ގިނަ ހިޔާލީ ވާހަކަތަކެއް ލިޔެ، ވާހަކައިގެ ދުނިޔޭގެ އެންމެ ޝަރަފުވެރި އެވޯޑް ހާސިލްކޮށްފައިވާ އުމުރުން 75 އަހަރުގެ ސަލްމާން ރުޝްދީ ސްޓޭޖް މަތީގައި ހުއްޓާ ވަޅިން ހަމަލާ ދިނީ ހުކުރު ދުވަހުގެ ރޭގަ އެވެ.

ލިޔުންތެރިންނާ ގުޅޭ ހާއްސަ އިވެންޓެއްގައި ހުއްޓައި، މީހަކު ދުވެފައި ސްޓޭޖަށް އަރައި، ވަޅިން ހަމަލާ ދިނީ އޭނާގެ ކަރާއި ބަނޑަށެވެ. އިވެންޓުގެ ސްޓާފުންނާއިި އޯޑިއެންސް މެމްބަރުން އެ މީހާގެ ހަތަރެސްފައިގައި ހިފަހައްޓައި ބިންމަތީގައި ބޭއްވި ނަމަވެސް، އޭނާ ގަދަ ހަދަމުން ދިޔައީ ދެ ވަނަ ފަހަރަކަށް ވެސް ސަލްމާން ރުޝްދީގެ ގަޔަށް ވަޅި ހެރުމަށެވެ.

ބެލެވޭ ގޮތުގައި އެ މީހާއަކީ ސަލްމާން ރުޝްދީ ދެކެ އިންތިހާ ރުޅި އަންނަ އެތައް މިލިއަން މުސްލިމުންގެ ތެރޭގައި ހިމެނޭ މީހެކެވެ. ކާމިޔާބު ދިގު ކެރިއަރެއް ބިނާކޮށްފަައިވާ ލިޔުންތެރިޔާ ދެކެ އެހާ ގިނަ ބަޔަކު ރުޅި އަންނަނީ ކީއްވެ ހެއްޔެވެ؟

ސަލްމާން ރުޝްދީއަކީ 1947 ވަނަ އަހަރު އިންޑިއާގެ މުމްބާއީއަށް އުފަަންވި މީހެކެވެ. އޭނާ އިނގިރޭސިވިލާތަށް ހިޖުރަ ކުރީ އުމުރުން 14 އަހަރުގަ އެވެ. އެ ތަނުގައި ސްކޫލަަށް ގޮސް، ކެމްބްރިޖްގެ ކިންގްސް ކޮލެޖުން ހިސްޓްރީއިން އޮނާާޒް ޑިގްރީ ހޯދި އެވެ.

ސަލްމާން ރުޝްދީ.

އޭގެ ފަހުން އިނގިރޭސި ރައްޔިތަކަށް ބަދަލުވި އެވެ. މިހާރު އޭނާގެ އަތުގައި އިނގިރޭސި އަދި އެމެރިކާ ޕާސްޕޯޓް އޮވެ އެވެ.

ސަލްމާން ރުޝްދީގެ މަންމަ އާއި ބައްޕައަކީ މުސްލިމުން ނަމަވެސް، އެއީ ދީނާ ދުރު ބަޔެކެވެ. އިނގިރޭސި ރައްޔިތުކަން ލިބުމާ އެކު ސަލްމާން ރުޝްދީ އިސްލާމްދީނާ ފެޔަށް ޖެހި، ކަލަކު ވާ ކަމަށް ގަބޫލު ނުކުރާ މީހަކަށް ބަދަލުވި އެވެ.

އޭނާ ކިޔަވައި ނިމި އެންމެ ފުރަތަމަ އުޅުނީ އެކްޓަރަކަށެވެ. އޭގެ ފަހުން ކޮޕީރައިޓަރަކަށް އުޅެ، ހިޔާލީ ވާހަކަތައް ލިޔަން ފެށި އެވެ.

އޭނާގެ ފުރަތަމަ ތިން ވާހަކައަކީ 1975 ވަނަ އަހަރު ނެރުނު ގްރަައިމަސް، 1981 ވަނަ އަހަރު ނެރުނު މިޑްނަައިޓްސް ޗިލްޑްރެން އަަދި 1983 ވަނަ އަހަަރު ނެރުނު ޝޭމް އެވެ. އެ ތިން ފޮތަށް ވެސް ގިނަ ތައުރީފް ލިބުނެވެ.

އޭގެ ތެރެއިން ދެ ވަނައަށް ނެރުނު މިޑްނައިޓްސް ޗިލްޑްރެންއަށް ބުކާ ޕްރައިޒް ލިބުނެވެ.

ސެޓެނިކް ވާސަަސް ފޮތުގެ ކޮޕީއެއް.

އޭނާއަށް ނުރުހުން އަމާޒުވާން ފެށީ 1988 ގައި ހަތަަރު ވަނައަަށް ނެރުނު ސެޓެނިކް ވާސަސް ފޮތާ ގުޅިގެންނެވެ. އެ ފޮތުގެ ސުރުހީއަކީ އިސްލާމްދީނާއި ކީރިތި ގުރުއާނަށް ފުރައްސާރަ ކުރާ ސުރުހީއެކެވެ. އެ ފޮތުގެ ބައެއް ވާހަކަތަކުގައި ގެނެސްދީފައި ވަނީ ކީރިތި ރަސޫލާ މުހައްމަދުގެފާނުގެ މައްޗަަށް ބިނާކޮށްފައިވާ ކެރެކްޓާއެކެވެ. އަދި ފޮތުގައި އުޅޭ ދެ ހަށިވިއްކާ އަންހެނުންނަށް ކީރިތި ރަސޫލާގެ ދެ އަނބިކަނބަލުންގެ ނަން ދީފައިވެ އެވެ.

އެ ފޮތް އެންމެ ފުރަތަމަ ވެސް މަނާ ކުރީ އިންޑިއާގަ އެވެ. އޭގެ ފަހުން މުސްލިމް ގިނަ ގައުމުތަކާއި ދެކުނު އެފްރިކާއިން ވެސް އެ ފޮތް މަނާކުރި އެވެ.

ސަލްމާން ރުޝްދީ މަރާލަން ގޮވައި އިންޑިއާާގައި ބޭއްވި މުޒާހަރާއެއް.

ފޮތް ނެރުނުތާ މާ ގިނަ ދުވަސްތަކެއް ނުވެ، އެކި ގައުމުތަކުގައި މުސްލިމުން މުޒާހަރާ ކުރަން ފެށި އެވެ. އަދި ތެހްރާންގައި ހުންނަ އިނގިރޭސި އެމްބަސީއަށް ގާ އުކައި، އިނގިރޭސިވިލާތާއި އިރާނާ ދެމެދު ޑިޕްލޮމެޓިކް ގުޅުން ކަނޑާލި އެވެ.

އިރާނުގެ ރޫހާނީ ލީޑަރު އާޔަތުﷲ ރޫހުﷲ ހާމަނާއީ އެ ފޮތް ކުށްވެރިކޮށް، ސަލްމާން ރުޝްދީއާ ދެކޮޅަށް ފަަތުވާއެއް ނެރުނެވެ. ސަލްމާން ރުޝްދީ އާއި އެ ފޮތާ ގުޅުން ހުރި އެންމެން މެރުމަށް އެ ފަތުވާގައި މުސްލިމުންނަށް ގޮވާލި އެވެ.

އޭނާ މަރާލި މީހަކަށް ތިން މިލިއަން ޑޮލަރުގެ ފައިސާގެ އިނާމެއް ވެސް އިރާން ސަރުކާރުން އިއުލާން ކުރި އެވެ. އެ އިނާމުގެ ތެރެއަށް އިތުރު 500،000 ޑޮލަރު ކަނޑައެޅީ 2012 ވަނަ އަހަރު އިރާނުގެ އަމިއްލަ ޖަމިއްޔާއަކުންނެވެ.

އެއާއެކު އެކި ގައުމުތަަކުގައި ސެޓެނިކް ވާސަސް ފޮތުގެ ކޮޕީތައް އަންދައި، އެ ފޮތް އެކި ބަސް ބަހަށް ތަރުޖަމާ ކުރި މީހުންނަށް ހަމަލާ ދިނެވެ. ޖަޕާނު ބަހަށް ފޮތް ތަރުޖަމާ ކުރި ހިތޮޝީ އިގަރަޝީ 1991 ވަނަ އަހަރު މަރާލި އެވެ.

ސެޓެނިކް ވާސަސް ފޮތާ ދެކޮޅަށް ޕެރިހުގައި ކުރި މުޒާހަރާ.

އެ ފޮތް އިޓަލީ ބަހަށް ތަރުޖަމާ ކުރި މީހެއްގެ ގަޔަށް ވަޅި ހެރި އެވެ. އަަދި ނޯވޭގައި ފޮތް ޝާއިއު ކުރި ވިލިއަމް ނީގާޑްގެ ގަޔަށް ބަޑި ޖެހި އެވެ. ނަމަވެސް ދެ މީހުން ވެސް ސަލާމަތްވި އެވެ.

ފޮތުގެ މައްސަލަ ހޫނުވެ ކަންކަން ގޯސްވުމުން ސަލްމާން ރުޝްދީ މުސްލިމުންގެ ކިބައިން މައާފަށް އެދި، އިނގިރޭސި ސްކޮޓްލޭންޑް ޔާޑްގެ ފުލުހުންގެ ރައްކާތެރިކަަން ހޯދައިގެން ފިލި އެވެ.

ފުރާނައަށް ނުރައްކާ އޮތް ނަމަވެސް އޭނާ ލިޔުން ހުއްޓާ ނުލަ އެވެ. އަދި ދޭތެރެ ދޭތެރެއިން އެކި އިވެންޓުތަކުން ފެނެ އެވެ. ފަތުވާ ނެރުނުތާ އަހަރުތަކެއް ފަހުން، އެ ތަންފީޒް ނުކުރާނެ ކަމަށް އިރާނުން އެންމެ ފަހުން ބުންޏެވެ. އެކަމަކު މިއަދާ ހަމައަށް ވެސް ރަސްމީކޮށް އެ ފަތުވާ އަނބުރާ ގެންގޮސްފައެއް ނުވެ އެވެ.

ސަލްމާން ރުޝްދީގެ އެ ތަޖުރިބާތަކާ ގުޅޭ ގޮތުން 2012 ވަނަ އަހަރު އޭނާ ފޮތެއް ނެރުނެވެ. އިނގިރޭސިވިލާތުގެ ރާނީ ދެއްވާ ނައިޓްހުޑްގެ ލަގަބު 2007 ވަނަ އަހަރު އޭނާއަށް އެރުވުމުން ވެސް އިރާނާއި ޕާކިސްތާނުގެ ފާޑުކިޔުން އަމާޒުވި އެވެ.

ސަލްމާން ރުޝްދީއަށް ދިން ހަމަލާ

ސެޓެނިކް ވާސަސް ފޮތް ނެރުނުތާ 30 އެތައް އަހަރެއް ފަހުން ހުކުރު ދުވަހުގެ ރޭ ސަަލްމާން ރުޝްދީއަށް ހަމަލާ ދިނީ ނިއު ޔޯކްގައި އޮތް އިވެންޓެއްގެ ތެރެއިންނެވެ.

ފުލުހުން ވަނީ ހަމަލާގެ ތުހުމަތަށް އުމުރުން 24 އަހަރުގެ ހާދީ މަތާރް ނަމަކަށް ކިޔާ މީހަކު ހައްޔަރުކޮށްފަ އެވެ. ހަމަލާ ދިން ސަބަބާ ގުޅޭ ގޮތުން ފުލުހުން ވަކި އެއްޗެއް ނުބުނާ އިރު، އިވެންޓް އޮތް މަރުކަޒުން ފެނުނު ދަބަހަކާއި އިލެކްޓްރޯނިކް ސާމާނުތަކެއް ބަލައި ފާސްކުރުމުގެ އަމުރަކަށް ވަނީ އެދިފަ އެވެ.

ސަލްމާންގެ ކަރާއި ބަނޑަށް ވަޅިން ހަމަލާ ދިނެވެ. އޭނާ ހޮސްޕިޓަލަށް ގެންދިޔައީ ހެލިކޮޕްޓަރުގަ އެވެ. އޭނާއާ އިންޓަވިއު ކުރަން ސްޓޭޖުގައި ހުރި ހެންރީ ރީސްއަށް ވެސް އަނިޔާވި އެވެ. އޭނާގެ ބޮލަށް ލިބުނު ކުދި އަނިޔާތަކަށް ފަރުވާ ދިނީ ހޮސްޕިޓަލްގަ އެވެ.

ސަލްމާން ރުޝްދީ ހެލިކޮޕްޓަރުގައި ގެންދަނީ.

ސަލްމާންގެ އޭޖެންޓު ބުނީ އޭނާގެ ހާލު ރަނގަލު ނޫން ކަމަށެވެ. މި ވަގުތު ވެންޓިލޭޓަރުގައި އޮތް އިރު، ވާހަކަ ނުދެއްކޭ ކަމަށް އޭޖެންޓު އެންޑްރޫ ވައިލީ ނެރުނު ބަޔާނުގައި ބުންޏެވެ. އަދި އޭނާގެ އެއް ލޯ ނަގަން ޖެހިދާނެ ކަމަށް ވެސް ބުންޏެވެ.

"ސަލްމާންގެ އެއް ލޯ ނަގަން ޖެހިދާނެ. އޭނާގެ އަތުގެ ނާރުތައް ވަނީ ބުރިވެފައި. އޭނާގެ ފުރަމޭއަށް ވަޅި ހެރުމުން ވަނީ ގެއްލުން ލިބިފައި،" އޭޖެންޓު ބުންޏެވެ.

ސަލްމާން ބައިވެރިވި ގިނަ އިވެންޓުތަކަށް ކުރިން ވެސް އިންޒާރު ދިނެވެ. އޭނާ އެންމެ ފަހުން ލިޔުނު ވިކްޓްރީ ސިޓީ ނެރެން ހަމަޖެހިފައި އޮތީ ފެބްރުއަރީ 2023 ގަ އެވެ. އޭނާ ވަނީ 1975 އިން 2019 އަށް 14 ފޮތް ލިޔެފަ އެވެ.

މިހާރު އެމެރިކާގައި ދިރިއުޅޭ ސަލްމާން ރުޝްދީ ހަތަރު ފަހަރު ކައިވެނިކުރި އެވެ. އޭނާގެ ދެ ދަރިން ތިބެ އެވެ.