ޕާކިސްތާނަށް ބޯކޮށް ވާރޭވެހި ފެންބޮޑުވުމުން ލިބުނު ގެއްލުން 10 ބިލިއަން ޑޮލަރަށް އަރާ ކަމަށް އެ ގައުމުގެ ޕްލޭނިން މިނިސްޓަރު ވިދާޅުވެއްޖެ އެވެ.
"އަޅުގަނޑަށް ބެލެވެނީ ވަރަށް ބޮޑު ގެއްލުމެއް ވެފައިވާ ކަމަކަށް. މިހާތަނަށް ހެދި އަންދާޒާތަކުން ދައްކަވނީ 10 ބިލިއަން ޑޮލަރަށް ވުރެ ބޮޑު އަދަދަކުން ގެއްލުންވެފައިވާ ކަމަށް،" އަހްސަން އިގްބާލް ރޮއިޓާޒް ނޫހަށް ވިދާޅުވި އެވެ.
ބޮޑު އަދަދަކުން ގެއްލުންވެފައިވާ އިރު، ޕާކިސްތާނުގެ ތިންބައި ކޮށްފައި އެއްބައި މި ވަގުތު އޮތީ ފެނު އަޑީގަ އެވެ. މި ދަނޑިވަޅުގައި އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ވަނީ 1.1 ބިލިއަން ޑޮލަރުގެ އެހީ ފޯރުކޮށްދީފަ އެވެ.
އެ ފައިސާއަކީ ޕާކިސްތާނުގެ ދަރަނިތައް ޑީފޯލްޓްވެދާނެތީ އެހީވުމުގެ ގޮތުން ދިން ފައިސާ އެވެ. އިގްތިސާދީ ކާރިސާއެއްގެ ތުންފަތް މަތީގައި އޮތް ޕާކިސްތާނުގައި ފެންބޮޑުވުމުން އިތުރު ގޮންޖެހުންތައް ވަނީ ދިމާވެފަ އެވެ.
މިހާތަނަށް 1،136 މީހުން މަރުވެފައިވާ އިރު 33 މިލިއަން މީހުންނަށް އަސަރުކޮށްފައިވެ އެވެ. އެއީ މުޅި އާބާދީގެ 15 ޕަސެންޓެވެ.
ބޯ ވާރޭގައި މަގުތަކާއި ދަނޑުތަކާއި ގެތަކާއި ބްރިޖްތަކާއި އެހެން އިންފްރާސްޓްރަކްޗާއަށް ގެއްލުންވެ، ފެންބޮޑުވުމުން އެ ތަކެތި އޮޔާދާ މަންޒަރު ވެސް ވީޑިއޯތަކުން ފެންނަމުންދެ އެވެ.
