ފިންލޭންޑްގެ ބޮޑު ވަޒީރު ސަންނާ މަރިން ޕާޓީއެއްގައި އުޅުއްވާ މަންޒަރު ފެންނަ ވީޑިއޯއެއް އާއްމުވެ ފާޑުކިޔުން އަމާޒުވުމާ ގުޅިގެން މަސްތުވާ ތަކެއްޗަށް ޓެސްޓުކޮށްފި އެވެ.
ބެލެވޭ ގޮތުގައި އާއްމުވި ވީޑިއޯއަކީ ސޯޝަލް މީޑިއާގައި މީހަކު ޕޯސްޓު ކުރި ވީޑިއޯއެކެވެ. އެ ވީޑިއޯއިން ފެންނަނީ މަރިން އާއި އެކުވެރިން އަދި ބައެއް ސެލެބްރިޓީން ނަށައި ލަވަ ކިޔައި އުޅޭ މަންޒަރެވެ.
ވީޑިއޯ އާއްމުވުމުން އިދިކޮޅު ޕާޓީތަކުގެ ފާޑުކިޔުން އަމާޒުވެފައިވާ އިރު، އެއް އިދިކޮޅު ލީޑަރު ގޮވާލެއްވީ އެކަމަނާ މަސްތުވާތަކެއްޗަށް ޓެސްޓު ކުރުމަށެވެ.
އުމުރުން 36 އަހަރުގެ މަަރިން ވިދާޅުވީ އެއްވެސް މަސްތުވާއެއްޗެއް ނުނަަންގަވާ ކަމަށާއި ނަމަވެސް ރާ ހިއްޕަވައި، ޕާޓީގައި ފޯރި ނެންގެވި ކަމަށެވެ.
ހުކުރު ދުވަހު ނޫސްވެރިންނަށް މައުލޫމާތު ދެއްވަމުން މަރިން ވިދާޅުވީ މަސްތުވާ ތަކެއްޗަށް ޓެސްޓުކޮށްފައިވާ ކަމަށާއި އަންނަ ހަފްތާގައި ނަތީޖާ ލިބޭނެ ކަމަށެވެ.
އަދި މަސްތުވާތަކެތި ބޭނުން ނުކުރާ ކަމަށާއި ގާނޫނާ ހިލާފު އެއްވެސް ކަމެއް ނުކުރާ ކަމަށް ވެސް އެކަމަނާ ތަކުރާރުކޮށް ވިދާޅުވި އެވެ.
"އަޅުގަނޑު ފުރާވަރު އުމުރުގައި ވެސް އެއްވެސް ބާވަތެއްގެ މަސްތުވާއެއްޗެއް ބޭނުންކޮށްފައެއް ނުވާނެ،" މަރިން ވިދާޅުވި އެވެ.
އެކަމަނާ ވިދާޅުވީ މަސްތުވާ ތަކެއްޗަށް ޓެސްޓު ކުރަން ނިންމީ ބައެއް ފަރާތްތަކުގެ ކަންބޮޑުވުންތައް ފޮހެލުމުގެ ބޭނުމުގައި ކަމަށެވެ.
ކުރިން މަރިންއަކީ ސަރުކާރެއްގެ އެންމެ އިސްވެރިޔާގެ ގޮތުގައި ހުންނަވާ އެންމެ ޒުވާން ލީޑަރެވެ. މިހާރު އެންމެ ޒުވާން ވެރިޔަކީ ޗިލީގެ ރައީސް ގެބްރިއެލް ބޮރިކް އެވެ.
މީގެ ކުރިން ވެސް މަރިން މިޔުޒިކް ފެސްޓިވަލްތަކުގައި އުޅުއްވާ ފޮޓޯތައް އާއްމުވެފައިވާ އިރު، އެކަމަނާ ޕާޓީތަކަށް ވަޑައިގަންނަވާކަން ވެސް އޮންނަނީ ހާމަކޮށްފަ އެވެ.
މިދިޔަ އަހަރު ކޮވިޑަށް ޕޮޒިޓިވް މީހަކާ ކްލޯޒް ކޮންޓެކްޓްވުމަށް ފަހު، ކްލަބަކަށް ވަޑައިގެންނެވި މައްސަލަ ފެންމަަތިވެ އެކަމަނާ މައާފަށް އެދިވަޑައިގެންނެވި އެވެ.
