ބަރަހަނާ ވީޑިއޯތަކާއި ބައެއް މަރުތަކާ ގުޅޭ ގޮތުން މީޑިއާތަކުން ހަބަރު ފަތުރަމުންދާ ގޮތާމެދު, އެޑިޓަރުންގެ ޖަމިއްޔާ, އެޑިޓާސް ގިލްޑްއިން ކަންބޮޑުވުން ފާޅުކޮށްފި އެވެ.
އެ ޖަމިއްޔާއިން މިއަދު ނެރުނު ނޫސްބަޔާނެއްގައި ބުނީ ބިދޭސީއަކު ގިނަ ބަޔަކާ އެކު އެއްޖިއްސުން ގުޅުން ހިނގި ކަމަށް ބުނެ ލީކްވެފައިވާ ވީޑިއޯތައް ބައެއް މީޑިއާތަކުން އާންމު ކުރުމުގައި އެއްވެސް ވަރެއްގެ ސެންސަރެއް ނެތި އެއް މަންޒަރުތައް ވަރަށް ލޮލަށް އާންމު ކުރުމުންދާ ކަމަށެވެ.
އޭގެ ސަބަބުން މުޖުތަމައުގައި އެކަންކަމަކީ އެއްވެސް ކަމެއް ނޫން ކަމަށް ގަބޫލު ކުރެވޭ މިންވަރަށްދާ ކަމަށާއި އެއީ, ބޮޑު ކަންބޮޑުވުމެއް ކަމަށް ބަޔާނުގައިވެ އެވެ.
"ކުޑަ ކުދިންނާއި އާއިލާތަކުގެ ތެރޭގައި ވެސް އެކަންކަމަކީ "އޯކޭ" ކަމެއް ކަމަށް ދޭހަވާ ގޮތަށް އެ ވާހަކަތައް އެހާ ފުޅާ މިނުގައި އާންމު ނުކުރުމަށް އިލްތިމާސް ކުރަން, އެއްޖިއްސުން ގުޅުން ހިންގުމަކީ މާތްالله ނަކީ ކުރައްވާފައިވާ ބޮޑު ފާފައެއް ކަމަށް ވާއިރު އެ ފާހިޝް އަމަލު ހިންގުމަކު އާންމު އާދައިގެ ކަމެއް ކަމަށް އާންމުންނަށް ވިސްނޭ ދަރަޖައަށް އެކަމުގެ ހަބަރުތައް ގެނެސްދި އެކަންކަން އާންމު ކުރުމަކީ ޒިންމާދާރު މީޑިއާއަކުން ކުރާނޭ ކަމެއް ނޫން," ބަޔާނުގައި ބުންޏެވެ.
ވަކިވަކި ސުރުހީތަކުގައި އެ އަމަލު ހިންގި ގޮތް ތަފްސީލުކޮށް ލިޔެ ފޮޓޯތަކާއި ވީޑިއޯތަކާއި ލިޔުންތައް އެކި ސިފަސިފައިގައި ޝާއިއުކުރުމުގެ ބަދަލުގައި، އެ އަމަލު ހިންގި ފަރާތްތަކުގެ މައްސަލަތައް ތަހުގީގުކޮށް ގާނޫނުގައި ކަނޑައަޅާފައިވާ އަދަބު ދިނުމަށް ކަމާ ގުޅުން ހުރި މުއައްސަސާތައް ޒިންމާދާރުކޮށް ބާރު އެޅުމަށް މަސައްކަތް ކުރުމަށް އެ ޖަމިއްޔާއިން ވަނީ ގޮވާލާފަ އެވެ.
އޭގެއިތުރުން އެފަދަ މައްސަލތައް މީޑިއާތަކުން ރިޕޯޓް ކުރާ އިރު ފަރުދީ ފަރާތެކޭ, ޒިންމާދާރު މަގާމެއްގައި ހުރި މީހެކޭ ތަފާތު ކުރުމެއް ނެތި ހެޑްލައިން ހަދައިގެން އާންމު މީސްމީހުން ފަލީހަތް ނުކުރުމަށް ވެސް އިލްތިމާސް ކުރި އެވެ.
"...އެފަދަ ފަރާތްތަކުގެ އާއިލާއަކާ ކުޑަކުޑަ ކުދިންގެ މުސްތަގުބަލަށް ކޮށްފާނެ ނޭދެވޭ އަސަރުތަކާ ދޭތެރޭ ވެސް މީޑިއާތަކުން އިތުރަށް ވިސްނުމަކީ މި ޖަމިއްޔާގެ ވަރަށް ބޮޑު އެދުމެއް," ބަޔާނުގައިވެ އެވެ.
މީޑިއާތަކުގެ އެޑިޓަރުން ހިމެނޭ, އެޑިޓާސް ގިލްޑްގެ ބަޔާނުގައި އިތުރަށް ބުނީ ގައުމުގައި ހިނގާ މަރުތަކުގެ މައްސަލަތައް ރިޕޯޓް ކުރާ އިރު ވެސް އެފަދަ ކަންކަން ކުރާ މުޖުރިމުން އެކްފޯސް ކުރުމަށް ސަމާލުކަންދީ އަދި އެ މީހުން އިންސާފުގެ ކުރިމައްޗަށް ގެނެސްދިނުމަށް ބާރު ލިބޭ ގޮތަށް ރިފޯޓްތައް ބައްޓަން ކުރަން ޖެހޭ ކަމަށެވެ.
އޭގެ ބަދަލުގައި އެފަދަ ކަންކަމުގައި ވިކްޓިމައިޒްވާ ފަރާތްތަކުގެ ފަތިފުށް ހާމަކުރުމާ ދުރުވާން ޖެހޭ ކަމަށް ބުންޏެވެ. އެހެންވެ, އެފަދަ ކަންކަމާ ދުރުހެލިވުމަށް ޖަމިއްޔާއިން ނޫސްވެރިންނަށް އިލްތިމާސްކުރި އެވެ.
