އިންޑިއާގެ އުތުރާއި އިރުމައްޗަށް ފާއިތުވި ތިން ދުވަހު ބޯކޮށް ވާރޭވެހި ހިނގި ބިންގަނޑު ކަނޑައިގެން ދިޔުމާއި ފެންބޮޑުވުމުގެ ހާދިސާތަކުގައި 50 މީހުން މަރުވެއްޖެ އެވެ.
ބޯވާރޭގެ އަސަރު އެތައް ސަތޭކަ އަވަށަކަށް ކޮށްފައިވާ އިރު، ގެތައް އޮޔާ ގޮސް، ގިނަ ބަޔަކު ފެންގަނޑުގައި ތިބެން ޖެހުނީ ސަލާމަތް ކުރަން އަންނާނެ އިރެއްގެ އިންތިޒާރުގަ އެވެ.
ހިމަލަޔާ ފަރުބަދަ ކައިރީގައި އޮންނަ ހިމާޗަލް ޕްރަދޭޝް ސްޓޭޓަށް ކުރި ވިއްސާރައިގައި ތިން ދުވަސް ތެރޭގައި 36 މީހުން މަރުވި އެވެ.
އަވައްޓެރި އުއްތަރްހާންދް ސްޓޭޓުން ހަތަރު މީހުން މަރުވެ، 13 މީހުން ގެއްލިފައިވެ އެވެ. އިރުމަތީ އޮޑިއްޝާގައި ހަ މީހުން މަރުވި އެވެ.
އޮޑިއްޝާގައި ފެންބޮޑުވުމުގެ އަސަރު 800،000 މީހުންނަށް ކޮށްފައިވާާ އިރު، 120،000 މީހުން ވަނީ ގެދޮރު ދޫކޮށް ދާން ޖެހިފަ އެވެ.
މި މަހުގެ ކުރީކޮޅު އިންޑިއާގެ މޫސުމާ ބެހޭ އޮފީހުން ބުނީ އޯގަސްޓް އަދި ސެޕްޓެމްބަރު މަހު އެވްރެޖް މިންވަރަކަށް ވާރޭވެހޭނެ ކަމަށް ބެލެވޭ ކަމަށެވެ.
އިންޑިއާގެ ދަނޑުވެރިކަމަށް ވިއްސާރަ މޫސުން ވަރަށް މުހިއްމެވެ. އެ ގައުމުގެ 2.7 ޓްރިލިއަން ޑޮލަރުގެ އިގްތިސާދުގެ 15 ޕަސެންޓް ހިއްސާކުރަނީ ދަނޑުވެރިކަމެވެ.
