ޕާކިސްތާނުގެ ކުރީގެ ބޮޑު ވަޒީރު އިމްރާން ހާންއާ ދެކޮޅަށް ޓެރަރިޒަމް މަނާ ކުރުމުގެ ގާނޫނުގެ ދަށުން ފުލުހުން ތަހުގީގު ހިންގަން ފަށައިފި އެވެ.
އިމްރާން ހާން ދާދި ފަހުން ފުލުހުންނާއި ޖުޑިޝަރީއަށް ތުހުމަތު ކުރެއްވީ އެމަނިކުފާނުގެ ގާތް ބޭފުޅަކު ހައްޔަރުކޮށް ލާއިންސާނީ އަނިޔާކޮށްފައިވާ ކަމަށެވެ.
ތަހުގީގުގެ ބޭނުމަށް އިމްރާން ހާން ހައްޔަަރުކޮށްފި ނަމަ، މަޑުން ނުތިބޭނެކަމުގެ އިންޒާރާ އެކު އެމަނިކުފާނުގެ ސަޕޯޓަރުން އެމަނިކުފާނުގެ ގެކޮޅު ކައިރިއަށް ޖަމާވި އެވެ.
ހައްޔަރު ކުރުމުގެ ކުރިން ލިބިދޭ ކަފާލާތުގެ މުއްދަތެއް އިމްރާން ހާންއަށް ދީފައި ވަނީ އަންނަ ބުރާސްފަތި ދުވަހާ ހަމައަށެވެ.
ގެކޮޅު ކައިރީގައި ތިބި ފުލުހުން ބުނީ އެ ތަނަށް ދިޔައީ އިމްރާން ހައްޔަރު ކުރަން ނޫން ކަމަށާއި އެ ތަނުގެ އަމަން އަމާންކަަން ބެލެހެއްޓުމަށް ކަމަށެވެ.
އިމްރާން ހާންއަށް ތާއީދު ކުރާ ސިޔާސީ ފަރާތްތަކުން ބުނީ އެމަނިކުފާނު ހައްޔަރު ކުރުން ވާނީ "ރަތް ރޮނގެއް" ހުރަސް ކުރުމަށް ކަމަަށެވެ.
"އިމްރާން ހާން ހައްޔަރުކޮށްފި ނަމަ އަޅުގަނޑުމެން ނިކުމެ އިސްލާމްއާބާދް ހިފާނަން،" ކުރީގެ މިނިސްޓަރު އަލީ އަމީން ގަންދަޕޫރް ވިދާޅުވި އެވެ.
މިދިޔަ އެޕްރީލް މަހު ޕާލިމެންޓުން އިތުބާރު ނެތް ކަމަށް ކަނޑައަޅައި މަގާމުން ދުރުކޮށްފައިވާ އިމްރާން ހާން ގެންދަވަނީ މެދުކެނޑުމެއް ނެތި ސަރުކާރާ ދެކޮޅަށް މުޒާހަރާ ކުރަމުންނެވެ.
