ޗައިނާ އާއި ކެނެޑާއަށް ނިސްބަތްވާ ބިލިއަނަރަކު ޗައިނާގައި 13 އަހަރަށް ޖަލަށް ހުކުމްކޮށް، އޭނާގެ ކުންފުނި އަށް ބިލިއަން ޑޮލަރުން ޖޫރިމަނާކޮށްފި އެވެ.
ޝަންހާއީގެ ކޯޓަކުން ބުނީ ޝިއާއޯ ޖިއަންހުއާ އަދި އޭނާގެ ޓުމޯރޯ ހޯލްޑިންގްސް ކުންފުނީގެ މަައްޗަށް ރިޝްވަތާއި ހިޔާނާާތުގެ ކުށް ސާބިތުވާ ކަމަށެވެ.
ޝިއާއޯއަކީ ޗައިނާގެ އެންމެ ބޮޑު އެއް މަހުޖަނެވެ. އޭނާ އާއްމު ތަނަކުން އެންމެ ފަހުން ފެނުނީ 2017 ވަނަ އަހަރު އެވެ. އެއީ ހޮންކޮންގެ ލަގްޒަރީ ހޮޓަލަކުން ކާރަކަށް އަރުވައިގެން ގެންދަނިކޮށެވެ.
އޭގެ ފަހުން އޭނާގެ އެއްވެސް ހަބަރެއް ނުވާ އިރު، މިދިޔަ ޖުލައި މަހު ކެނެޑާ އެމްބަސީއިން ބުނީ އޭނާއާ ދެކޮޅަށް ޝަރީއަތެއް ހިންގަން ތައްޔާރުވަމުންދާ ކަމަށެވެ.
ޝަރީއަތް ފެށީ ޖުލައި ހަތަރު ވަނަ ދުވަހުގަ އެވެ. ކޯޓުން ބުނީ ޝިއާއޯ އާއި އޭނާގެ ކުންފުނިން ވެސް ކުށަށް އިއުތިރާފްވި ކަމަށެވެ.
ރިޕޯޓުތައް ބުނާ ގޮތުން ޝިއާއޯއަކީ ވެރިކަަން ކުރާ ކޮމިއުނިސްޓް ޕާޓީގެ އެންމެ އިސްވެރިންނާއި ރަައީސް ޝީ ޖިންޕިންއާ ކުރިން ގާތް ގުޅުމެއް އޮތް މީހެކެވެ.
