ގިނަ ފިލްމްތަކެއްގެ މުހިންމު ރޯލްތަކެއް އަދާކޮށްފައިވާ ފައުޒިއްޔާ ހަސަން މިއަދު ނިޔާވެއްޖެ އެވެ. އަވަށްޓެރި ސްރީލަންކާގައި ދިރިއުޅެމުންދިޔަ ފައުޒިއްޔާ ނިޔާވީ މިއަދު ހެނދުނުގެ ވަގުތެއްގަ އެ ގައުމުގަ އެވެ.
އެނގިފައިވާ ގޮތުގައި އޭނާ ނިޔާވީ މެޔަށް ކުއްލިއަކަށް ތަދެއް އަރައިގެން ފަރުވާދެމުންދަނިކޮށެވެ.
ފިލްމީ ދާއިރާގައި މަސައްކަތް ކުރާތާ 35 އަހަރަށްވުރެ ގިނަ ދުވަސްވެފައިވާ ފައުޒިއްޔާ ނިޔާވުމާ ގުޅިގެން ފިލްމީ ދާއިރާގައި މަސައްކަތް ކުރާ ގިނަ ބަޔަކު ގެންދަނީ އޭނާގެ އާއިލާއަށް ތައުޒިޔާ ފޮނުވަމުންނެވެ.
އެވޯޑްތައް ވެސް ހާސިލްކޮށްފައިވާ ފައުޒިއްޔާ ވަނީ ގިނަ ފިލްމްތަކާއި ޑްރާމްތަކުގައި މަސައްކަތް ކޮށްފަ އެވެ. އޭނާ ބޮޑަށް ފެނިގެން ގޮސްފައިވަނީ މަންމަގެ ރޯލުތަކުންނެވެ. މިފަހުން ބައެއް ސީރީސްތަކުން ވެސް ފައުޒިއްޔާ ފެނިފައިވެ އެވެ.
އުމުރުން 80 އަހަރުގައި ފައުޒިއްޔާ ނިޔާވިއިރު މަޝްހޫރު ޑައިރެކްޓަރު މުހައްމަދު ނިޔާޒު, ޓެޑްރީގެ ކުރިއަށް އޮތް ފިލްމް, "ލަސްވިޔަސް"ގައި ވެސް އޭނާ ވަނީ މުހިންމު ރޯލެއް ކުޅަފަ އެވެ. އަދި ރިލީޒް ނުކުރާ އެ ފިލްމަކީ ފައުޒިއްޔާގެ އެންމެ ފަހުގެ ފިލްމީ މަސައްކަތަށްވާނެ އެވެ.
އިންޑިއާގައި ފައުޒިއްޔާ ހައްޔަރުކޮށްގެން ގެންގުޅުއިރު --
އިންޑިއާގެ ޖައްވީ އިދާރާ (އައިއެސްއާރުއޯ)ގެ ބައެއް އިސްވެރިންތަކަކާ ގުޅިގެން ޖާސޫސްކުރި ކަމުގެ ތުހުމަތުގައި ފައުޒިއްޔާއާ އޭނާއާއެކު އޭރު އިންޑިއާގައި އުޅުނު ގދ. ތިނަދޫ މަރިޔަމް ރަޝީދާ ނޮވެމްބަރު 13، 1994 ހައްޔަރުކޮށްފައިވެ އެވެ. އެމީހުން ދޫކޮށްލާފައިވަނީ އޭގެ ތިން އަހަރު ފަހުންނެވެ. އެމީހުން ބަންދުކޮށްފައި ބެހެއްޓީ ކެރެލާގެ ޖަލެއްގަ އެވެ.
އެ ހާދިސާ ދައްކުވައިދޭ ހިންދީ ފިލްމެއް ވެސް މިދިޔަ މަހުގެ ތެރޭ ނެރެފައިވެ އެވެ.
އޭނާ ނިޔާވިއިރު, ހައްޔަރުކޮށްގެން ގެންގުޅުމުގެ ބަދަލު ހޯދަން މައްސަލަ އިންޑިއާ ސަރުކާރަށް އޮތީ ހުށަހަޅާފަ އެވެ. އެ މައްސަލަ ކުރިއަށްދާއިރު އޭނާގެ ބަޔާން ވެސް ނަގާފައިވެ އެވެ.
ހާދިސާ ހިނގިތާ 27 އަހަރު ފަހުން އަލުން މައްސަލަ އަލުން ހިލިގެން ދިޔައީ އިންޑިއާގެ ސުޕްރީމް ކޯޓުގެ އިސް ނެގުމަށް އެ މައްސަލަ ބަލައި މިދިޔަ އަހަރުގެ އޭޕްރީލް މަހު ނެރުނު އަމުރެއްގެ ސަބަބުންނެވެ. އެ އަމުރުގައި ވަނީ އެ މައްސަލަ އޭރު ތަހުގީގު ކުރި ކެރެލާގެ ފުލުހުން އަމަލުކުރި ގޮތުގެ ތަހުގީގެއް ހިންގުމަށް ސީބީއައިއަށް އަމުރުކޮށްފަ އެވެ. އަދި ހައްޔަރުކުރި މީހުންނަށް ބަދަލު ހޯދުމަށް ދައުވާކުރުމަށް ވެސް ފުރުސަތު އަމުރުގައި ދީފައިވެ އެވެ.
