ސްރީލަންކާއަށް ކުރިމަތިވެފައިވާ މާލީ އަދި އިގްތިސާދީ ކާރިސާ ބަންގްލަދޭޝަށް ކުރިމަތިނުވާނެ ކަމަށް އެ ގައުމުގެ ބޮޑު ވަޒީރު ޝެއިހް ހަސީނާ ވިދާޅުވެއްޖެ އެވެ.
ބަންގްލަދޭޝްގެ ބޭރު ފައިސާގެ ރިޒާވް ވަރަށް ބޮޑަށް ދަށްވެ، ތަކެތި އިމްޕޯޓް ކުރުން ގޮންޖެހުމަކަށް ވެފައިވާ މި ދަނޑިވަޅުގައި ސަރުކާރުން ވަނީ އެކި އެޖެންސީތަކުގެ ލޯނަށް އެދިފަ އެވެ.
އިންޑިއާއަށް ކުރައްވަން ހަމަޖެހިފައިވާ ދަތުރުފުޅެއްގެ ކުރިން އޭއެންއައި ނޫހަށް ދެއްވި އިންޓަވިއުގައި ހަސީނާ ވިދާޅުވީ ބަންގްލަދޭޝްގެ އިގްތިސާދު އަދިވެސް ވަރަށް ވަރުގަދަ ކަމަށެވެ.
ބަންގްލަދޭޝްގެ 416 ބިލިއަން ޑޮލަރުގެ އިގްތިސާދަކީ ފަހަކަށް އަައިސް އެންމެ ބާރަށް ކުރިއަރަމުން އަންނަ އެއް އިގްތިސާދެވެ. އެކަމަކު އިމްޕޯޓަށް ފައިސާ ދައްކަން ޖެހި ޑޮލަރު ހުސްވުމުގެ ގޮންޖެހުން ވަރަށް ބޮޑަށް އެބަ އޮތެވެ.
އޭގެ ސަބަބުން ސަރުކާރުން ވަނީ އިންޓަނޭޝަނަލް މަނިޓަރީ ފަންޑް (އައިއެމްއެފް) އާއި އެހެން އެޖެންސީތަކުން ލޯނަށް އެދިފަ އެވެ.
"ބަންގްލަދޭޝުން އަބަދުވެސް ވާނީ ސުންގަޑި ހަމަވުމުގެ ކުރިން ދަރަނި އަދާކޮށްފައި. ސްރީލަންކާއާ އަޅާ ބަލާއިރު އަޅުގަނޑުމެންގެ ދަރަނީގެ ރޭޓް ވަރަށް ކުޑަ،" ހަސީނާ ވިދާޅުވި އެވެ.
"ބައެއް ފަރާތްތަކުން އެބަ ބުނޭ ބަންގްލަދޭޝަށް ވެސް ޖެހޭނީ ލަަންކާއަށް ޖެހުނު ހާލޭ. އެކަމަކު އަޅުގަނޑަށް ވަރަށް ޔަގީން އެކަން އެގޮތަށް ނުވާނެކަން."
އިގްތިސާދު ރަނގަޅަށް މެނޭޖް ނުކުރުމާއި ކޮވިޑާ ގުޅިގެން ފަތުރުވެރިކަން ފޮހެވިގެން ދިޔުމުން ސްރީލަންކާއަށް ކުރިމަތިވެފައިވާ ކާރިސާއިން އަރައިގަންނަން އައިއެމްއެފްއިން 2.9 ބިލިއަން ޑޮލަރުގެ ލޯނެއް ދޭން އެއްބަސްވީ މިދިޔަ ބުރާސްފަތި ދުވަހު އެވެ.
ޝެއިހް ހަސީނާ ހޯމަ ދުވަހު ފެއްޓެވި އިންޑިއާގެ ހަތަރު ދުވަހުގެ ދަތުރުފުޅުގައި ބޮޑު ވަޒީރު ނަރެންދްރަ މޯދީ އާއި އެހެން ލީޑަރުންނާ ބައްދަލުކުރައްވާނެ އެވެ.
