އުތުރު ކޮރެއާއާ އެކު ގުޅުން ފުޅާކުރަން ވައުދުވެފައިވާ ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
އުތުރު ކޮރެއާގެ ލީޑަރު ކިމް ޖޮންގް އުންއަށް ފޮނުއްވި ސިޓީއެއްގަައި ޕުޓިން ވިދާޅުވީ ގުޅުން ފުޅާކުރުމުން ދެ ގައުމުގެ މަސްލަހަތަށް ވެސް ރަނގަޅު ވާނެ ކަމަށެވެ.
ޖަވާބުގައި ކިމް ފޮނުއްވި ސިޓީގައި ވިދާޅުވީ ދެ ވަނަ ބޮޑު ހަނގުރާމައިގައި ޖަޕާން ބަލިކުރަން އެކުގައި ކުރި މަސައްކަތުން ބަދަހި އެކުވެރިކަމެއް ގާއިމްވެފައިވާ ކަމަށެވެ.
އެ އެކުވެރިކަން ދުވަހަކަށް ވުރެ ދުވަހެއް ވަރުގަދަވަމުން ދާނެ ކަމަށް ކިމް ވިދާޅުވި އެވެ.
އޭގެ އިތުރުން ހަތުރުންނާ ދެކޮޅަށް ކުރާ މަސައްކަތުން ސްޓްރެޓެޖިކް އަަދި ޓެކްޓިކަލް ގުޅުން ކުރިއަރައި، އެކުގައި މަސައްކަތް ކުރުމުގެ ގާބިލްކަން އިތުރުވަމުންދާ ކަމަށް ކިމް ވިދާޅުވި އެވެ.
ހަތުރުންނަކީ ކޮން ބަޔެއްކަން ފާހަގަކޮށްފައި ނުވި ނަމަވެސް އުތުރު ކޮރެއާއިން އާއްމުކޮށް ހަތުރުންގެ ގޮތުގައި ނިސްބަތް ކުރަނީ އެމެރިކާ އަދި އެމެރިކާއަށް އެއްބާރުލުންދޭ ގައުމުތަކަށެވެ.
