މެލޭޝިއާގެ ކުރީގެ ބޮޑު ވަޒީރުގެ މައްޗަށް ކޮރަޕްޝަންގެ ކުށް ސާބިތުވެ ކުރި 12 އަހަރުގެ ޖަލު ހުކުމުގެ އިސްތިއުނާފު މަރުހަލާ ނާކާމިޔާބުވެ، ހުކުމް ތަންފީޒު ކުރަން ޖަލަށް ގެންގޮސްފި އެވެ.
އުމުރުން 69 އަހަރުގެ ނަޖީބު ރައްޒާގުގެ މައްޗަށް ކޮރަޕްޝަންގެ ކުށް ސާބިތުވީ ޖުލައި 2020 ވަނަ އަހަރު، 1އެމްޑީބީ ފަންޑާ ގުޅޭ މައްސަލައިގަ އެވެ. ކުށް ސާބިތުވި ނަމަވެސް އިސްތިއުނާފު މަރުހަލާ ނިމެންދެން އެމަނިކުފާނު ހުންނެވީ ކަފާލާތުގެ ދަށުން ދޫކޮށްފަ އެވެ.
އެ ފަންޑު ބޭނުންކޮށް ދައުލަތުގެ ފައިސާއަށް ހިޔާނާތްތެރިވިކަމުގެ ތުހުމަތާއެކު ނަޖީބަށާއި އެމަަނިކުފާނުގެ ޕާޓީއަށް ވެރިކަން ގެއްލުނީ 2018 ގެ އިންތިހާބުންނެވެ.
އިސްތިއުނާފުގެ އެންމެ ފަހު މަރުހަލާގައި އަންގާރަ ދުވަހު ނަޖީބުގެ ގާނޫނީ ވަކީލު އެދުނީ މައްސަލަ ބަލާ ފަނޑިޔާރުންގެ ބެންޗުން އުއްތަމަ ފަނޑިޔާރު ތެންގްކޫ މައިމޫން ތުއަަން މަތް އުނިކުރުމަށެވެ.
އެގޮތަަށް އެދުނީ އެކަމަނާގެ ފިރިކަލުން 2018 ވަނަ އަހަރު ނަޖީބަށް ފާޑުކިޔަައި ޕޯސްޓެއް ފޭސްބުކްގައި ޝެއާކުރި ކަމަށް ބުނެ އެވެ. އެހެން ނަމަވެސް، ބެންޗުން ބުނީ އެ ޕޯސްޓު ޝެއާކުރީ ނަޖީބުއާ ދެކޮޅަށް ދައުވާ އުފުލުމުގެ ކުރިން ކަމަށް ވާތީ، ވަކީލު އެދުނު ގޮތަށް ނުނިންމޭނެ ކަމަށެވެ.
ހަތް ފަނޑިޔާރުން ހިމެނޭ ބެންޗުގެ ހުރިހާ ފަނޑިޔާރުން ވެސް އިއްތިފާގުވީ ނަޖީބުއާ ދެކޮޅަށް އުފުލި ހަތް ދައުވާގައި ވެސް ކުށް ސާބިތުވެފައި ވަނީ ރަނގަޅަށް ކަމަށެވެ.
ނަޖީބުގެ އަނބިކަނބަލުން ރޮސްމާ މަންސޫރާ ދެކޮޅަށް ވެސް މަނީ ލޯންޑަރިން އާއި ޓެކްސްއަށް މަކަރު ހެދުމުގެ ދައުވާ އުފުލާފައިވެ އެވެ. އެކަމަނާ ވަނީ ދައުވާތަކަށް އިންކާރުކޮށްފަ އެވެ.
