ޔޫތު މިނިސްޓަރު އަހުމަދު މަހްލޫފް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއެކު މ. އަތޮޅުގައި ހުންނެވުމުން އޭނާގެ މައްޗަށް ދައުލަތުން ކުރާ ރިޝްވަތު ނެންގުމުގެ ދައުވާގެ އަޑުއެހުން މިއަދު ކޯޓުން ކެންސަލްކޮށްފި އެވެ.
ކްރިމިނަލް ކޯޓުން އިއްޔެ ތާވަލު އާންމުކުރި އިރު، މަހްލޫފްގެ މައްޗަށް ދައުލަތުން ކުރާ ރިޝްވަތު ހިފުމުގެ ދައުވާގެ ޝަރީއަތުގެ އަޑުއެހުމެއް މިއަދު ހެނދުނު 9:00 ޖަހާއިރު ބާއްވާ ގޮތަށް އޮތެވެ. އެއިރު ވެސް މަހްލޫފު ހުންނެވީ ރައީސްއާއެކު މ. އަތޮޅުގަ އެވެ.
މަހްލޫފް މައްސަލައިގެ އަޑުއެހުން ކެންސަލް ކުރީ ޕްރޮސެކިއުޓާ ޖެެނެރަލްގެ އޮފީހުން އެދިގެން ކަމަށް ކްރިމިނަލް ކޯޓުގެ އޮފިޝަލް އަމާން މުހައްމަދު ނަޖީބު ވިދާޅުވި އެވެ. އަދި އެ ކަން މިދިޔަ ބުރާސްފަތި ދުވަހު ދައުލަތުން އަންގާފައިވާ ކަމަށް ވެސް ކޯޓުން ބުންޏެވެ.
"ބުރާސްފަތި ދުވަހުން ފެށިގެން ތާވަލުން އަޑުއެހުން އުނިކުރަން އޮންނާނީ، އެކަމަކު އެ އަޑުއެހުމާއެކު ތާވަލު އާންމުކުރެވުނީ، އެހެންވެ ފަހުން އަނެއްކާ ވެސް ތާވަލުން އެ ބައި އިސްލާހު ކުރުމަށް ފަހު ކޯޓުން އާންމު މި ކުރީ،" އަމާން ތަފުސީލުކޮށްދެއްވި އެވެ.
ޕީޖީ އޮފީހުގެ މީޑިއާ އޮފިޝަލް އަހުމަދު ޝަފީއު މި ނޫހަށް ވިދާޅުވި ގޮތުގައި، އެ އަޑުއެހުން ކެންސަލްކޮށްދޭން އެ އޮފީހުން އެދުނީ އެ އޮފީހުގެ އިދާރީ ސަބަބަކާ ގުޅިގެނެވެ.
މަހްލޫފަށް ކުރާ ރިޝްވަތު ނެންގެވުމުގެ ދައުވާ މަދަނީ މިންގަނޑުން ކުރިއަށް ނުގެންދެވޭނެ ކަމަށް ކަނޑައެޅުމަށް ފަހު މައްސަލަ އެންމެ ފުރަތަމަ ކްރިމިނަލް ކޯޓުން ބޭރުކޮށްލީ އެވެ. އޭރު މައްސަލަ ބެއްލެވީ ގާޒީ މުހައްމަދު މިސްބާހެވެ.
ދައުލަތުގެ ފަރާތުން މައްސަލަ ހައި ކޯޓުގައި އިސްތިއުނާފް ކުރުމުން، އެ ކޯޓުން މައްސަލަ ބެލުމަށް ފަހު އެންގެވީ ކްރިމިނަލް ކޯޓުގައި މައްސަލަ އަލުން ބެލުމަށެވެ. އެއީ މިދިޔަ މާޗު މަހުގެ 21 ވަނަ ދުވަހެވެ.
މަހްލޫފަށް ކުރާ ދައުވާގެ ޝަރީއަތުގެ އަޑުއެހުމެއް މިއަދަށް ތާވަލުކުރީ ހައި ކޯޓުން މައްސަލަ ބަލަން އެންގިތާ ފަސް މަހަށް ވުރެ ގިނަ ދުވަސް ފަހުންނެވެ.
މަހްލޫފްގެ މައްޗަށް ދައުވާކުރަނީ 18 ވަނަ ރައްޔިތުންގެ މަޖިލީހުގެ ގަލޮޅު ދެކުނު ދައިރާގެ މެމްބަރުގެ ގޮތުގައި ހުންނަވައި އެމްއެމްޕީއާރުސީގެ ހިޔާނާތުގެ ފައިސާއިން 33،000 ޑޮލަރު (508،860ރ.) ރިޝްވަތުގެ ގޮތުގައި އޭނާ ނެންގެވި ކަމަށް ބުނެ އެވެ.
މަހްލޫފަށް ދައުވާ ކުރަނީ މަޖިލީހުގެ މެމްބަރުކަމުގައި ހުންނަވައި ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓު ދިނުމުގެ މުގާބިލުގައި، އޭރުގެ ޓޫރިޒަމް މިނިސްޓަރު އަހުމަދު އަދީބު، އެސްއޯއެފްގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ އެކައުންޓުގެ ޗެކަކުން އޭނާއަށް ދިން 33,000 ޑޮލަރު, އޭނާގެ ނަމުގައި ބޭންކް އޮފް މޯލްޑިވްސް ގައި ހުޅުވާފައިވާ އެކައުންޓަށް ޖަމާކޮށް، ރިޝްވަތު ހިފާފައިވާ ކަމަށް ތުހުމަތުކޮށެވެ.
ނަމަވެސް މަހްލޫފް ވިދާޅުވަނީ އެއީ ޑޮލަރު ގަތުމުގެ މުއާމަލާތެއް ކަމަށާއި ގާނޫނާއި ގަވާއިދާ ހިލާފަށް އެއްވެސް ކަމެއް އޭނާ ނުކުރައްވާ ކަމަށެވެ.
