ޖަނަވާރުންގެ ހަށިގަނޑުން އިންސާނުންނާ ހަމައަށް ފޯރާފައިވާ މުޅިން އާ ވައިރަހެއް ދެނެގަތުމުގެ މަސައްކަތް އިރުމަތީ ޗައިނާގައި ސައިންސްވެރިން ކުރަމުން އެބަދެ އެވެ.
އަލަށް ފެނުނު ލަންގްޔާ ހެނިޕާވައިރަސް (ލޭވީ) ގެ ސަބަބުން 35 މީހުން ބަލިވެފައި ވަނީ ޝަންޑޯންގް އަދި ހެނާން ޕްރޮވިންސުންނެވެ. ގިނަ މީހުންނަށް ކުރިމަތިވި އަލާމާތްތަކަކީ ހުން އައުމާއި ކެއްސުމާއި ވަރުބަލިވުމެވެ.
މިހާތަނަށް ބެލެވެނީ އެ މީހުންގެ ހަށިގަނޑަށް ވައިރަސް ފޯރީ ޖަނަވާރެއްގެ ޒަރިއްޔާއިން ކަމަށެވެ. މިއީ އިންސާނުންގެ ތެރޭގައި އެކެއްގެ ގައިން އަނެކެއްގެ ގަޔަށް އަރާ ވައިރަހެއް ކަމަށް ބެލެވޭ ހެއްކެއް އަދި ނެތެވެ.
ސައިންސްވެރިން ބުނީ މީދަލާ ވައްތަރު ޝްރޫ ނަމަކަށް ކިޔާ ޖަނަވާރުގެ ތެރޭގައި މި ވައިރަަސް ވަރަށް ބޮޑަަށް ފާހަގަވެފައިވާ ކަމަށެވެ.
އާ ވައިރަަހާ ގުޅޭ މައުލޫމާތު ފާހަގަކޮށްފައި ވަނީ ޗައިނާ، ސިންގަޕޫރު އަދި އޮސްޓްރޭލިއާގެ ސައިންސްވެރިން ލިޔުނު ސިޓީއެއްގަ އެވެ. އެ ސިޓީ ޝާއިއު ކުރީ މި މަހު ނިއު އިންގްލޭންޑް ޖާނަަލް އޮފް މެޑިސިންގަ އެވެ.
ސައިންސްވެރިން ބުނީ މިހާތަނަަށް ފެނުނު ލޭވީ ކޭސްތަކުގެ ތެރެއިން އެއްވެސް މީހަކު މަރު ނުވާ ކަމަށާއި އެއްވެސް މީހެއްގެ ހާލު ވެސް މާ ބޮޑަށް ސީރިއަސް ނުވާ ކަމަށެވެ.
އެހެން ނަމަވެސް، ގިނަ ވަައިރަސްތައް އިންސާނުންނާ ހަމައަށް ފޯރުމުން ނިކުންނާނެ ނަތީޖާ ލަފާކުރަން އެކަކަށް ވެސް ނޭނގޭނެ ކަމަށާއި އެހެންވެ ސަމާލުވެ ތިބުން މުހިއްމު ކަމަށް ފާހަގަކުރި އެވެ.
ލޭވީއަކީ ހެނީޕާވައިރަސްގެ ބާވަތެކެވެ. ހެނީޕާވައިރަހަކީ "ޒޫނޮޓިކް" ވައިރަހުގެ ކެޓެގަރީއެކެވެ. އެއީ ޖަނަވާރުންގެ ހަށިގަނޑުން އިންސާނުންނާ ހަމައަށް ފޯރާ ވައިރަސްތަކެވެ.
