މިޔަންމާގެ ކުރީގެ ލީޑަރު އަންގް ސަން ސޫކީގެ މައްޗަށް ކޮރަޕްޝަންގެ ކުށް ސާބިތުވެ، އިތުރު ހަ އަހަރަަށް ޖަލަށް ހުކުމްކޮށްފި އެވެ.
އެކަމަނާއަށް ކުރިން ކޮށްފައިވާ ހުކުމްތަކާ އެކު ޖަލުގައި 17 އަހަރު ހޭދަކުރައްވަން ޖެހޭނެ އެވެ. މިދިޔަަ އަހަރު ފެބްރުއަރީ މަހު ހިންގި ބަގާވާތަށް ފަހު ސޫކީ ހުންނަވަނީ ބަންދުގަ އެވެ.
ކޮރަޕްޝަންގެ އިތުރުން ދައުލަަތުގެ ސިއްރުތަކާ ބެހޭ ގާނޫނާާ ހިލާފުވުމާއި އިންތިހާބުގައި މަކަރު ހެދިކަމުގެ ތުހުމަތުގައި ސޫކީއާ ދެކޮޅަށް ދައުވާ އުފުލި އެވެ.
ޝަރީއަތުގެ އަޑުއެހުންތަކަށް ނޫސްވެރިންނަަށް ނުވަދެވޭ އިރު ގާނޫނީ ވަކީލުންނަށް ވެސް ނޫސްތަކަށް މައުލޫމާތު ދިނުން މަނަ އެވެ.
އިތުރު ހަ އަހަރަށް ޖަލަަށް ހުކުމް ކުރުމުން، އެމެރިކާއިން ވަނީ އެކަން ކުށްވެރިކޮށް، ސޫކީ ވަގުތުން މިނިވަން ކުރުމަށް ގޮވާލާފަ އެވެ.
މިޔަންމާގެ ވެރިކަމުން ސޫކީ ދުރުކުރީ 2021 ވަނަ އަހަރުގެ ފެބްރުއަރީ މަހު ހިންގީ އަސްކަރީ ބަގާވާތަކުންނެވެ. އޭގެ ފަހުން އެކަމަނާ ހުންނަވަނީ ބަންދުކޮށްފަ އެވެ.
މިޔަންމާގައި ހިންގި ބަގާވާތާ ދެކޮޅަށް ރައްޔިތުން ނުކުމެ އަޑު އުފުލަން ފެށުމުން މިހާތަނަށް 1،700 އަށް ވުރެ ގިނަ މީހުން މަރުވެ، 13،000 އަށް ވުރެ ގިނަ މީހުން ހައްޔަރުކޮށްފައިވެ އެވެ.
