އިނގިރޭސިވިލާތުގެ ބޮޑު ވަޒީރު ބޮރިސް ޖޯންސަންގެ ބަދަލުގައި ކޮންޒަވޭޓިވް ޕާޓީގެ ފަރާތުން އެ މަގާމު ފުރުއްވާނެ ބޭފުޅަކު ކަނޑައެޅުމަށް ޕާޓީ ތެރޭގައި ނެގި ވޯޓުން ކުރި ހޯއްދެވީ ލިޒް ޓްރަސް އެވެ.
ޓްރަސްއަކީ ޖޯންސަން ފަދައިން ނޫސްތަކުގެ ސުރުހީއަށް ގިނައިން އަރާ ސިޔާސީ ބޭފުޅެއް ނޫނެވެ. އަދި ޖޯންސަންގެ ބަދަލުގައި ބޮޑު ވަޒީރު ކަމަށް ޓްރަސް ގެނައުމަކީ ޕާޓީގެ ފުރަތަމަ ޗޮއިސްއެއް ވެސް ނޫނެވެ.
ނަމަވެސް ޓްރަސް ވައުދުވެވަޑައިގެންނެވީ ޕާޓީގެ އެންމެ އަސާސީ ސިފަތަކަށް އެނބުރި ދިޔުމަށެވެ. އޭގެ ތެރޭގައި ޓެކްސް ކުޑަ ކުރުން ފަދަ ކަންކަން ހިމެނޭ އިރު، އެއީ ތާއީދު ބޮޑު ކަންކަމެވެ.
އެހެން މިނިސްޓަރުން ޖޯންސަންގެ ސަރުކާރާ ދުރަށް ޖެހެމުން ދިޔަ އިރު ފޮރިން ސެކެޓްރީގެ މަގާމުގައި ޓްރަސް ވަފާތެރިކަމާ އެކު ދެމިހުންނެވުމަކީ އެކަމަނާއަށް ތާއީދު ބޮޑުވި އެއް ސަބަބެވެ.
ކޮންޒަވޭޓިވް ޕާޓީގެ ގްރާސްރޫޓުން ދެކޭ ގޮތުގައި ޓްރަސްއަކީ ކުރީގެ ބޮޑު ވަޒީރު މާގަރެޓް ތެޗާ ފަދަ ހަރުދަނާ ސިފަތަކެއް ހުރި ވަރުގަދަ ޝަހުސިއްޔަތަކަަށްވުމުގެ ފުރުސަތު އޮތް ބޭފުޅެކެވެ.
އުމުރުން 47 އަހަރުގެ ޓްރަސް އުފަންވީ އޮކްސްފޯޑަށެވެ. އޭނާ ދިރިއުޅުއްވަނީ ލަންޑަން އަދި ނޯފޯކްގަ އެވެ. ތައުލީމް ހާސިލްކުރެއްވީ ލީޑްސްގެ ރައުންޑްހޭ ސްކޫލާއި އޮކްސްފޯޑް ޔުނިވާސިޓީއިންނެވެ.
ޓްރަސް ފިރިކަލުންނާ އެކު.
ޓްރަސްގެ ފިރިކަަލުންނަކީ ހިޔު އޯލިއަރީ ނަމަކަށް ކިޔާ އެކައުންޓެންޓެކެވެ. އެ ދެމަފިރިންނަށް ދެ އަންހެން ދަރިން ތިބެ އެވެ. އެއީ ފުރާވަރު އުމުރުގެ ދެ ކުދިންނެވެ.
ޓްރަސްއަކީ ވަރަށް ހިޔާލު ވަރުގަދަ ބޭފުޅެއް. ބޭނުންވާ ކަމެއް އެނގޭ ބޭފުޅެއް،" އޭނާގެ ބޭބެ ފްރާންސިސް 2017 ވަނަ އަހަރު ބީބީސީ ރޭޑިއޯ 4 އަށް ދެއްވި އިންޓަވިއުގައި ވިދާޅުވި އެވެ.
"އުމުރުން 18، 19 އަހަރުގެ އެހެން ކުދިންނަށް ވުރެ މާ ހަރުދަނާކޮށް ހެދުން އަޅައިގެން ހުންނެވީ. އެހެން ކުދިންނަށް ވުރެ މާ ބޮޑަށް ވެސް ވިސްނުން ތޫނު،" ސިޔާސީ އެއްވުމަކުން ޓްރަސްއާ ބައްދަލުވި މައުރީޒިއޯ ޖިއުލިއާނޯ ވިދާޅުވި އެވެ.
ޓްރަސް ވިދާޅުވެފައި ވަނީ އެކަމަނާގެ ބައްޕައަކީ ހިސާބު އިލްމުގެ ޕްރޮފެސަރެއް ކަމަށެވެ. އަދި މަންމައަކީ ނަރުހެއް ކަމަށެވެ. އެއީ ވައަތު ފިޔައިގެ ސިޔާސީ ވިސްނުން ގެންގުޅުއްވި އާއިލާއެކެވެ.
ބޭބެ ފްރާންސިސް ވިދާޅުވެފައި ވަނީ، އެ އާއިލާގެ ތެރޭގައި ސިޔާސީ ބަހުސްތައް ކުރުމަކީ ވަރަށް އާއްމު ކަމެއް ކަމަށާއި، ބޮޑުވަމުން އައި އިރު ވެސް ޓްރަސް ސިޔާސީ ދާއިރާއަށް ވަންނާނެ ކަމަށް ބެލެވުނު ކަމަށެވެ.
ޓްރަސް އާއިލާއާ އެކު ސިޔާސީ އެއްވުމެއްގައި.
ޓްރަސް ޅަ އުމުރުގައި މަންމައާ އެކު ނިޔުކްލިއާ ހަތިޔާރާ ދެކޮޅު އެއްވުންތަކަށް ގެންދިޔަ އެވެ. އެ އެއްވުންތަކަކީ އޭރު ބޮޑު ވަޒީރު މާގަރެޓް ތެޗާއާ ދެކޮޅު އެއްވުންތަކެކެވެ.
މިހާާރު ޓްރަސްއަަކީ ކޮންޒަވޭޓިވް ޕާޓީގެ ފަހުރުވެރި މެމްބަރެއް ނަމަވެސް، ކުރިން އެކަމަނާއަކީ ލިބަރަލް ވިސްނުން ގެންގުޅުއްވި ބޭފުޅެކެވެ.
އޮކްސްފޯޑް ޔުނިވާސިޓީގައި ހޭދަކުރެއްވި ދުވަސްވަރު ޓްރަސް ވަނީ ގިނަ ކެމްޕެއިންތަކުގައި މަސައްކަތް ކުރައްވާފަ އެވެ. އަދި ސިޔާސީ ކަންކަމަށް ވަގުތު ހޭދަކުރައްވައި، ޔުނިވާސިޓީގެ ލިބަރަލް ޑިމޮކްރެޓުންގެ ރައީސްކަމަށް ވަޑައިގެންނެވި އެވެ.
ލިބަރަލް ޑިމޮކްރެޓް ޕާޓީގެ 1994 ވަނަ އަހަރުގެ ކޮންފެރެންސްގައި ޓްރަސް ވާހަކަ ދެއްކެވީ އިނގިރޭސިވިލާތުގައި އޮންނަ ވާރުތަވާ ޝާހީ ވެރިކަމާ ދެކޮޅަށެވެ.
އަޅުގަނޑުމެން ލިބަރަލް ޑިމޮކްރެޓުން ގަބޫލުކުރަނީ އެންމެންނަށް ހަމަހަމަ ފުރުސަތު އޮންނަަން ޖެހޭނެ ކަމަށް. ވަކި ބަޔަކު އުފަންވަނީ ވެރިކަން ކުރަން ކަމަށް އަޅުގަނޑުމެން ގަބޫލެއް ނުކުރަން،" އެކަމަނާ އޭރު ވިދާޅުވި އެވެ.
އޭގެ އިތުރުން ބައެއް ގައުމުތަަކުގައި މިހާރު ހުއްދަކޮށްފައިވާ މަސްތުވާތަކެތީގެ ބާވަތެއް ކަމުގައިވާ ކެނެބިސް އިނގިރޭސިވިލާތުގައި ހުއްދަ ކުރަން ވެސް ޓްރަސް ކެމްޕެއިން ކުރެއްވި އެވެ.
ލިބެރަލް ޑިމޮކްރެޓިކް ވިސްނުން ދޫކުރައްވައި ކޮންޒަވޭޓިވް ޕާޓީއާ ދިމާލަށް ޓްރަސް މިސްރާބް ފެއްޓެވީ އޮކްސްފޯޑް ޔުނިވާސިޓީގެ ދުވަަސްތައް ނިމެން ގާތްވެފައި ވަނިކޮށެވެ.
ޓްރަސް އެންމެ ފުރަތަމަ ގެންގުޅުއްވީ ލިބަރަލް ޑިމޮކްރެޓް ވިސްނުން.
އެ ނިންމުމުގެ ސަބަބުން ބައެއް މީހުންނަށް ހައިރާންކަން ލިބުނު ނަމަވެސް، އެނެލިސްޓުން ބުނާ ގޮތުގައި އެއީ ސިޔާސީ ދާއިރާގައި އެންމެ ފަސޭހައިން ކުރިއަށް ދެވޭނެ ގޮތް ހިޔާރު ކުރުމަށް ޓްރަސް ނިންމެވި ނިންމެވުމެކެވެ.
ކޮންޒަވޭޓިވް ޕާޓީގެ ތެރޭގައި ބޮޑު ވަޒީރު ހޮވުމަށް ކުރި ކެމްޕެއިންގައި ޓްރަސްއަަށް ކުރިމަތިވެވަޑައިގެންނެވި އެންމެ ބޮޑު ގޮންޖެހުމަކީ ވެސް ކުރިން ގެންގުޅުއްވި ސިޔާސީ ވިސްނުންފުޅެވެ.
"އަޅުގަނޑުމެން އެންމެންނަށް ވެސް ގޯސް ހެދޭނެ. ޅަ އުމުރުގައި އަޅުގަނޑުމެން އެންމެން ވެސް ގޯސް ހެދިން،" އެކަމަށް ރައްދު ދެއްވަމުން ޓްރަސް ވިދާޅުވި އެވެ.
އެކަމަނާ ވިދާޅުވީ ކޮންޒަަވޭޓިވް ޕާޓީއާ ގުޅުނީ ހިޔާލު އެއް ގޮތް އަދި އަމިއްލަ މިނިވަންކަމާއި މުސްތަބަލް ރޭވުމުގެ ވިސްނުން އެއް ގޮތް ބަޔަކާ ދިމާވުމުން ކަމަށެވެ.
ޓްރަސް ވަނީ 2001 އަދި 2005 ގައު ކޮންޒަވޭޓިވް ޕާާޓީގެ ފަރާތުން އާއްމު އިންތިހާބުގައި މަޖިލީހަށް ވާދަކުރައްވައިފަ އެވެ. އެކަމަކު ދެ ފަހަރު ވެސް ކާމިޔާބެއް ނުވި އެވެ.
އެހެން ނަަމަވެސް 2006 ގައި ގްރީންވިޗްގެ ކައުންސިލަރަކަށް އިންތިހާބުވެވަޑައިގެންނެވި އެވެ. އޭގެ ފަހުން 2010 ގައި ސައުތު ވެސްޓް ނޯފޯކްގެ ގޮނޑި ހޯއްދެވި އެވެ.
އެކަމަނާ ވަނީ ބްރިޓޭނިއާ އަންޗެއިންޑްގެ ނަމުގައި ފޮތެއް ލިޔުއްވާފަ އެވެ. ޕާޓީގެ އިތުރު ހަތަރު މެމްބަަރުންނާ އެކު ލިޔުއްވި ފޮތުގައި ދައުލަތުގެ ކޮންޓްރޯލް ކުޑަކޮށް ފްރީ މާކެޓް ނުވަތަ މިނިވަން ވިޔަފާރިއަށް ފުރުސަތު ދީގެން ދުނިޔޭގައި އިނގިރޭސިވިލާތް ކުރިއެރުވުމަށް ވަކާލާތު ކުރި އެވެ.
އޭގެ ފަހުން 2012 ގައި އެޑިއުކޝން މިނިސްޓަރު ކަމަށް ވަޑައިގެން، 2014 ގައި އެންވާރަމަންޓް ސެކެޓްރީ ކަމަށް ޕްރޮމޯޓްވި އެވެ.
އިނގިރޭސިވިލާތް އީޔޫއިން ވަކިވުމުގެ ކަންތަަކުގައި ޓްރަސް ކެމްޕެއިން ކުރެއްވީ އީޔޫގައު ދެމި އޮތުމަށެވެ. ނަމަވެސް ރައްޔިތުންގެ ފެންނަ ނުފެންނަ ވޯޓުން އެ ވިސްނުމަށް ތާއީދު ނެތްކަން އެނގިވަޑަައިގެންނެވުމުން ފަޅި ބަދަލުކުރި އެވެ.
ޓްރަސް ކޮންޒަވޭޓިވް ޕާޓީގެ ބައްދަަލުވުމެއްގައި.
ތެރީސާ މޭގެ ބޮޑު ވަޒީރުކަމުގައި އިނގިރޭސި އެންމެ ފުރަތަމަ އަންހެން ލޯޑް ޗާންސެލަރު ކަމާއި ޖަސްޓިސް ސެކެޓްރީ ކަމަށް ވަޑައިގެންނެވި އެވެ.
އަދި 2019 ގައި ޖޯންސަންގެ ސަރުކާރު ފެށުމުން، ޓްރަަސް ހުންނެވީ އިންޓަނޭޝަނަލް ޓްރޭޑް ސެކެޓްރީ ކަމުގަ އެވެ. އޭގެ ފަހުން 2021 ގައި އެކަމަނާގެ އުމުރުން 46 އަހަރުގައި ފޮރިން ސެކެޓްރީ ކަމަށް ވަޑައިގެންނެވި އެވެ.
ޕާޓީގެ ލީޑަރު ކަމަށް ކުރި ކެމްޕެއިންގައި ޓްރަސް ވައުދުވެވަޑައިގެންނެވީ ދިރިއުޅުމުގެ ހަރަދު މަތިވާ މައްސަލައަށް އަވަސް ހައްލެއް ގެނައުމަށެވެ.
ކުރިއަަށް އޮތް އާއްމު އިންތިހާބުގައި ޓްރަސް އަދި ކޮންޒަވޭޓިވް ޕާޓީގެ ކުރިމަގު ބިނާވަނީ އެކަމަނާ ވައުދުވެވަޑައިގެންނެވި ގޮތަށް އަމަލު ކުރުމުގެ މައްޗަށެވެ.
