ކެނެޑާގައި ވަޅިން ހަމަލާދީ 10 މީހުން މަރާލި ކަމަށް ތުހުމަތު ކުރެވޭ ދެ މީހުން ހޯދުމަށް ބޮޑު އޮޕަރޭޝަނެއް ކުރިއަށް އެބަގެންދެ އެވެ.
ތުހުމަތު ކުރެވެނީ ޑޭމިއެން ސެންޑާސަން އަދި މައިލްސް ސެންޑާސަން އަށެވެ. އެ މީހުންގެ އަތުގައި ހަތިޔާރު ހުރި ކަމަށް ބެލެވެ އެވެ.
އެ މީހުންގެ ޝިކާރައަކަަށްވި 10 މީހުން ފެނުނީ 13 ސަރަހައްދަކުންނެވެ. މިއީ ކެނެޑާގައި ހިންގި މިފަދަ އެންމެ ބޮޑު އެއް އަނިޔާވެރި އަމަލެވެ.
ވަޅީގެ ހަމަލާތަަކުގައި އިތުރު 15 މީހުންނަށް އަނިޔާވެފައިވާ އިރު، ފުލުހުން އެދިފައި ވަނީ އޮޕަރޭޝަން ކުރިއަށްގެންދާ އިރު އާއްމުން ސަމާލުވެ ތިބުމަށެވެ.
ބޮޑު ވަޒީރު ޖަސްޓިން ޓްރޫޑޯ ވިދާޅުވީ ހަމަލާތަކާ ގުޅިގެން ހިތާމަ ކުރާ ކަަމަށާއި އެކަމުގެ ޒިންމާ އުފުލަން ޖެހޭ މީހުން އިންސާފުގެ ކުރި މައްޗަށް ގެންނާނެ ކަމަށެވެ.
ތުހުމަތު ކުރެވޭ ދެ މީހުން އެންމެ ފަހުން ފެނުނީ އާދީއްތަ ދުވަހުގެ މެންދުރު އެވެ. އެ މީހުން ދަތުރު ކުރަނީ ކަޅު ކުލައިގެ ނިސާން ރޯގް ކާރެއްގައި ކަމަށް ބެލެވެ އެވެ.
ތުހުމަތު ކުރެވޭ ދެ މީހުން.
އުމުރުން 31 އަހަރުގެ ޑޭމިއެން ސެންޑާސަން އާއި 30 އަހަރުގެ މައިލްސް ސެންޑާސަންއާ ގުޅޭ ތަފްސީލެއް ފުލުހުން ނުދެ އެވެ.
ހަމަލާ ދިން ކަމަށް ބެލެވޭ ސަބަބާ ގުޅޭ ގޮތުން ވެސް ވަކި އެއްޗެއް ފުލުހުން ނުބުނެ އެވެ. އެކަމަކު މިއީ މަސްތުވާތަކެއްޗާ ގުޅުން ހުރި ކަމެއް ކަމަށް ބެލެވެ އެވެ.
