އިންޑިއާގައި ދެ މަސް ތެރޭގައި 5ޖީ މޮބައިލް އިންޓަނެޓް ހިދުމަތް ދިނުމަށް ބިލިއަނަރު މުކޭޝް އަމްބާނީ 25 ބިލިއަަން ޑޮލަރުގެ ބޮޑު ޕްރޮޖެކްޓެއް ލޯންޗުކޮށްފި އެވެ.
އަމްބާނީއަަކީ ރިލަޔަންސް އިންޑަސްޓްރީޒްގެ ވެރިޔާ އެވެ. އޭނާ ފެށި ޕްރޮޖެކްޓުގެ ދަށުން ހައި ސްޕީޑް ނެޓްވޯކް އެންމެ ފުރަތަމަ ތައާރަފް ކުރަނީ ބޮޑެތި ސިޓީތަކުގަ އެވެ. އެގޮތުން ނިއު ދިއްލީ އާއި މުމްބާއީ ހިމެނެ އެވެ.
އޭނާގެ އަމާޒަކީ ޑިސެމްބަރު 2023 ގެ ކުރިން މުޅިން އިންޑިއާއަށް އެ ނެޓްވޯކް ފުޅާ ކުރުމެވެ. އޭގެ އިތުރުން ރިލަޔަންސް އިންޑަސްޓްރީޒްއިން ދަނީ ގޫގްލްއާ ގުޅިގެން އަގުހެޔޮ 5ޖީ ސްމާޓްފޯނެއް އުފެއްދުމުގެ މަސައްކަތް ވެސް ކުރަމުންނެވެ.
މި ވަގުތުން އިންޑިއާގައި 5ޖީ ސްމާޓްފޯނެއް އެންމެ އަގުހެޔޮކޮށް ލިބެނީ 150 ޑޮލަރަށެވެ.
ކުންފުނީގެ އަހަރީ އާއްމު ޖަލްސާގައި އަމްބާނީ ބުނީ ޕްރޮޖެކްޓް ފުރިހަމަވުމުން، ކުންފުނީގެ 5ޖީ ނެޓްވޯކް ވާނީ ދުނިޔޭގެ އެންމެ ބޮޑު ނެޓްވޯކަށް ކަމަށެވެ.
އެ ޕްރޮޖެކްޓް ހިންގާނީ ރިލަޔަންސް އިންޑަަސްޓްރީޒްގެ ސަބްސިޑަޔަރީ ކުންފުނި ޖިއޯގެ ދަށުންނެވެ. ޖިއޯއަކީ އިންޑިއާގައި އެންމެ ފުޅާކޮށް މޮބައިލް ފޯނުގެ ހިދުމަތް ދޭ ކުންފުންޏެވެ.
