ދެކުނު އެފްރިކާގެ އެކްޓްރެސް އަދި މޮޑެލް ޗާރްލްބީ ޑީން އުމުރުން 32 އަހަރުގައި މަރުވެއްޖެ އެވެ.
ޗާރްލްބީ ވަނީ މަގްބޫލް ތަރި ވުޑީ ހެރެލްސަންއާ އެކު "ޓްރޭންގަލް އޮފް ސޭޑްނެސް" ގައި މަސައްކަތް ކޮށްފަ އެވެ. އެ ފިލްމަށް މި އަހަރުގެ ކާންސް ފިލްމް ފެސްޓިވަލްގެ ރަން ވަނަ ވެސް ލިބުނެވެ.
އޭގެ އިތުރުން ޓީވީ ސީރީޒް "ބްލެކް ލައިޓިން" ގައި ވެސް ޗާރްލްބީ އުޅުނެވެ. ޑީސީ ކޮމިކްތަކުގައި އުޅޭ ކެރެކްޓާތަކަށް ބިނާކޮށް ހެދި އެ ސީރީޒްގައި ޗާރްލްބީގެ ކެރެކްޓާއަކީ ސަޔޮނައިޑް އެވެ.
ޗާރްލްބީގެ މަންދޫބުން ބުނީ އޭނާ ހޮސްޕިޓަލްގައި މަަރުވީ ކުއްލި ގޮތަކަށް ދިމާވި ބައްޔަކާ ގުޅިގެން ކަމަށެވެ.
ރުބެން އޮސްޓްލަންޑް ލިޔެ، ޑައިރެކްޓް ކުރި "ޓްރޭންގަލް އޮފް ސޭޑްނަސް" ރިލީޒް ކުރަން ހަމަޖެހިފައި ވަނީ އޮކްޓޯބަރުގަ އެވެ. އަންނަ އަހަރުގެ އޮސްކާ އެވޯޑަށް އެ ފިލްމް ނޮމިނޭޓް ވާނެ ކަމަށް ބެލެވެ އެވެ.
ދެކުނު އެފްރިކާގެ ކޭޕް ޓައުންގައި އުޅެ ބޮޑުވި ޗާރްލްބީ މޮޑެލް ކުރަން ފެށީ ކުޑައިރުގަ އެވެ. އޭނާގެ އެންމެ ފުރަތަމަ ފިލްމަކީ 2010 ގައި ނެރުނު "ސްޕަޑް" އެވެ.
އޭގެ އިތުރުން "ޑެތް ރޭސް 3: އިންފާނޯ"، "ބްލަޑް އިން ދަ ވޯޓާ"، "ޑޯންޓް ސްލީޕް" އަަދި "ޕޯޓްހޯލް" ފަދަ ފިލްމުތަކުގައި ވެސް އުޅުނެވެ.
ދެހާސް އަށް ވަނަ އަހަރު ނުރައްކާތެރި ކާރު އެކްސިޑެންޓަކުން ސަލާމަތްވީ ޗާރްލްބީ އުޅުނީ މޮޑެލް ލޫކް ވޮލްކާއާ އެންގޭޖްވެގެންނެވެ.
ޗާރްލްބީ އަދި ލޫކް.
