ޕާކިސްތާނުގައި ފެންބޮޑުވެ 33 މިލިއަން މީހުންނަށް އަސަރު ކުރުމާ އެކު ސަރުކާރުން ގައުމީ އެމެޖެންސީއެއް އޮތް ކަމަށް އިއުލާނުކޮށްފި އެވެ.
ހުކުރު ދުވަހު ޑިޒާޒްޓާ މެނޭޖްމަންޓް އޮތޯރިޓީއިން ބުނީ ޖޫން މަހުން ފެށިގެން ފެންބޮޑުވުމުގެ އެކި ހާދިސާތަކުގައި 900 އަށް ވުރެ ގިނަ މީހުން މަރުވެފައިވާ ކަމަށެވެ. ފާއިތުވި 24 ގަޑިއިރުގެ ތެރޭގައި 34 މީހުން މަރުވި އެވެ.
ފެންބޮޑުވުމުގެ ސަބަބުން ގިނަ ބަޔަކު ހާލުގައި ޖެހިފައިވާ މި ދަނޑިވަޅުގައި ފެނުގެ ޒަރިއްޔާއިން ފެތުރޭ ބަލިތައް އިތުރުވުމުގެ ބިރު ވެސް އެބަ އޮތެވެ.
ހުކުރު ދުވަހު ބޮޑު ވަޒީރު ޝެހްބާޒް ޝަރީފް ވިދާޅުވީ ފެންބޮޑުވުމުގެ އަސަރު 33 މިލިއަަން މީހުންނަށް ކޮށްފައިވާ ކަމަށެވެ. އެއީ އާބާދީގެ 15 ޕަސެންޓެވެ.
ބައިނަލްއަގްވާމީ އެހީއަށް އެދުމުގެ އިތުރުން ޝަރީފް ވަނީ އިސްލާމްއާބާދުގައި އެކި ގައުމުތަކުގެ ސަފީރުންނަށް ބައްދަލުކުރައްވައިފަ އެވެ.
މޫސުމާ ބެހޭ މިނިސްޓަރު ޝެރީ ރެހްމާން ކުރިން ވިދާޅުވީ މިއީ މި އަހަރު ޕާކިސްތާނަށް ދިމާވި އަށް ވަނަ "މޮންސޫން ސައިކަލް" ކަމަށެވެ. އާއްމުކޮށް "މޮންސޫން ސައިކަލް" ނުވަތަ މޫސުމީ ވިއްސާރަ ޕާކިސްތާނަށް ކުރިމަތި ވަނީ ކޮންމެ އަހަރަކު ތިނެއް ނުވަތަ ހަތަަރު ފަހަރެވެ.
