ދިގު އިންތިޒާރަކަށްފަހު މިއަދު އޯލެވެލް އިމްތިހާނުގެ ނަތީޖާ ދޫކުރަން ފަށައިފި އެވެ.
މިއަހަރު މޭ މަހު ހެދި އޯލެވެލް އަދި އެސްއެސްސީ އިމްތިހާނުގެ ނަތީޖާ ދޫކުރަން ފަށާފައި ވަނީ މިއަދު މެންދުރެވެ. އެގޮތުން މެންދުރު 12:00 އިން ފަށައިގެން އެ ދަރިވަރަކު އިމްތިހާނު ހެދި ސެންޓަރަކުން ނަތީޖާ ދޫކުރަމުން ދާނެ ކަމަށް ޑިޕާޓްމަންޓް އޮފް ޕަބްލިކް އެގްޒަމިނޭޝަނުން ބުނެ އެވެ.
މިއަހަރުގެ އޯލެވެލް އިމްތިހާނު ހަދާފައި ވަނީ މޭ މަހުގެ ހަަތަރަކުން ފެށިގެން ޖޫން 10 ވަނަ ދުވަހާ ދެމެދު އެވެ. ނަތީޖާ ދޫކުރަން ފަށާފައި މިވަނީ އިމްތިހާނު ނިމުނުތާ ދެ މަސް ދުވަހަށްވުރެ ގިނަ ދުވަސް ފަހުންނެވެ.
މިއަހަރުގެ އިމްތިހާނުތައް ރާއްޖޭގެ 239 ސެންޓަރަކާއި ޑިޕާޓްމަންޓް އޮފް ޕަބްލިކް އެގްޒޭމިނޭޝަންސްގެ ބެލުމުގެ ދަށުން ސްރީލަންކާގައި ހުންނަ މޯލްޑިވްސް ކަލްޗަރަލް ސެންޓަރުގައި އަދި މެލޭޝިޔާގައި ހުންނަ މޯލްޑިވްސް ސެންޓަރުގައި ވެސް ކުރިއަށް ގެންދިޔަ އެވެ. ޖުމްލަ 5،393 ދަރިވަރުން މިއަހަރުގެ އޯލެވެލް އިމްތިހާނުގައި ބައިވެރިވި އެވެ.
ރާއްޖޭގައި މީގެ ކުރިން ސާނަވީ އިމްތިހާނު ކުރިޔަށްގެންދަނީ ކޮންމެ އަހަރެއްގެވެސް އޮކްޓޯބަރު އަދި ނޮވެމްބަރުގަ އެވެ. ނަމަވެސް, ކޮވިޑް ގެ ސަބަބުން 2020 ވަނަ އަހަރު ސާނަވީ އިމްތިހާނު ފަސްކޮށް، މިހާރު އާ އަހަރުގެ ކިޔެވުން ފަށަނީ ކޮންމެ އަހަރެއްގެ މޭ ގަ އެވެ.
