ފާއިތުވި 24 ގަޑިއިރުގެ ތެރޭގައި ފެންބޮޑުވުމުގެ ސަބަބުން ޕާކިސްތާނުން އިތުރު 119 މީހުން މަރުވެފައި ވަނިކޮށް، އެ ގައުމުގެ ސަރުކާރުން ބޭރުގެ އެހީއަށް އެދެފި އެވެ.
ޑިޒާޒްޓާ މެނޭޖްމަންޓް އޮތޯރިޓީއިން ބުނީ މިދިޔަ ޖޫން މަހުން ފެށިގެން މޫސުން ގޯސްވެ ކުރާ ވިއްސާރައިގައި މަރުވި މީހުންގެ އަދަދު 1،033 އަށް އަރާފައިވާ ކަމަށެވެ.
އެމެރިކާ، އިނގިރޭސިވިލާތް، ޔޫއޭއީ އަދި ބައެއް އެހެން ގަައުމުތަކުން އެހީ ފޯރުކޮށްދީފައިވާ އިރު، އަދިވެސް އިތުރު އެހީ ބޭނުންވާ ކަމަށް އޮފިޝަލުން ބުނެ އެވެ.
ޕާކިސްތާނަށް އިގްތިސާދީ ގޮންޖެހުންތަކާ ކުރިމަތިވެފައި ވަނިކޮށް މޫސުން ގޯސްވެ ފެންބޮޑުވާން ފެށުމުން ބައެއް ހިސާބުތަކުގައި ވަނީ ކުއްލި ހާލަތު އިއުލާނުކޮށްފަ އެވެ.
ސަރުކާރުން ބުނީ އާއްމުންނަށް އެހީވުމުގެ ގޮތުން ބައެއް ތަރައްގީގެ މަޝްރޫއުތަކަށް ކަނޑައަޅާފައި ހުރި ފައިސާ ބޭނުންކުރަން މަޖުބޫރުވެފައިވާ ކަމަށެވެ.
ފަހުގެ ތާރީހެއްގައި ވާރޭ ނުވެހޭ މިންވަރަށް މިހާރު ޕާކިސްތާނުގެ ބައެއް ހިސާބުތަކަށް ވާރޭ ވެހެމުން ދާތީ ބޮޑު ކާރިސާއެއް ދިމާވެފައިވާ ކަމަށް އެހީދޭ ޖަމިއްޔާތަކުން ބުނެ އެވެ.
އެންމެ ބޮޑަށް އަސަރު ކުރަމުންދާ ސިންދް ޕްރޮވިންސަށް އެހެން އަހަރުތަކުގެ އޯގަސްޓް މަހާ އަޅާ ބަލާއިރު އަށް ގުނަ އިތުރަށް ވާރޭ ވެހިފައިވެ އެވެ.
ހުޅަނގު އުތުރު ހައިބަރް ޕަހްތުންހްވާ ޕްރޮވިންސްގައި ވެސް ކޯރުތައް ބަންޑުންވެ ފެންބޮޑުވެފައިވެ އެވެ. އޭގެ އިތުރުން ޕަންޖާބާއި ހުޅަނގު ދެކުނު ބަލުޗިސްތާން ޕްރޮވިންސްގައި ވެސް މީހުން ހާލުގަައި ޖެހިފައިވެ އެވެ.
ހުކުރު ދުވަހު ބޮޑު ވަޒީރު ޝެހްބާޒް ޝަރީފް ވިދާޅުވީ ފެންބޮޑުވުމުގެ އަސަރު 33 މިލިއަަން މީހުންނަށް ކޮށްފައިވާ ކަމަށެވެ. އެއީ އާބާދީގެ 15 ޕަސެންޓެވެ.
