ބޭނުންނުކުރާ ކޮންޓެއިނަރުތަކުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ހުޅުމާލޭ ފޭސް ވަންގައި ތަރައްގީކުރަމުންދާ ކޮންޓެއިނާ ޕާކުގެ މަސައްކަތް މި މަހު ނިމޭނެ ކަމަށް އެ ކުންފުނިން ބުނެފި އެވެ.
ރާއްޖެއަށް މުޅިން އާ ކޮންސެޕްޓުގެ މި ޕާކަކީ ކޮންޓެއިނަރުތައް އުކާލުމުގެ ބަދަލުގައި އެހެން ބޭނުމެއްކޮށްގެން ހުޅުމާލޭ ރަށްވެހިންނަށް ތަފާތު އާ ކަމެއް ތައާރަފުކުރުމުގެ ބޭނުމުގައި އެޗްޑީސީން ހަރަދުކޮށްގެން ކުރާ މަސައްކަތެކެވެ.
މި ކޮންޓެއިނަރު ޕާކުގައި ޖުމްލަ ހަތް ކޮންޓެއިނަރު ބޭނުންކޮށްފައިވާއިރު، އެ ކޮންޓެއިނަރުތައް ބޭނުންކުރާނީ ކެފޭތަކާއި، ކޯ ވާކިން ސްޕޭސްތަކާއި އެގްޒިބިޝަން އޭރިއާއެއްގެ ގޮތުގަ އެވެ.
- ކެފޭ ހަދަން ހަތަރު ކޮންޓެއިނަރު
- ފްރީލާންސަރުން މަސައްކަތްކުރަން ކޯ ވާކިން ސްޕޭސް ގޮތުގައި ދެ ކޮންޓެއިނަރު
- ފަންނުވެރިން މައުރަޒުކުރަން އެގްޒިބިޝަން ސްޕޭސްއަށް އެއް ކޮންޓެއިނަރު
ޕާކުގެ މަސައްކަތާ ގުޅިގެން އެޗްޑީސީގެ އޮފިޝަލަކު "އަދަދު" ނޫހަށް ވިދާޅުވީ ކޮންޓްރެކްޓަރު މަސައްކަތްތައް އެއްކޮށް ނިމުމުން ދެން އޮންނާނީ އެޗްޑީސީން ޕާކުގެ އެހެނިހެން މަސައްކަތްތައް ކުރުން ކަމަށެވެ. އެއީ ކުޑަކުދިން ކުޅޭ ސަރަހައްދަކާއި މީހުން އިށީންނަން ގޮނޑިތަކާއި ޕާކު ފެހިކުރުމުގެ މަސައްކަތެވެ.
އެޗްޑީސީގެ ވިސްނުމަކީ ކެފޭ ހިންގަން ބީލަން އުސޫލުން ބަޔަކާ ހަވާލުކުރާށެވެ. އަދި ކޮންޓެއިނަރު ކުއްޔަށް ނަގާ ފަރާތުން ބޭނުންވާ ކޮންސެޕްޓަށް ފިނިޝަން ނިންމާލުމުގެ ފުރުސަތު ލިބޭނެ ކަމަށް އޮފިޝަލް ވިދާޅުވި އެވެ.
މި ޕާކު ހުންނަނީ ފޭސްވަންގައި ހުންނަ "ރެޑްވޭވް މެގަ މޯލް" ބިއްދޮށުގަ އެވެ.
