުއްތާ ނުވިހާ ގޮތް ހެދުމާއި އެއަށް ކާން ދީ ހެދުމުގެ މައްސަލައިގައި އިންޑިއާގައި ހިޔާލު ތަފާތުވުން ވަރަށް ބޮޑެވެ.
އޯގަސްޓް މަހު އިންޑިއާގެ މިނިސްޓަރަކު ޕާލިމެންޓުގައި ވިދާޅުވީ 15.3 މިލިއަން ވަގު ކުއްތާ އެ ގައުމުގައި އުޅޭ ކަމަށެވެ. އެއީ 2017 އާ އަޅާ ބަލާއިރު 10 ޕަސެންޓުގެ ވެއްޓުމެކެވެ.
ކެރަލާގައި 290،000 ވަގު ކުއްތާ އުޅޭ އިރު، މަގުތަކުގައި އުޅޭ ވަގު ކުއްތާ މަދު ކުރަން އެ ސްޓޭޓުގައި ގިނަ ކެމްޕެއިންތަކެއް ހިންގާފައިވެ އެވެ.
އެގޮތުން 2016 ގައި ކުއްތާ ދަތް އެޅުން އިތުރުވެ، ވަގު ކުއްތާ މެރުމަށް ހިންގި ކެމްޕެއިނަކާ ގުޅިގެން އެކްޓިވިސްޓުން ނުރުހުން ފާޅުކުރި އެވެ.
އެ ސްޓޭޓުގައި އަނެއްކާވެސް މި މަައްސަލަ ބޮޑުވެފަައިވާާ އިރު، ވަގު ކުއްތާއާ ދެކޮޅަށް ފިޔަަވަޅު އެޅުމުގެ ހުއްދައަށް އެދި އިންޑިއާ ސަަރުކާރުން ސުޕްރީމް ކޯޓަށް ވެއްދި މައްސަލައެއްގެ އަޑުއެހުން އަންނަ ހުކުރު ދުވަހު އޮންނާނެ އެވެ.
