ޕޯސްޓުގެ ޒަރިއްޔާއިން އެތެރެކުރަން އުޅުނު މަސްތުވާތަކެތީގެ ދެ ބާވަތެއް ކަސްޓަމްސްއިން އަތުލައިގެންފި އެވެ.
ކަސްޓަމުން މައުލޫމާތު ދީފައިވާ ގޮތުގައި އަތުލައިގަތް މަސްތުވާތަކެތީގެ ވަގުތީ ބަރުދަނުގައި 1.6 ކިލޯ ހުއްޓެވެ.
ޖަރުމަނުން އައި މި ޕާރުސަލް ކަސްޓަމުން ކަނޑާ ބެލިއިރު އޭގެ ތެރެއިން ފެނުނު ހަތަރު ޕެކެޓުގެ ތެރެއިން ދެ ޕެކެޓުގައި ހުރީ ބާރުގަދަ ޑްރަގެއް ކަމުގައިވާ ކެޓަމިން އެވެ. މި ބާވަތުގެ ކިލޯއެއް ފެނުނެވެ. ދެން އަތުލައިގަތް ދެ ޕާރުސަލްގެ ތެރޭގައި ހުރީ ކޮކެއިން އެވެ.
ކަސްޓަމުން ބުނީ މިތަކެތީގެ މަގުމަތީ އަގު ފަސް މިލިއަން ރުފިޔާއަށް އަރާ ކަަމަށެވެ.
މި މައްސަލައިގައި އެކަކު ވަނީ ހައްޔަރުކޮށްފަ އެވެ. އެނގިފައިވާ ގޮތުގައި ހައްޔަރުކުރީ އެ ޕާރުސަލް ބަލާ ދިޔަ 23 އަހަރުގެ އަންހެނެކެވެ. ކްރިމިނަލް ކޯޓުން ވަނީ އޭނާގެ މައްޗަށް މި މައްސަލައިގައި ތުހުމަތުކުރެވޭ ވަރަށް ކާފީ ހެކި ލިބިފައިވާތި ތަހުގީގަށް ފަސް ދުވަހަށް އޭނާ ބަންދުކޮށްފަ އެވެ.
ޕޯސްޓުގެ ޒަރިއްޔާއިން އެތެރެކުރަން މަސައްކަތްކުރަނިކޮށް އަތުލައިގަންނަ ޑްރަގުގެ އަދަދުތައް ދަނީ އިތުރުވަމުންނެވެ. މިދިޔަ މަހު ވެސް ކަސްޓަމްސްއިން ވަނީ ޕޯސްޓުން ގެނައި ބައި ކިލޯ މެފެޑްރޯން އަތުލައިގެންފަ އެވެ.
އެ އިދާރާއިން "އަދަދު" ނޫހާ ކުރިން ހިއްސާކުރި ތަފާސްހިސާބުތަކުން ދައްކާ ގޮތުގައި ވޭތުވި ފަސް އަހަރުގެ ތެރޭގައި 179 ކިލޯގެ ޑްރަގްސް އަތުލައިގަތެވެ. އޭގެ ތެރެއިން ރާއްޖެ އަންނަ ފަސިންޖަރުންގެ އަތުން އަތުލައިގަންނަ ޑްރަގްސް ނަގާފައި އެންމެ ގިނައި ޕޯސްޓުން އެތެރެކުރާ ޑްރަގްސް އެވެ.
