ކީރިތި ރަސޫލާއަށް ފުރައްސާރަ ކުރި މައްސަލައެއްގައި އިންޑިއާގެ ވެރިކަން ކުރާ ބަރަަތިޔަ ޖަނަތަ ޕާޓީ (ބީޖޭޕީ) ގެ އިސްވެރިޔަކު ހައްޔަރުކޮށްފި އެވެ.
ތާކޫރް ރާޖާ ސިންގްއަކީ ހައިދަރްއާބާދް ނިސްބަތްވާ ތެލަންގަނާ ސްޓޭޓުގެ ގާނޫނު ހަދާ މަަޖިލީހުގެ މެމްބަރެކެވެ. އޭނާގެ ވާހަކަތަކާ ގުޅިގެން މުސްލިމުން ވަނީ މުޒާހަރާކޮށްފަ އެވެ.
މީގެ ކުރިން ވެސް އޭނާ ވަނީ މުސްލިމުންނާ ދެކޮޅު ވާހަކަތައް ފަތުރާފަ އެވެ. މީގެ ދެ އަހަރު ކުރިން ފޭސްބުކްއިން ވެސް އޭނާގެ ޕޭޖު ހިންގުން މަނާކުރި އެވެ.
މި ފަހަރު އޭނާ ކީރިތި ރަސޫލާއަށް ފުރަައްސާރަ ކުރުމުން ބީޖޭޕީއިން އޭނާ ސަސްޕެންޑުކޮށް، ފޮނުވި ނޯޓިސްގައި ބުނީ ޕާޓީއިން ވަކިނުކުރަންވީ ސަބަބެއް ބަޔާންކޮށްދިނުމަށެވެ.
ބީޖޭޕީއިން ބުނީ ތާކޫރް ރާޖާ ސިންގް ފާޅުކުރާ ހިޔާލުތަކަކީ އޭނާގެ އަމިއްލަ ހިޔާލުތަކެއް ކަމަށާއި އެއީ ޕާޓީގެ ވިސްނުމާ މުޅިން ހިލާފު ހިޔާލުތަކެއް ކަމަށެވެ.
އަންގާރަ ދުވަހުގެ ހެނދުނު އޭނާ ހައްޔަރުކޮށް ކޯޓަށް ގެންދިޔުމުން، ފުލުހުން ހެދި ޓެކްނިކަލް ގޯހަކާ ހެދި ކަފާލާތުގެ ދަށުން ދޫކޮށްލަން އަމުރު ކުރި އެވެ.
އެކަމާ ހެދި މުޒާހަރާ ހޫނުވުމުގެ ފުރުސަަތު އޮތުމުން، ފުލުހުން ބުނީ އަލުން އޭނާ ހައްޔަރު ކުރުމަށް ކުރަން ޖެހޭ މަަސައްކަތް ކުރަމުންދާ ކަމަށެވެ.
ބުދަ ދުވަހުގެ ރޭ މުޒާހަރާ ހޫނުވެ، ފުލުހުން ސުލުހަ ބަލަހައްޓަން ނިކުތެވެ. އޭގެ ފަހުން ބުރާސްފަތި ދުވަހުގެ ހެނދުނު ހައިދަަރްއާބާދްގެ ސްކޫލްތަކާއި، ޕެޓްރޯލް ސްޓޭޝަންތައް ހުރީ ބަންދުކޮށްފަ އެވެ.
ކީރިތި ރަސޫލާއަށް ފުރައްސާރަކޮށް ޔޫޓިއުބްގައި އާއްމުކުރި ވީޑިއޯ އެ ޕްލެޓްފޯމުން ޑައުންކޮށްފައިވާ އިރު، ދެ ވަނަ ފަހަރަށް އޭނާ ހައްޔަަރު ކުރީ ބުރާސްފަތި ދުވަހުގެ މެންދުރު ފަހުގެ ވަގުތެއްގަ އެވެ.
މިދިޔަ ޖޫން މަހު ވެސް ބީޖޭޕީގެ ވެރިޔަކު ކީރިތި ރަސޫލާއަށް ފުރައްސާރަ ކުރި މައްސަލައެއް ފެންމަތިވެ، މުސްލިމް ގައުމުތަކުގެ ނުރުހުން އިންޑިއާއަށް އަމާޒުވި އެވެ.
