ޕާކިސްތާނުގެ ކުރީގެ ބޮޑު ވަޒީރު އިމްރާން ހާންގެ ހިތާބުތައް ވަގުތުން ބްރޯޑްކާސްޓް ކުރުން އެ ގައުމުގެ އިލެކްޓްރޯނިކް މީޑިއާ ރެގިއުލޭޓަރީ އޮތޯރިޓީ (ޕެމްރާ) އިން މަނާކޮށްފި އެވެ.
މިދިޔަ އެޕްރީލް މަހު ޕާލިމެންޓުން އިތުބާރު ނެތް ކަމަށް ކަނޑައަޅައި މަގާމުން ދުރުކޮށްފައިވާ އިމްރާން ހާން ގެންދަވަނީ މެދުކެނޑުމެއް ނެތި ސަރުކާރާ ދެކޮޅަށް މުޒާހަރާ ކުރަމުންނެވެ.
ހޮނިހިރު ދުވަހު ވެރިރަށް އިސްލާމްއާބާދުގައި އެއްވުމެއް އޮތް އިރު، އިމްރާން ހާންގެ ހިތާބުތައް ވަގުތުން ޓީވީން ދެއްކުން މަނާ ކުރީ ހޮނިހިރު ދުވަހުގެ ރޭ ނެރުނު އެންގުމެއްގަ އެވެ.
ޓީވީ ޗެނަލްތަކަށް ފޮނުވި އެންގުމުގައި ޕެމްރާއިން ބުނީ އިމްރާން ހާން ގެންދަވަނީ އެއްވެސް ހަގީގަތެއް ނެތް ދޮގު ތުހުމަތުތައް ކުރައްވައި، ނަފުރަތު އުފައްދަމުން ކަމަށެވެ.
"ދައުލަތުގެ އިދާރާތަކާއި ފުލުހުންނާ ދެކޮޅަށް ދައްކަވާ ވާހަކަތަކުގެ ސަބަބުން އާއްމު މަސްލަހަތަށް ގެއްލުންވެ، ސުލްހައަށް ހުރަސް އެޅޭނެ."
އިމްރާން ހާންގެ ޕާޓީއިން ބުނީ ޕެމްރާގެ ނިންމުމަކީ ހިޔާލު ފާޅުކުރުމުގެ މިނިވަަން ކަމަށް ހުރަސް އަޅަައި، ނޫސްވެރިންނަށް ބިރު ދެއްކުމުގެ އަމަލެއް ކަމަށެވެ.
