ދަރިމައިވުމުގެ ރޭޓް އެންމެ ދަށް ގައުމަކީ އަދިވެސް ދެކުނު ކޮރެއާ ކަމަށް ތަފާސްހިސާބުން ދައްކައިފި އެވެ.
ދެކުނު ކޮރެއާގެ އަންހެނުންގެ އާބާދީއަށް ބަލާއިރު، އެވްރެޖްކޮށް ކޮންމެ އަންހެނަކު ވިހެއުމުގެ ރޭޓް އުޅެނީ އެއް ޕަސެންޓަށް ވުރެ ދަށުގައި ކަން ކަަމަށް ދިރާސާއިން އެންމެ ފުރަތަމަ ދެއްކީ 2018 ގަ އެވެ.
ބުދަ ދުވަހު އެ ގައުމުގެ ސަރުކާރުން އާއްމުކުރި ތަފާސްހިސާބު ދައްކާ ގޮތުން އެ އަދަދު ވަނީ ކޮންމެ އަންހެނަކަށް 0.81 އަށް ވެއްޓިފަ އެވެ. އެއީ މިދިޔަ އަހަރާ އަޅާ ބަލާއިރު، ތިން ޕޮއިންޓުގެ ވެއްޓުމެކެވެ.
ދެކުނު ކޮރެއާއާ އަޅާ ބަލާއިރު، ދުނިޔޭގެ ކުރިއަރާފައިވާ ގައުމުތަކުގަައި ކޮންމެ އަންހެނަކަށް އެވްރެޖުކޮށް 1.6 ކުދިން ލިބޭ ކަމަށް ތަފާސްހިސާބުން ދައްކަ އެވެ.
ގައުމުތަކުގައި ހިޖުރަ ކުރުމެއް ނެތި، އާބާދީ އެއްވަރެއްގައި ހިފަހައްޓަން ބޭނުން ނަމަ ކޮންމެ އާއިލާއަކުން ވެސް މަދުވެގެން ދެ ކުދިން ހޯދަން ޖެހެ އެވެ.
ނަމަަވެސް އޯގަނައިޒޭޝަން ފޯ އިކޮނޮމިކް ކޯޕޮރޭޝަން އެންޑް ޑިވެލޮޕްމަންޓް (އޯއީސީޑީ) އިން ބުނީ ފާއިތުވި 60 އަހަރު ދަރިމައިވުމުގެ ރޭޓް ވަރަށް ބޮޑަށް ދަށްވަަމުންދާ ކަމަށެވެ.
އެކަން ވަކިން ހާއްސަކޮށް ފާހަގަވަނީ ދެކުނު ކޮރެއާއިންނެވެ. އެގޮތުން 2020 ވަނަ އަހަރު އުފަންވި ކުދިންނަށް ވުރެ މަރުވި މީހުންގެ އަދަދު ގިނަވި އެވެ.
