މެންޗެސްޓާ (ސެޕްޓެމްބަރު 4) - އިނގިރޭސި ޕްރިމިއާ ލީގުގައި މިރޭ 3-1 އިން މެންޗެސްޓާ ޔުނައިޓަޑް އަތުން ބަލިވެ، މި ސީޒަންގައި އާސެނަލް އިން ދަމަހައްޓަމުން އައި މޮޅުވުމުގެ ރެކޯޑަށް ނިމުން އަތުވެއްޖެ އެވެ.
ޔުނައިޓަޑްގެ ދަނޑުގައި މިރޭ ކުޅުނު މެޗަށް ނުކުތުމުގެ ކުރިން އާސެނަލް ވަނީ މި ސީޒަންގައި ލީގުގައި މިހާތަނަށް ކުޅުނު ފަސް މެޗުން ވެސް މޮޅުވެފަ އެވެ. އާސެނަލްގެ މައްޗަށް މިރޭ ހޯދި މޮޅާއެކު، ޔުނައިޓަޑްް ވަނީ ލީގުގައި ޖެހިޖެހިގެން ހަތަރު މޮޅު ހަމަކޮށްފަ އެވެ.
މިރޭ ބަލިވި ނަމަވެސް އާސެނަލް އޮތީ ލީގުގެ އެއް ވަނައިގަ އެވެ. އެއީ ހަ މެޗުން 15 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ސިޓީ އާއި ތިން ވަނައިގައި އޮތް ޓޮޓެންހަމަށް ވެސް ހަ މެޗުން ވަނީ 14 ޕޮއިންޓް ލިބިފަ އެވެ. ހަަތަރު ވަނައިގައި އޮތް ބްރައިޓަން އަށް ހަ މެޗުން 13 ޕޮއިންޓް ލިބިފައިވާއިރު، ޔުނައިޓެޑް މިރޭގެ މޮޅާ އެކު ފަސް ވަނައިގައި އޮތީ 12 ޕޮއިންޓް ހޯދައިގެންނެވެ.
އާސެނަލުން މިރޭ ގަބްރިއެލް މާޓިނެލީގެ ގޯލުން ލީޑުނެގި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ އެ ގޯލު ބަލައިނުގަންނާށެވެ. އެއީ އެ އެޓޭކް ފެށިއިރު، އާސެނަލްގެ ކެޕްޓަން މާޓިން އޮޑެގާޑް ޔުނައިޓެޑްގެ ކްރިސްޓިއަން އެރިކްސަން އަށް ފައުލުކޮށްފައިވާތީ އެވެ.
ޔުނައިޓެޑްގެ ރަޝްފޯޑް (ކ) އާސެނަލް ގޯލަށް ބޯޅަ ފޮނުވާލަނީ.--- ފޮޓޯ: އޭއެފްޕީ
މެޗުގެ 35 ވަނަ މިނިޓުގައި ޔުނައިޓަޑަށް ލީޑު ނަގައިދިނީ އެ ޓީމުގެ ޖޯޒީގައި ފުރަތަމަ ފަހަރަށް ކުޅެން ނުކުމެ ހުރި ބްރެޒިލްގެ ވިންގް، އެންތަނީ އެވެ. އަޔަކްސް އިން 94 މިލިއަން ޑޮލަރުގެ ޓްރާންސްފާ ފީއެއްގައި ޔުނައިޓަޑަށް މިދިޔަ ހަފުތާގައި ބަދަލުވި އެންތަނީ ވަނީ އޭރިޔާ ތެރެއިން ލިބުނު ބޯޅަ ގޯލުގެ ދުުރު ކަނަށް އަމާޒުކޮށްލައިފަ އެވެ.
މެޗުގެ ދެ ވަނަ ހާފު ފަށައިގެން، އާސެނަލް އިން ޔުނައިޓަޑް ފަހަތަށް ޖައްސާލައި، ގޯލު ޖެހުމަށް އިތުރު މަސައްކަތްތަކެއް ކުރި އެވެ. ނަތީޖާ އަކަށްވީ މެޗުގެ 60 ވަނަ މިނިޓުގައި ބުކާޔޯ ސާކާ ލަނޑެއް ޖަހައި، އާސެނަލް އަށް މެޗުގެ ނަތީޖާ ހަމަހަމަކޮށްދިނުމެވެ.
އެކަމަކު، އޭގެ ހަ މިނިޓުގައި ފަހުން، ކައުންޓާ އެޓޭކެއްގައި ބްރޫނޯ ފެނާންޑޭސް ތަނަވަސްކޮށްދިން ފުރުސަތުގެ ބޭނުން ހިފައި، ޔުނައިޓަޑްގެ ފޯވަޑް މާކަސް ރަޝްފޯޑް ވަނީ އެ ޓީމަށް ދެ ވަނަ ލަނޑެއް ކާމިޔާބުކޮށްދީފަ އެވެ.
މެޗުގެ 75 ވަނަ މިނިޓުގައި ޔުނައިޓަޑްގެ ތިން ވަނަ ލަނޑު ވެސް ކާމިޔާބުކޮށްދިނީ ރަޝްފޯޑެވެ. ކައުންޓާ އެޓޭކެެއްގައި ދެ ވަނަ ފަހަރަށް އާސެނަލްގެ ޑިފެންސް ފޫއަޅުވާލައި، ޔުނައިޓަޑް އިން އުފެއްދި ފުރުސަތުގައި ރަޝްފޯޑަށް މުޅިން ހުސްކޮށްލައިފައި އޭރިޔާ ތެރެއިން ގޯލު ޖެހުމަށް ޕާސް ދިނީ އެރިކްސަން އެވެ.
އިނގިރޭސި ޕްރިމިއާ ލީގުގައި މިއަދު ކުޅުނު ފުރަތަމަ މެޗުގައި ބްރައިޓަން ވަނީ ލެސްޓާ ސިޓީ އަތުން 5-2 އިން މޮޅުވެފަ އެވެ. މި ނަތީޖާއާ އެކު، ތާވަލްގެ ފުލުގައި އޮތް ލެސްޓާ ސިޓީގެ ކޯޗު ބްރެންޑަން ރޮޖާސް އަށް ވަނީ ޕްރެޝަރު ބޮޑުވެފަ އެވެ. -- އޭއެފްޕީ
