ސްވިޑަންގެ ޝޮޕިން ސެންޓަރެއްގައި ހިނގި ބަޑި ޖެހުމުގެ ހާދިސާއެއްގައި އެކަކު މަރުވެ، އިތުރު މީހަކަށް ހޮސްޕިޓަލުގައި ފަރުވާދެމުންދާ ކަމަށް ފުލުހުން ބުނެފި އެވެ.
ސްވިޑަންގެ ޓީވީ4 ޗެނަލްއިން ބުނީ މާލްމޯ ސިޓީގެ އެމްޕޯރިއާ ޝޮޕިން މޯލް ތެރޭގައި 20 ފަހަރު ބަޑި ޖެހި އަޑު އިވުނު ކަމަށެވެ.
އެކަމުގެ ތުހުމަތު ކުރެވޭ ފުރާވަރު އުމުރުގެ ފިރިހެން ކުއްޖަކު މިހާރު ހުރީ ފުލުހުން ހައްޔަރުކޮށްފަ އެވެ. ބެލެވޭ ގޮތުގައި އެ ހާދިސާ ގުޅިފައި ވަނީ ގޭންގުތަކުގެ މައްސަލައާ އެވެ.
އަންނަ މަހު ސްވިޑަންގެ އާއްމު އިންތިހާބު އޮންނަ އިރު، ކެމްޕެއިންގައި އާއްމުން އެންމެ ބޮޑަށް ހުށަހަޅަމުންދާ އެއް ކަންބޮޑުވުމަކީ ގޭންގުތަކުގެ ހަމަނުޖެހުމެވެ.
ޔޫރަޕްގައި ނިސްބަތުން އެންމެ ގިނައިން ބަޑި ޖަހައި މީހުން މަރުވާ އެއް ގައުމަކީ ސްވިޑަން އެވެ. ކޮންމެ އަހަރަކު ވެސް ސްވިޑަންގެ މިލިއަން މީހުންގެ ތެރެއިން ހަތަރު މީހުން މަރުވަނީ ބަޑީގެ ސަބަބުންނެވެ.
ބޮޑެތި ސިޓީތަކުގެ އިތުރުން ދުރު ހިސާބުތަކުގައި ވެސް ބަޑީގެ ހަމަލާތައް ވަނީ އިތުރުވެފަ އެވެ. އެކަމުގެ ސަބަބުތަކުގެ ތެރޭގައި ހިމެނެނީ މަސްތުވާތަކެތި ބޭނުން ކުރުން އިތުރުވުމާއި، ފަގީރުންނާއި މުއްސަނދިންގެ ފަރަގު ބޮޑުވަމުން ދިޔުމާއި، ސްވިޑަންއަށް ހިޖުރަކޮށްގެން ދިރިއުޅޭ މީހުންނާ މެދު އޮންނަ ތަފާތުކުރުމެވެ.
