އިންޑިއާގެ އިރުމަތީގައި އޮންނަ ޖާރްހާންދް ސްޓޭޓުގައި އުމުރުން 19 އަހަރުގެ އަންހެން ދަރިވަރަކަށް ފާރަލައި، އޭނާގެ ގައިގައި ރޯކޮށް މަރާލި މަައްސަލައެއް ހޫނުވެއްޖެ އެވެ.
އަންކިތާ ސިންގް މަރުވީ އާދީއްތަ ދުވަހުގެ ހެނދުނު ހޮސްޕިޓަލުގަ އެވެ. ތުހުމަތު ކުރެވޭ ދެ ފިރިހެނުން ހައްޔަރުކޮށްފައިވާ ކަމަށް ފުލުހުން ބުނެ އެވެ.
އޭގެ ތެރެއިން ޝާހްރުކް ނަމަކަށް ކިޔާ މީހާ ވަނީ އަންކިތާއަށް ފާރަލައި، އޭނާގެ ފަހަތުން ތަންތަނަށްގޮސް، ދުވަސްތަކެއް ވަަންދެން ފޯނުން ގުޅައި އުނދަގޫކޮށްފަ އެވެ.
ދެ ވަނަ މީހާއަކީ ތުހުމަތު ކުރެވޭ ގޮތުގައި ޝާހްރުކްއަށް ޕެޓްރޯލް ފޯރުކޮށްދީ، އަންކިތާ މަަރާލުމުގައި ބައިވެރިވި މީހެކެވެ. އެ މީހުން އަންކިތާގެ ގަޔަށް ޕެޓްރޯލް އަޅައި ރޯކޮށްލީ އޭނާ ގޭގެ ކުޑަދޮރެއް ކައިރީގައި ނިދާފައި އޮއްވަ އެވެ.
އިންޑިއާ ސަރުކާރުގެ ތަފާސްހިސާބް ދައްކާ ގޮތުން ފާރަލައި ބިރު ދެއްކުމުގެ އެތައް ހާސް މައްސަލައެއް ކޮންމެ އަހަރަކު ވެސް ރިޕޯޓު ކުރެ އެވެ. އެފަދަ ވަރަށް ގިނަ ކޭސްތަކުގައި ފާރަލުމުގެ ޝިކާރައަކަށްވާ މީހުންގެ ގަޔަށް އެސިޑް ޖަހައިފައި ވެސް އެބަ ހުއްޓެވެ.
އަންކިތާގެ މަރުގެ މައްސަލަ ހޫނުވީ، އޭނާ އާއި ޝާހްރުކް ދެ ދީނަށް ނިސްބަަތް ވާތީ ކަމަށް ރިޕޯޓުތައް ބުނެ އެވެ. މުޒާހަރާ ކުރަމުން ދަނީ ހިންދޫ ގްރޫޕްތަކުގެ މީހުންނެވެ.
އެ މީހުން ތުހުމަތު ކުރާ ގޮތުގައި ޝާހްރުކް މަސައްކަތް ކުރީ "ލޯބީގެ ޖިހާދެއް" ކުރުމަށެވެ. ހިންދޫ ހަަރުކަށި ފިކުރުގެ މީހުން "ލޯބީގެ ޖިހާދު" ކަމަށް ސިފަކުރަނީ ހިންދޫ އަންހެނަކު މުސްލިމަކާ ކައިވެނި ކުރާ އިރު، އިސްލާމް ދީން ގަބޫލު ކުރާތީ އެކަމަށް ނިސްބަތްކޮށްފަ އެވެ.
އެހެން ނަމަވެސް ފުލުހުން ބުނީ މިއީ ދީނީ ކަމަކާ ގުޅުން ހުރި ހާދިސާއެއް ނޫން ކަމަށާއި މިއީ އަންހެނަކަށް ފުރައްސާރަކޮށް ހިންގި ބޮޑު ކުށެއް ކަމަށެވެ.
