ވިލިމާލޭގައި 10 ބުރިއަށް އިމާރާތް ކުރުމުގެ ހުއްދަ ދިނުމާ ބެހޭގޮތުން މާލެ ސިޓީ ކައުންސިލާއި ޕްލޭނިން މިނިސްޓްރީ ދެބަސްވެއްޖެ އެވެ.
ވިލިމާލޭގައި 10 ބުރިއަށް އިމާރާތް ކުރުމުގެ ހުއްދަ ދިނުމުގެ މަސައްކަތް ކުރުމަށް ސިޓީ ކައުންސިލުން ނިންމީ، ވިލިމާލެއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކުރެވެން އޮތީ އެކަން ކޮށްގެން ކަމަށް ބުނެ އެވެ. ނަމަވެސް އެކަމަށްޓަކައި ގާނޫނީ ގޮތުން ގެންނަން ޖެހޭ ބަދަލުތައް ގެނެވެނީ ޕްލޭނިން މިނިސްޓްރީއަށެވެ.
"ވިލިމާލޭގައި 10 ބުރިއަށް އިމާރާތް ކުރުމުގެ ހުއްދަ ދިނުމާ ބެހޭގޮތުން ވާނީ ޕްލޭނިން މިނިސްޓްރީއަށް ސީޓީއެއް ފޮނުވާފައި، އަދި އެކޮޅުން ޖަވާބެއް ނުދެއްވާ" މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވި އެވެ.
މުއިއްޒު "އަދަދު"އަށް ވިދާޅުވީ 10 ބުރިއަށް އިމާރާތް ކުރުމުގެ ހުއްދަ ދިނުމާ ބެހޭގޮތުން ޕްލޭނިން މިނިސްޓްރީއަށް ސިޓީ ފޮނުވީ، އެކަމުގައި ރައްޔިތުންގެ ހިޔާލު ހޯދުމަށްފަހު ކަމަށެވެ.
ނަމަވެސް މުއިއްޒުގެ ވާހަކަ ދޮގު ކުރައްވާ ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު"އަށް ވިދާޅުވީ މުއިއްޒު އިޝާރާތް ކުރައްވާ ސިޓީގެ ޖަވާބު މީގެ ހަތަރު މަސް ކުރިން ދީފައިވާ ކަމަށެވެ. އަދި މިކަމުގައި މޭޔަރު ހެއްދެވީ ކަނޑައެޅިގެން އިތުރުފުޅެއް ކަމަށާއި، އެއީ "އިތުރުފުޅު ހައްދަވާ" ބޭފުޅެއް ކަމަށެވެ.
ވިލިމާލޭގައި މިހާރު އެންމެ އުސްކޮށް އިމާރާތް ކުރެވެނީ ހަ ބުރިއަށެވެ. އެ އުސޫލު ބަދަލު ކުރުމަކީ މޭޔަރު މުއިއްޒުގެ ކެމްޕެއިން ވައުދެކެވެ.
މުއިއްޒު ކުރިން ވިދާޅުވީ ވިލިމާލޭގާއި ގޯތި ބަހައިގެން އަދި ނުބަހާވިޔަސް އާއިލާ ބޮޑުވެގެން ގޮސް އިމާރާތް ނުކުރެވި ކުދި ތަންކޮޅުކޮޅުގައި ރައްޔިތުން ދިރިއުޅެމުންދާ ކަމަށެވެ. އަދި އެހާލަތަށް ދާއިރުވެސް ލޯނު ލިބޭނެ ގޮތެއް ނުވަތީ އެ ގޯތީގައި އިމާރާތް ހެދޭނެ ގޮތެއް ނެތި ރައްޔިތުން ތިބެން ޖެހިފައިވާ ކަމަށެވެ.
އޭނާ ވިދާޅުވީ އިމާރާތްތަކަށް ބޭންކުތަކުން ފައިނޭންސް ކޮށްދެނީ މަދުވެގެން 10 ބުރިއަށް ނެގޭވަރުގެ ގޮތެއް ހަމަޖެހިގެން ކަމަށެވެ.
ވިލިމާލޭގައި ހަ ބުރިއަށްވުރެ މައްޗަށް އިމާރާތް ކުރުމާ ޕްލޭނިން މިނިސްޓްރީން ދެކޮޅެވެ.
އަކްރަމް ވިދާޅުވީ، ވިލިމާލެއަކީ މާލެއާ ހިލާފަށް ތިމާވެއްޓާ ރައްޓެހި ލޭންޑް ޔޫޒް ޕެލޭންތަކާއެކު އެކުލަވާލާފައި އޮތް ތަނެއް ކަމަށެވެ.
އަދި 10 ބުރިއަށް އިމާރާތްކޮށްފިނަމަ ވިލިމާލެއަށް މީހުން ތޮއްޖެހި، ގިނަ ދަތިތަކެއް ނުކުންނާނެކަން ވެސް އަކްރަމް ފާހަގަކުރެއްވި އެވެ.
