ޕާކިސްތާނަށް ބޯކޮށް ވާރޭވެހި ހިނގަމުންދާ ފެންބޮޑުވުމުގެ ހާދިސާތަކުގައި ހާލުގައި ޖެހިފައިވާ މީހުންނަށް އެހީވުމަށް އދ. އިން 160 މިލިއަން ޑޮލަރު ހޯދަން މަސައްކަތް ފަށައިފި އެވެ.
ޕާކިސްތާނަށް އެހީ ހޯދުމަށް ކެމްޕެއިން ފެށުމުގެ ގޮތުން އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވިދާޅުވީ މި އަހަރުގެ ވިއްސާރަ މޫސުމުގައި ކުރަމުން ދަނީ އާދަޔާ ހިލާފު އަސަރެއް ކަމަށެވެ.
މިދިޔަ ޖޫން މަހުން ފެށިގެން މިހާތަނަށް 1،136 މީހުން މަރުވެފައިވާ އިރު، 33 މިލިއަން މީހުންނަށް އަސަރުކޮށްފައިވެ އެވެ. ޕާކިސްތާނުގެ ތިންބައި ކޮށްފައި އެއްބައި އޮތީ ފެނު އަޑީގަ އެވެ.
ގުޓެރޭޒްގެ ވީޑިއޯ މެސެޖުގައި ވިދާޅުވީ ދެކުނު އޭޝިއާއަކީ މޫސުމީ ބަދަލުގެ ނުރައްކާ އެންމެ ބޮޑު "ހޮޓްސްޕޮޓް" ކަމަށާއި މި ސަރަހައްދުގައި މޫސުމީ ބަދަލާ ގުޅިގެން ކުރާ އަސަރުތަކުގައި މީހުންގެ މަރުވުމުގެ ފުރުސަތު 15 ގުނަ އިތުރު ކަމަށެވެ.
އޭނާ ވިދާޅުވީ އދ. އިން ފެށި ކެމްޕެއިންގެ މަގްސަދަކީ 5.2 މިލިއަން މީހުންނަށް ކާބޯތަކެއްޗާއި، ފެން، ނަރުދަމާ އަދި އެމެޖެންސީ ތައުލީމާއި ސިއްހީ އެހީ ފޯރުކޮށްދިނުން ކަމަށެވެ.
އަންގާރަ ދުވަހު ޕާކިސްތާނުގެ ޕްލޭނިން މިނިސްޓަރު އަހްސަން އިގްބާލް ވިދާޅުވީ ފެންބޮޑުވުމުގެ ސަބަބުން ލިބުނު ގެއްލުން 10 ބިލިއަން ޑޮލަރަށް އަރާނެ ކަމަށެވެ.
