ޕާކިސްތާނުގައި ފެންބޮޑުވެ މަރުވި މީހުންގެ އަދަދު 1،200 އަށް މަތިވެފައިވާ އިރު، ސާފު ބޯފެން ނުލިބުމުގެ ސަބަބުން ބަލިތައް ފެތުރުން އިތުރުވެއްޖެ ކަމަށް ހިލޭ ސާބަހަށް މަސައްކަތް ކުރާ ފަރާތްތަކުން ބުނެފި އެވެ.
ޑޮކްޓާޒް ވިތައުޓް ބޯޑާޒް ޖަމިއްޔާއިން ބުނީ ބޯހިޔާވަހިކަމާއި ކާބޯތަކެތި ހޯދަން އުޅޭ ހާލުގައި ޖެހިފައިވާ މީހުންނަށް ސާފު ބޯފެން ނުލިބުމުގެ މައްސަލަ ވަރަށް ބޮޑު ކަމަށެވެ.
ޕާކިސްތާނުގެ ތިންބަައި ކޮށްފައި އެއްބަައި ފެނު އަޑީގައި އޮތް އިރު، ހާލަތު ވަޒަން ކުރުމަށް ސަަރުކާރުގެ ހާއްސަ ބައްދަލުވުމެއް ހޮނިހިރު ދުވަހު އޮތެވެ.
ފެންބޮޑުވުމުގެ އަސަރުކޮށްފައިވާ ކޮންމެ ތިން މީހުންގެ ތެރެއިން އެކަކީ ކުޑަކުއްޖެއް ކަމަށް ރިޕޯޓުތައް ބުނެ އެވެ.
ޔުނިސެފުން ބުނީ ސާފު ބޯފެން ނުލިބުމުގެ ސަބަބުން އިތުރު ކުދިން މަރުވުމުގެ ނުރައްކާ ވަރަށް ބޮޑު ކަމަށެވެ. އެގޮތުން ބޭރަށް ހިންގުމާއި، ކޮލެރާ އަދި ޑެންގޫ އާއި މެލޭރިއާ ބާރު ދުވެލީގައި ފެތުރުމުގެ ފުރުސަތު އެބަ އޮތެވެ.
މިނިސްޓަރު އަހްސަން އިގްބާލް ވިދާޅުވީ މި ކާރިސާއާ ކުރިމަތިލުމަށް ބޭނުންވާ ވަސީލަތްތައް ނެތް ކަމަށާއި މިއީ ފަހުގެ ތާރީހުގައި މޫސުމީ ބަދަލާ ހެދި ކުރިމަތިވި އެންމެ ބޮޑު ފެންބޮޑުވުމުގެ ކާރިސާ ކަމަށެވެ.
ގާތްގަނޑަކަށް 1.4 މިލިއަން ގެ ބިމާ ހަމަަވެފައިވާ އިރު، ފެންބޮޑުވުމުގެ އަސަރު 33 މިލިއަން މީހުންނަށް ކޮށްފައިވެ އެވެ.
