ރަޝިއާގެ ތެލާއި ބޯޓުދެލި ގިނައިން ގަންނާތީ ހުޅަނގުގެ ގައުމުތަކުގެ ޕްރެޝަރެއް ކުރިމަތި ނުވާ ކަމަަށް އިންޑިއާއިން ބުނެފި އެވެ.
ދުނިޔޭގައި ބޯޓުދެލި ތިން ވަނައަށް އެންމެ ގިނައިން އިމްޕޯޓް ކުރަނީ އިންޑިއާއިންނެވެ. އަދި ޗައިނާ ފަހަތަށް ޖެއްސުމަށް ފަހު، ރަޝިއާގެ ތެޔޮ އެންމެ ގިނައިން ގަންނަ ގައުމަކީ ވެސް މިހާރު އިންޑިއާ އެވެ.
އެކަމަކު މިދިޔަ ފެބްރުއަރީ މަހު ޔޫކްރެއިންގައި ހަނގުރާމަ ފެށުމުގެ ކުރިން އިންޑިއާއިން ރަޝިއާގެ ތެޔޮ ގަނެފައި ވަނީ ވަރަށް މަދުންނެވެ.
އިންޑިއާއަށް އެންމެ ގިނައިން ހަތިޔާރު ފޯރުކޮށްދޭ ރަޝިއާއާ ދުރަށް ޖެއްސުމަަށް އެމެރިކާއިން ބޭނުންވެ އެވެ. އެކަމަކު އިންޑިއާއިން މިހާތަނަށް ޔޫކްރެއިން ހަނގުރާމަ ކުށްވެރިކޮށްފައެއް ވެސް ނުވެ އެވެ.
"ތެލާއި އެހެނިހެން ކަންކަމާ ގުޅޭ ގޮތުން ގޮތް ނިންމަނީ އަަޅުގަނޑުމެންނަަށް ހަކަތަ ބޭނުންވާ މިންވަރަށް ބަލައިގެން،" އިންޑިއާ ފޮރިން މިނިސްޓްރީގެ ތަރުޖަމާނު އަރިންދަމް ބަގްޗީ ވިދާޅުވި އެވެ.
މިދިޔަ މަހު އެމެރިކާގެ ޓްރެޝަރީ ސެކެޓްރީ ޖެނެޓް ޔެލެން ވިދާޅުވީ ރަޝިއާގެ ތެލުގެ އަގު ކޮންޓްރޯލް ކުރުމަށް އިންޑިއާއާ އެކު މަަޝްވަރާ ކުރަމުންދާ ކަމަށެވެ.
ނަމަވެސް ބަގްޗީ ވިދާޅުވީ އަގު ކޮންޓްރޯލް ކުރުމަަށް އެއްވެސް ހުށަހެޅުމެއް އޮތްކަން ނޭނގޭ ކަމަށާއި މިކަމުގައި އިންޑިއާއަަށް އެއްވެސް ޕްރެޝަރެއް ނެތް ކަަމަށެވެ.
ރަޝިއާއިން ބުނެފައި ވަނީ ޕްރައިސް ކެޕް ނުވަތަ ތެލުގެ އަގު ކޮންޓްރޯލް ކުރަން ނިންމާ އެއްވެސް ގައުމަކާ އެކު މުއާމަލާތެއް ނުހިންގާނެ ކަމަށެވެ.
