މެންޗެސްޓާ (ސެޕްޓެމްބަރު 4) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑް ދަނޑުގައި އާސެނަލުން ކުޅެން ޖެހޭ މެޗަކީ މި ފަހަރު ލީގުގެ މިހާތަނަށް އެ ޓީމުން ހޯދަމުން އަންނަ ކާމިޔާބީތައް ވަޒަންކޮށްލަން ލިބޭ އިމްތިހާނެއް ގޮތަށް ނުދެކޭ ކަމަށް އާސެނަލް ކޯޗު މިކޭލް އާޓެޓާ ބުނެފި އެވެ.
ޕްރިމިއާ ލީގުގެ އެއް ވަނައިގައި އާސެނަލް އޮތީ ކުޅުނު ފަސް މެޗުން ވެސް މޮޅުވެގެންނެވެ. ލީގުގައި ޕޮއިންޓެއް ނުގެއްލި ސައްތަ އިން ސައްތަ ރެކޯޑެއް ދަމަހައްޓަމުން އަންނަ ހަމައެކަނި ޓީމު އާސެނަލަށް މިރޭ ޔުނައިޓެޑް ދަނޑުގައި މޮޅުވެވިއްޖެނަމަ އެއް ވަނައިގައި ހަތަރު ޕޮއިންޓަށް ލީޑުފުޅާކުރެވޭނެ އެވެ.
މި މެޗަކީ މި ފަހަރު ލީގުގައި އާސެނަލް ހޯދާފައިވާ ކުރިއެރުން ވަޒަންކުރެވޭނެ "ޓެސްޓެއް" ގޮތުގައި އިނގިރޭސި ފުޓްބޯޅަ ތަޖުރިބާކާރުން އަންނަނީ ސިފަ ކުރަމުންނެވެ. އެކަމަކު، އާޓެޓާ އެ ކަމަށް އެއްބަހެއް ނުވެ އެވެ.
"ޕްރިމިއާ ލީގުގައި ކޮންމެ ހަފްތާ އަކީ ވެސް ޓެސްޓެއް. ކޮންމެ ޓީމަކާ ދެކޮޅަށް ކުޅޭ މެޗަކީ ވެސް ޓެސްޓެއް. ކޮންމެ މެޗެއްގައި އެ ހުންނަން ޖެހޭ ސީރިއަސްކަން، އެ ސަމާލުވުމާ އެކީ މި މެޗު ވެސް ކުޅެން ޖެހޭނީ، ވަކި ޓީމެއް ވެގެން ތަފާތު ކަންތައްތަކެއް ނެތް،" އާޓެޓާ ބުންޏެވެ.
އެކާވީސް ވަނަ ގަރުނު ފެށިގެން އައިއިރު އިނގިރޭސި ޕްރިމިއާ ލީގުގައި އެންމެ ފޯރިގަދަ، ލީގުގެ ވާދަވެރިކަން ވެސް ބަރޯސާވެފައި އޮންނަ އެއް މެޗަކީ ޔުނައިޓެޑާއި އާސެނަލްގެ ކުރިމަތިލުންތަކެވެ. އެކަމަކު، ފަހަކަށް އައިސް ލީގުގެ ތަށްޓަށް ވާދަކުރާ ރޭހުގައި މި ދެ ޓީމުގެ ވާދަވެރިކަން ނުފެނެ އެވެ.
އާޓެޓާ ބުނީ ޔުނައިޓެޑާއި އާސެނަލްގެ މެޗުތައް އަބަދުވެސް ސަޕޯޓަރުންނަށް ހާއްސަވާނެ ކަމަށެވެ.
"އިނގިރޭސިވިލާތުގައި މި ދެ ޓީމުގެ ވާދަވެރިކަން އަބަދުވެސް ބޮޑުވާނެ. މީޑިއާ އިން މި މެޗުގެ ވާހަކަ ދައްކާ މިންވަރު ވެސް ބޮޑުވާނެ. އަހަރެމެން ކުޑައިރު ޓީވީން ބެލި މި ދެ ޓީމުގެ މެޗުތައް ދިޔައީ ފުޓްބޯޅައިގެ އެންމެ ފޯރިގަދަ ކުރިމަތިލުންތައް ދާ ގޮތަށް،" ކުރިން އާސެނަލްގެ ކެޕްޓަންކަން ވެސް ކުރި އާޓެޓާ ބުންޏެވެ.
މި ފަހަރުގެ ޓްރާންސްފާ މާކެޓްގައި މެންޗެސްޓާ ޔުނައިޓެޑުން އާ ކޯޗު އެރިކް ޓެން ހާގްގެ އިރުޝާދުގެ ދަށުން ޓީމެއް ބިނާކުރަން ބޮޑު ހަރަދުތަކެއް ކޮށްފައިވާއިރު، އާޓެޓާ ބުނީ ޔުނައިޓެޑްގެ މުއްސަނދި ތާރީހަކީ އެ ޓީމު ކުރިން އޮތް ހިސާބަށް ދިއުމަށް އޮތް އެންމެ ބޮޑު ހިތްވަރު ކަމަށެވެ.
އެހެން ކަމުން، ޔުނައިޓެޑް އަލުން ބޭނުންވާ މަގާމަށް ދާން ކުރާ މަސައްކަތުގައި ބޮޑެތި މެޗުތަކުން މޮޅުވެ، އިތުބާރު ހޯދަން ހުރިހާ ގޮތަކުން ބަލާނެ ކަމަށް އާޓެޓާ ގަބޫލުކުރެ އެވެ.
އާސެނަލާއި ޔުނައިޓެޑް އެންމެ ފަހުން ކުޅުނު އަށް މެޗުގެ ތެރެއިން ޔުނައިޓެޑް މޮޅުވި ހަމައެކަނި މެޗަކީ އެންމެ ފަހުން އެ ޓީމުގެ ދަނޑުގައި ކުޅުނު މެޗެވެ. އާސެނަލުން ޔުނައިޓެޑް ދަނޑުގައި ޕްރިމިއާ ލީގުގައި އެންމެ ފަހުން ކުޅުނު 15 މެޗުގެ ތެރެއިން މޮޅެއް ހޯދީ އެންމެ ފަހަރަކު އެވެ. އެއީ 2020 ވަނަ އަހަރުގެ ނޮވެމްބަރު މަހު ކުޅުނު މެޗުގައި 1-0 އިންނެވެ.
ޔުނައިޓެޑްގެ އޯލްޑް ޓްރެފޯޑްގައި މިރޭ އާސެނަލާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 20:30 ގަ އެވެ.
