ޓާޓާ ކުންފުނީގެ ކުރީގެ ޗެއާމަން އަދި ބިލިއަނަރު ސައިރަސް މިސްޓްރީގެ މަރަކީ ވިޔަފާރި ދުނިޔެއަށް "ބޮޑު ގެއްލުމެއްގެ" ގޮތުގައި އިންޑިއާގެ ބޮޑު ވަޒީރު ނަރެންދްރަ މޯދީ ސިފަކުރައްވައިފި އެވެ.
ސައިރަސް މިސްޓްރީ މަރުވީ އާދީއްތަ ދުވަހު މުމްބާއީއަށް ދަތުރު ކުރަނިކޮށް ކާރު އެކްސިޑެންޓެއްގަ އެވެ.
ހުޅަނގު މަހަރާޝްތްރަ ސްޓޭޓުގެ ފުލުހުން ބުނީ ސައިރަސް މިސްޓްރީގެ އިތުރުން އެހެން މީހަކު ވެސް މަރުވި ކަމަށާއި ދެ މީހުންނަށް އަނިޔާވި ކަމަށެވެ.
މަރުވި އިރު އުމުރުން 54 އަހަރުގެ މިސްޓްރީ ޓާޓާގެ ޗެއާމަންކަމުން ވަކިކުރީ 2016 ވަނަ އަހަރު، އޭނާގެ ހިންގުންތެރިކަމެއް ނެތް ކަމަށް ބުނެ ފާޑުކިޔުން އަމާޒުވެފައި ވަނިކޮށެވެ.
މިސްޓްރީ ޗެއާމަންކަމަށް އައީ ރަތަން ޓާޓާ އެ މަގާމުން ވަކިކުރުމަށް ފަހުގަ އެވެ. ނަމަވެސް އޭގެ ހަތަރު ފަހުން މިސްޓްރީގެ ބަދަލުގައި އެ މަގާމަށް އަނެއްކާވެސް އައީ ރަތަން ޓާޓާ އެވެ.
ޓާޓާގެ ޗެއާމަންގެ މައްސަލަ އިންޑިއާގެ އެންމެ މަަތީ ކޯޓާ ހަމައަށް ގެންދިޔަ އެވެ. އެކަމަކު އެ ކޯޓުން ނިންމީ މިސްޓްރީއާ ދެކޮޅަށެވެ.
ޓާޓާއަކީ 100 އަށް ވުރެ ގިނަ ގައުމުގައި އޮޕަރޭޓް ކުރާ އިންޑިއާގެ އެންމެ ބޮޑު ކުންފުންޏެވެ. މިދިޔަ އަހަރު އެ ކުންފުންޏަށް 130 ބިލިއަން ޑޮލަރުގެ އާމްދަނީ ލިބުނެވެ.
ހޮނިހިރު ދުވަހު ކާރު އެކްސިޑެންޓުގައި މިސްޓްރީ މަރުވުމުން ބޮޑު ވަޒީރު މޯދީ ކުރެއްވި ޓްވީޓެއްގައި ވިދާޅުވީ މިސްޓްރީއަަކީ "އިންޑިއާގެ އިގްތިސާދީ ގާބިލްކަން ގަބޫލުކޮށްގެން ކުރިއަށް ދިޔަ ވިޔަފާރި ލީޑަރެއް" ކަމަށެވެ.
މަހަރާޝްތްރަ ސްޓޭޓުގެ ޑެޕިއުޓީ ޗީފް މިނިސްޓަރު ވަނީ އެ ހާދިސާ ހިނގައިދިޔަ ގޮތުގެ ތަހުގީގެއް ހިންގަން ފުލުހުންނަށް އަމުރުކޮށްފަ އެވެ.
ތަފާސްހިސާބުތަކުން ދައްކާ ގޮތުގައި އިންޑިއާގައި 2021 ވަނަ އަހަރު ހިނގި މަގުމަތީގެ އެކްސިޑެންޓުތަކުގައު 150،000 އަށް ވުރެ ގިނަ މީހުން މަރުވި އެވެ.
