މާސޭ (އޮގަސްޓް 11) - އިންޓަ މިލާނާ އެކު ހަދާފައިވާ ކޮންޓުރެކްޓް ބާތިލްކުުރުމަށް ފަހު، ޗިލީގެ ތަޖުރިބާކާރު ފޯވަޑް އަލެކްސިސް ސަންޗޭޒް ފްރާންސްގެ މާސޭ އަށް ސޮއިކޮށްފި އެވެ.
އިންޓާއާ އެކު ސަންޗޭޒް ހަދާފައިވާ ކޮންޓުރެކްޓް މިދިޔަ ހޯމަ ދުވަހު އުވާލީ ދެ ފަރާތުން އެއްބަސްވެގެނެވެ.
ސަންޗޭޒް، 33، މެންޗެސްޓާ ޔުނައިޓަޑް ދޫކޮށް އިންޓައާ ގުޅުނީ 2019 ވަނަ އަހަރެވެ. އިންޓަ އަށް ކުޅުނު 109 މެޗުން އޭނާ ވަނީ 20 ލަނޑު ޖަހައިފަ އެވެ. އިންޓައާ އެކު އޭނާ ތިން އަހަރު ހޭދަކުރިއިރު، މިދިޔަ އަހަރު ވަނީ އިޓާލިއަން ލީގުގެ ތަށި އުފުލާލައިފަ އެވެ.
ކުރިން ބާސެލޯނާ އާއި އާސެނަލް އަށް ވެސް ކުޅުނު ސަންޗޭޒް، މާސޭއާ ގުޅުނީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ.
"އުންމީދުކުރަނީ ސަޕޯޓަރުން ހިތްހަމަޖެހޭ ފެންވަރުގެ ކުޅުމެއް ދައްކަން،" ސަންޗޭޒް ބުންޏެވެ.
ޗިލީގެ ގައުމީ ޓީމާއެކު ކޮޕާ އެމެރިކާގެ ތަށި ދެ ފަހަރު ހޯދާފައިވާ ސަންޗޭޒް ވަނީ ގައުމީ ޓީމަށް 140 އަށްވުރެ ގިނަ މެޗު ކުޅެފަ އެވެ. -- އޭއެފްޕީ
