މިލާން (އޮގަސްޓް 30) - އިޓަލީ ދެ ވަނަ ޑިވިޝަނުގައި ވާދަކުރަމުން އަންނަ ކްލަބް، ކޯމޯގެ ހިއްސާދާރަކަށް މަޝްހޫރު ފުޓްބޯޅަ ތަރި، ތިއަރީ އޮންރީ ވެއްޖެ އެވެ.
ބެލްޖިއަމްގެ އެސިސްޓަންޓް ކޯޗުގެ މަގާމުގައި ހުރި އޮންރީ، 45، ކޯމޯގެ ހިއްސާދާރެއްގެ ގޮތުގައި މީޑިއާ އަށް ތައާރަފްކުރިއިރު، އެ ކްލަބްގެ ސީއީއޯ އަކީ ޗެލްސީގެ ކުރީގެ ކެޕްޓަން ޑެނިސް ވައިސް އެވެ.
ދާދި ފަހުން މޮނާކޯ ދޫކޮށް ކޯމޯ އަށް ސޮއިކުރި އާސެނަލާއި ބާސެލޯނާގެ ކުރީގެ ތަރި ސެސްކް ފަބްރެގަސް ވެސް ވަނީ ކޯމޯގެ ހިއްސާދާރުންގެ ތެރޭގައި ހިމެނިފަ އެވެ.
އޮންރީ ބުނީ ކޯމޯގެ ހިއްސާދާރަކަށް ވުމާ އެކު ފުޓްބޯޅައިގައި އޭނާގެ އާ "ޗެޕްޓަރެއް" ފެށުނީ ކަމަށެވެ.
"ފުޓްބޯޅަ އަށް މި ތަނުގައި (ކޯމޯގައި) އޮތް ލޯބި އަހަންނަށް އެނގޭ. މި އަވަށަށް އަބަދުވެސް ގިނަ މީހުންތަކެއް އާދޭ، ސްޕެއިނާއި ފްރާންސްގެ މީހުން މި ސަރަހައްދުގެ ގުދުރަތީ ރީތި ކަމުގެ ވާހަކަތައް އަބަދުވެސް ދައްކާ. އެކަމަކު، ދެން އަހަރެން ބޭނުމީ މިތަނުގެ ފުޓްބޯޅައިގެ ވާހަކަ ދައްކާ އަޑު އަހާލަން،" ކޯމޯގެ ހިއްސާދާރެއްގެ ގޮތުގައި މީޑިއާ އިން ކުރި ސުވާލަކަށް ޖަވާބު ދެމުން އޮންރީ ބުންޏެވެ.
އިންޑޮނީޝިއާ އަށް ނިސްބަތްވާ ދުންފަތުގެ ވިޔަފާރި ކުރާ ވަރުގަދަ ބައެއް ހިންގަމުން އަންނަ ކޯމޯ އެންމެ ފަހުން އިޓަލީ ފުރަތަމަ ޑިވިޝަނުގައި ކުޅެފައިވަނީ 2003 ވަނަ އަހަރު އެވެ. އޭގެ ފަހުން ގިނަ އަހަރުތަކެއް ވަންދެން، ދަށް ޑިވިޝަންތަކުގައި ވާދަކުރަން ޖެހުނު ކޯމޯ ވަނީ 2016 ވަނަ އަހަރު ބަނގުރޫޓުވެފަ އެވެ.
އެކަމަކު، އަލުން ކޯމޯ ކޮޅަށް ޖަހައި، ހަތަރު ވަނަ ޑިވިޝަނުން ފެށިގެން ދެ ވަނަ ޑިވިޝަނާ ހަމައަށް ގެނެސް، މިހާރު އަމާޒުހިފާފައިވަނީ ފުރަތަމަ ޑިވިޝަނަށް ޕްރޮމޯޓް ވުމަށެވެ.
އޮންރީ އަށް ކޯމޯގައި އޮތީ ހިއްސާދާރެއްގެ ރޯލު ކަމުގައި ވިޔަސް ކޯޗިންގައި އޭނާ ކޮށްފައިވާ ތަޖުރިބާތަކާއި ކުޅުންތެރިއެއްގެ ގޮތުގައި އޭނާ ހޯދާފައިވާ ކާމިޔާބީތަކުގެ ކަންކަމުން ފިލާވަޅު ހޯދައި، އެކި ގޮތްގޮތުން ކޯމޯ އަށް އެހީތެރިވާނެ އެވެ.
ކޯމޯގެ ސީއީއޯ ވައިސް ވިދާޅުވީ އޮންރީ ހުރީ ހުރިހާ ގޮތަކުން ކޯމޯ ކުރިއެރުވުމުގެ އަމާޒުގައި ކަމަށެވެ.
މޮނާކޯ، ޔުވެންޓަސް، އާސެނަލް އަދި ބާސެލޯނާ އަށް ކުޅުނު އޮންރީ ކުޅުން ހުއްޓާލީ އެމްއެލްއެސްގެ ނިއުޔޯކް ރެޑްބުލްސް އަށް ކުޅުމަށް ފަހު 2015 ވަނަ އަހަރު އެވެ.
ކުޅުން ހުއްޓާލުމަށް ފަހު އޮންރީ މަސައްކަތް ކުރަން ފެށީ މަޝްހޫރު ކުޅިވަރު މީޑިއާ ސްކައި ސްޕޯޓްސްގެ ފުޓްބޯޅަ އެނަލިސްޓެއްގެ ގޮތުގައި އަދި އާސެނަލްގެ 18 އަހަރުން ދަށުގެ އެކަޑަމީ ކޯޗެއްގެ ގޮތުގަ އެވެ. ކޯޗިންގެ ރަސްމީ ފުރަތަމަ ވަޒީފާގައި އެންމެ ފުރަތަމަ 2016-2018 އަށް ބެލްޖިއަމް އެސިސްޓަންޓް ކޯޗަކަށް ހުރި އޮންރީ ވަނީ އޭގެ ފަހުން ހެޑް ކޯޗެއްގެ ގޮތުގައި މޮނާކޯ އާއި ކެނަޑާގެ މޮންޓްރެއާލް އިމްޕެކްޓަށް ކޯޗުކޮށްދީފަ އެވެ.
އޮންތީ ވަނީ މިދިޔަ އަހަރު އަލުން ބެލްޖިއަމް ގައުމީ ޓީމުގެ އެސިސްޓަންޓް ކޯޗުކަމާ ހަވާލުވެފަ އެވެ.
ކޯމޯ އިން ވަނީ ފަބްރެގަސްގެ އިތުރުން ކުރިން އޭސީ މިލާނާއި ވުލްވްސް އަށް ކުޅުނު އިޓަލީގެ ފޯވާޑް ޕެޓްރިކް ކުޓްރޯނޭގެ ސޮއި ހޯދައިފަ އެވެ.
