ހޮލީވުޑްގެ ތަރި ޖޭން ފޮންޑާ ކެންސަރަށް ޑަޔަގްނޯޒް ކުރުމުން ކީމޯތެރަޕީ ފަރުވާ ފަށާފައިވާ ކަމަށް ބުނެފި އެވެ.
އިންސްޓަގްރާމްގައި 1.9 މިލިއަން ފޮލޯވަރުންނަށް ކުރި ޕޯސްޓުގައި އުމުރުން 84 އަހަރުގެ ޖޭން ބުނީ އޭނާއަށް ޖެހުނީ ނަން ހޮޖްކިންސް ލިމްފޯމާ ކަމަށެވެ.
އޭނާ ބުނީ އެއީ ފަރުވާ ކުރެވޭ ބާވަތުގެ ކެންސަރެއް ކަމަށާއި އެހެންވެ ހިތްހަމަޖެހޭ ކަމަށެވެ.
ޖޭންގެ ޕޯސްޓުގައި ވަނީ އެމެރިކާގެ ސިއްހީ ނިޒާމުގެ ހާލަތު އޮތް ގޮތާ ގުޅޭ ކަންބޮޑުވުން ފާޅުކޮށްފަ އެވެ. އަދި މޫސުމީ ބަދަލާ ގުޅޭ ހޭލުންތެރިކަން އިތުރު ކުރުމުގެ މަސައްކަތުގައި ދެމިހުންނާނެ ކަމަށް ބުންޏެވެ.
"އަހަރެންގެ ނަސީބު ރަނގަޅުކަމުން އިންޝުއަރެންސް އެބަހުރި. އެންމެ ރަނގަޅު ޑޮކްޓަރުންނާއި އެންމެ ރަނގަޅު ފަރުވާއާ ހަމައަށް ދެވެން އެބަ އޮތް،" ގިނަ މީހުންނަށް އެ ފުރުސަތު ނެތްކަން ފާހަގަކޮށް ޖޭން ބުންޏެވެ.
"އެމެރިކާގެ ހުރިހާ އާއިލާއަަކަަށް ވެސް ކެންސަރުގެ ހަނގުރާމައާ ކުރިމަތިވޭ. އޭގެ ތެރެއިން ގިނަ އާއިލާތަކަށް ރަނގަޅު ސިއްހީ ހިދުމަތް ނުލިބޭ."
ނަން ހޮޖްކިންސް ލިމްފޯމާއަކީ ވަރަށް މަދުން ފެންނަ ކެންސަރުގެ ބާވަތެކެވެ. އޭގެ އަސަރު ކުރަނީ ލޭނާރުތަކަށް ނުވަތަ ހަޑިގަނޑުގެ ލިމްފެޓިކް ނިޒާމަށެވެ.
ޖޭން ބުނީ ހަ މަހުގެ ކީމޯތެރަޕީ ފަރުވާ ފެށި ނަމަވެސް، އޭނާގެ "ކްލައިމެޓް އެކްޓިވިޒަމް" މަސައްކަތް ނުހުއްޓޭނެ ކަމަށެވެ.
އޮސްކާ އެވޯޑް ހާސިލްކޮށްފައިވާ ޖޭން ފިލްމީ ކެރިއަރު ފެށީ 1960 ގަ އެވެ. އޭނާ އެންމެ ފަހުން ފެނުނީ ނެޓްފްލިކްސްގެ ކޮމެޑީ ސީރީޒް "ގްރޭސް އެންޑް ފްރޭންކީ" އިންނެވެ.
