މާލެ އާއި ވިލިމާލެ، ތިލަފުށްޓާ އެކު ގުޅައިލުމަށް އަޅާ ބްރިޖްގެ މަސައްކަތުގައި ބޭނުންކުރާ ޕްލެޓްފޯމެއް، ވިލިމާލޭ ފަރަށް އަރާފައި އޮންނަތާ އެއް ހަފްތާ ވީއިރު އެ އުޅަނދު ނެގުމުގެ މަސައްކަތް ކުރިއަށް ނުދާތީ ރައްޔިތުންގެ މަޖިލީހުގެ ވިލިމާލެ ދާއިރާގެ އެމްއެންޕީ މެމްބަރު އަހުމަދު އުޝާމް މިއަދު މަޖިލީހަށް ކުއްލި މައްސަލައެއް ހުށަހަަޅުއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އުޝާމް ހުށަހެޅުއްވި ކުއްލި މައްސަލައިގައި ވިދާޅުވީ ވިލިމާލޭ ފަރުން ޕްލެޓްފޯމް ނަގަން މަސައްކަތްކުރަމުން ނުދާތީ އިއާދަނުކުރެވޭ ވަރުގެ ބޮޑެތި ގެއްލުންތައް ވިލިމާލެ ފަރަށް ލިބެމުންދާ ކަަމަށެވެ. އެފަދަ ކަންތައްތައް ތަކުރާރުވިޔަ ނުދިނުމަށް ޓަކައި ބްރިޖް ޕްރޮޖެކްޓްގެ މަސައްކަތުގެ ފެންވަރު ސަރުކާރުން ކައިރިން ބަލަން ޖެހޭ ކަަމަށް ވެސް ކުއްލިމަސައްލައިގައި އުޝާމް ވިދާޅުވި އެވެ.
އުޝާމް ހުށަހެޅުއްވި ކުއްލި މައްސަލަ މަޖިލީހަށް ބަލައިގަތީ އެކަމާ ގުޅޭގޮތުން ނެގި ވޯޓުގައި ބައިވެރިވެވަޑައިގެންނެވި 19 މެމްބަރުންގެ ތެރެއިން 16 މެމްބަރަކު ވޯޓު ދެއްވައިގެންނެވެ. އެ މައްސަލަ ބަލައިގަންނަން ނުފެންނަ ކަމަށް އެއް މެމްބަރަކު ވޯޓު ދެއްވި އިރު ވަކި ގޮތަކަށް ވޯޓު ނުދެއްވައި ދެމެމްބަރަކު ވޯޓު ދެއްވި އެވެ.
ކުއްލި މައްސަލަައިގެ ބަހުސްގެ ފުރަތަމަ ފުރުސަތުގައި އުޝާމް ވިދާޅުވީ ޕްލެޓްފޯމް ފަރަށް އެރުމުން، އެ އުޅަނދު އެތަނުން ނަގަން އަވަސް މަސައްކަތްތަކެއް ކުރި ނަމަ އެކަން ކުރުމުގެ ފުރުސަތު އޮތް ކަމަށެވެ. ޕްލެޓްފޯމް ފަރުން ނަގަން، ބްރިޖް އަޅާ ކުންފުނިން މަސައްކަތް ފެށީ ދެދުވަސް ފަހުން ކަމަށް ވެސް އޭނާ ވިދާޅުވި އެވެ.
"އެެހެން ނަމަވެސް އޭރުގައި އެ ޕްލެޓްފޯމްގެ ފައިތައް ހުރީ ގާތަކުގައި ވަރަށް ބޮޑަށް ހަރުލާފައި ކަމަށް ވާތީވެ، އޭތި ހަމަ އެއްގޮތަކަށް ވެސް ގުޑައިލާނެ ގޮތެއް ނުވި،" އުޝާމް ވިދާޅުވި އެވެ.
އުޝާމް ވިދާޅުވި ގޮތުގައި ބްރިޖްގެ މަޝްރޫއަކީ ވަރަށް ފައިސާހުރި މަޝްރޫއަކަށް ވިޔަސް، އެ މަޝްރޫއުގެ މަސައްކަތް ކުރިއަށް ދަނީ އެންމެ ރަނގަޅަށް ކަމަށް ގަބޫލުނުކުރެވޭ ކަމަށާއި އެއީ ދިމާވެފައި ހުރި ކަންކަމުން ކަމަށެވެ. ވިލިމާލެ ފަރަށް ޕްލެޓްފޯމް އެރުމަކީ އެފަދަ ކަމެއް ކަމަށާއި އެކަމުގައި ސުވާލު އުފެދޭ ކަންތައްތަކެއް އެބަހުރި ކަމަށް ވެސް އޭނާ ވިދާޅުވި އެވެ.
"މޫސުން ރަނގަޅު، ކަނޑުމަޑު ދުވަހެއްގައި އެވަރުގެ ބޮޑު ޕްލެޓްފޯމެއް، އެހާ ފަސޭހައިން ކަހާލީ ކޮން ސަބަބަކާ ހެދި ކަމެއް، ދައުލަތުގެ އެއްވެސް އިދާރާއަކުން އަދިވެސް ސާފުކޮށްދީފައެއް ވެސް ނުވޭ،" އުޝާމް ވިދާޅުވި އެވެ.
އޭނާ ވިދާޅުވި ގޮތުގައި ބްރިޖްގެ މަސައްކަތްކުރާ ކުންފުނިން ވެސް އެ ސުވާލުގެ ޖަވާބެއް އަދި ނުދެ އެވެ. ޕްލެޓްފޯމް ފަރަށް އެރުމުން އެތަނުން އެ ނަގަން އެކަށީގެންވާ މަސައްކަތެއް ނުކުރާ ކަމަށް ވެސް އޭނާ ތުހުމަތުކުރެއްވި އެވެ.
