ކެނެޑާގައި އާދީއްތަަ ދުވަަހު ވަޅިން ހަމަލާދީ 10 މީހުން މަރާލިކަމުގެ ތުހުމަތު ކުރެވޭ ދެބެއިންގެ ތެރެއިން އެކަކު މަރުވެފައި އޮއްވާ ފެނިއްޖެ އެވެ.
ކެނެޑާގެ ސަސްކަޗެވަން ޕްރޮވިންސްގައި ދިން ހަމަލާތަކުގައި 18 މީހުންނަށް އަނިޔާވި އެވެ. ތުހުމަތު ކުރެވެނީ ޑޭމިއެން ސެންޑާސަން އަދި މައިލްސް ސެންޑާސަން އަށެވެ.
އޭގެ ތެރެއިން އުމުރުން 31 އަހަރުގެ ޑޭމިއެން މަރުވެފައި އޮއްވާ ފެނުނު އިރު، އޭނާގެ ހަށިގަނޑުގައި ޒަހަމްތަކެއް ހުއްޓެވެ. ފުލުހުން ބުނީ އެއީ އޭނާ އަމިއްލައަށް ކުރި ޒަހަމްތަކެއް ކަަމަށް ނުބެލެވޭ ކަމަށެވެ.
އޭނާގެ ކޮއްކޮ އުމުރުން 30 އަހަރުގެ މައިލްސް ހޯދުމުގެ މަސަައްކަަތް ދަނީ ކުރަމުންނެވެ. ފުލުހުން ބުނީ މައިލްސްއަަކީ ނުރައްކާތެރި މީހެއް ކަމަށާއި ސަމާލުވެ ތިބުމަށް އިލްތިމާސް ކުރާ ކަމަށެވެ.
ހަމަލާތަކާ ގުޅިގެން އާއްމުކޮށް ސުލްހަވެރި ކެނެޑާއަށް ބިރުވެރިކަން ފެތުރިފައިވާ އިރު، ހަމަލާތައް ދިން ތަފާތު 13 ސަރަހައްދެއްގައި ފުލުހުން ދަނީ ތަހުގީގު ހިންގަމުންނެވެ.
ހަމަލާ ދިން ސަބަބު ސާފެއް ނޫނެވެ. ހައްޔަރު ކުރުމުގެ ކުރިން ވެސް އެ މީހުންނާ ދެކޮޅަށް ވަނީ ގަސްދުގައި މީހުން މެރުމުގެ ދައުވާ އުފުލާފަ އެވެ.
ޑޭމިއެން މަރުވެފައި އޮއްވާ ފެނުނު އިރު، ފިލައިގެން އުޅޭ މައިލްސްއަށް ވެސް ޒަހަމްތަކެއް ލިބިފައިވުން އެކަށީގެންވާ ކަމަށް ފުލުހުން ބުނެ އެވެ.
މައިލްސްއަކީ ތަފާތު އެކި ކުށުގެ ދިގު ރިކޯޑެއް އޮތް މީހެއް ކަމަށާއި އޭނާއަކީ އަހަރުތަކެއް ވަންދެން ތަކުރާރުކޮށް ކުށް ކުރަމުން ގޮސްފައިވާ މީހެއް ކަމަށް ފުލުހުން ބުންޏެވެ.
